"ކަށުނަމާދުު" ޕޭޖު ހުއްޓާލަން އެންގިކަމަށް ބުނާ ވާހަކަ ސިޓީ ކައުންސިލުން ދޮގުކޮށްފި
19 ޑިސެމްބަރު 2022 | ހޯމަ 07:59ކައުންސިލުން ބުނީ އެ ވާހަކައަކީ އެއްވެސް ހަގީގަތެއް އެކުލެވޭ ވާހަކައެއް ނޫންކަމަށް
އެ ޕޭޖުން ގެންދަނީ ރާއްޖޭގައި މަރުވާ މީހުންނާއި އެމީހުންގެ ކަށުނަމާދު ގަޑިތައް އާންމު ކުރަމުން
ފޭސްބުކްގައި އާންމު ފަރާތަކުން ހިންގަމުން އަންނަ "ކަށުނަމާދުު.އެމްވީ" ޕޭޖު ހުއްޓާލަން މާލޭ ސިޓީ ކައުންސިލުން އެ ފަރާތަށް އަންގާފައިވާކަމަށް ދެކެވޭ ވާހަކަތައް ކައުންސިލުން ދޮގުކޮށްފިއެވެ.
ޕޭޖް ހިންގާ ފަރާތުން ހޯމަ ދުވަހު ފޭސްބުކްގައި ކުރި ޕޯސްޓެއްގައި ވަނީ، ކައުންސިލުން ކުރަންޖެހޭ ކަމެއް އަމިއްލަ ފަރުދެއްގެ ހައިސިއްޔަތުން ނުކުރެވޭނެކަމަށް ބުނެ، ކަށުނަމާދު އިއުލާނު ކުރުން ހުއްޓާލަން މާލޭ ސިޓީ ކައުންސިލުން އޭނާއަށް އަންގާފައިވާ ކަމަށެވެ.
އޭނާއަކީ ސިޓީ ކައުންސިލުގެ މުވައްޒަފެކެވެ. އޭނާ ބުނާ ގޮތުގައި، ޕޭޖުގައި އިއުލާނު ކުރަނީ އާއިލާތަކުން އެދިގެންނެވެ. ނަމަވެސް ސިޓީ ކައުންސިލުގެ ރަސްމީ މުވައްޒަފެއްގެ ގޮތުގައި ހުރެ، ކައުންސިލުން ރަސްމީ ހައިސިއްޔަތުން ކުރަންޖެހޭ ކަމެއް އޭނާއަށް ނުކުރެވޭނެކަމަށް ކައުންސިލު ބައްދަލުވުމެއްގައި ސެކެޓަރީ ޖެނެރަލް އަންގަވާފައިވާކަމަށް އޭނާ ބުނެއެވެ.
އެހެންނަމަވެސް، ސިޓީ ކައުންސިލުން ބުނީ، ކަށުނަމާދު ޕޭޖް ހިންގާ ފަރާތައް ޕޭޖް ހިންގުން މަނާކޮށް ، އެކަން ހުއްޓާލުމަށް މާލެ ސިޓީ ކައުންސިލުން އެންގިކަމަށް ދެކެވޭ ވާހަކައަކީ އެއްވެސް ހަގީގަތެއް އެކުލެވޭ ވާހަކައެއް ނޫންކަމަށެވެ.
މާލެ ސިޓީ ކައުންސިލުގެ އެއްވެސް އޮފިޝަލަކު އެޕޭޖު ހިންގާ ފަރާތަށް އެފަދަ ރަސްމީ އެއްވެސް އެންގުމެއް އަންގާފައި ނުވާނެކަމަށް ކައުންސިލުން ކުރި ޓްވީޓެއްގައި ބުނެފައިވެއެވެ.
70،000ށް ވުރެ ގިނަ މީހުން ފޮލޯކުރާ އެ ޕޭޖުން ގެންދަނީ ރާއްޖޭގައި މަރުވާ މީހުންނާއި އެމީހުންގެ ކަށުނަމާދު ގަޑިތައް އާންމު ކުރަމުންނެވެ.
