ސިޓީ ކައުންސިލުން، މާލެއާއި ވިލިމާލެ ކުނިކަހާނެ މީހުން ހޯދަނީ
ވިލިމާލެއަށް 28 މީހުންނާއި މާލެއަށް 80 މީހުން ހޯދަން ކައުންސިލުން ވަނީ އިއުލާންކޮށްފައި
މާލޭގެ މަގުތައް ސާފުކުރުމުގައި ވެމްކޯގެ މުވައްޒަފުން
ސިޓީ ކައުންސިލުން 9,600 ރުފިޔާގެ މުސާރައަށް މާލެއާއި ވިލިމާލެ ކުނިކަހާނެ މަސައްކަތު މީހުން ހޯދަން އިއުލާނުކޮށްފިއެވެ.
އެގޮތުން ވިލިމާލެއަށް 28 މީހުންނާއި މާލެއަށް 80 މީހުންނާއެކު ޖުމްލަ 108 މީހުން ހޯދަން އެ ކައުންސިލުން ވަނީ އިއުލާނުކޮށްފައެވެ. އެ މީހުންގެ އަސާސީ މުސާރައަކީ 3،100 ރުފިޔާއަށް ވާއިރު، ސަރވިސް އެލަވަންސްއާއެކު އެމީހުންނަށް މުސާރައިގެ ގޮތުގައި ލިބޭނީ 7،000 ރުފިޔާއެވެ. އަދި އިތުރު ގަޑީގެ އެލަވެންސްގެ ގޮތުގައި 2،600 ރުފިޔާ ވަނީ ކަނޑައެޅިފައެވެ. ސިޓީ ކައުންސިލުން ބުނީ ކޮންމެ މުވައްޒަފަކަށްވެސް ގެއަށް ގެންދަން މުސާރައިގެ ގޮތުގައި 9،600 ރުފިޔާ ލިބޭނެކަމަށެވެ.
އެ ވަޒީފާއަށް ހުށަހެޅުމުގެ ފުރުސަތު ހަމަވާނީ ޑިސެމްބަރ 22 ވަނަ ދުވަހުގެ 14:00އަށެވެ. އަދި އެ ވަޒީފާތަކަށް މީހުން ހޮވުމަށް ބާއްވަ އިންޓަރވިއުތައް އޮންނާނީ މި މަހުގެ 25 ވަނަ ދުވަހާއި އަންނަ ޖެނުއަރީ މަހުގެ 15 ވަނަ ދުވަހާ ދެމެދުއެވެ.
މާލެއާއި ވިލިމާލެ އަދި ހުޅުމާލޭގައި ކުނި ކެހުމުގެ މަސައްކަތް މިހާރު ކުރަނީ ވެމްކޯއިންނެވެ. ނަމަވެސް މާލޭގެ އާންމު ތަންތަނުން ކުނި ނަގަން ވެމްކޯއާއެކު ވެފައިވާ އެއްބަސްވުން މިމަހުގެ 26ވަނަ ދުވަހު ހަމަވުމުން، އެ އެއްބަސްވުން އައުނުކޮށް އެ މަސައްކަތް ސިޓީ ކައުންސިލުން ކުރަން އެ ކައުންސިލުން ވަނީ ނިންމާފައެވެ.
އެ މަސައްކަތް މާލޭ ސިޓީ ކައުންސިލުގެ ދަށަށް ބަދަލުކުރުމުން މާލޭގެ އާންމު ތަންތަނުން ކުނި ނެގުމަށް ވޭސްޓް މެނޭޖްމަންޓް ސެކްޝަންގެ ނަމުގައި ޚާއްސަ ސެކްޝަނެއް އުފައްދަން އެ ކައުންސިލުން ވަނީ ނިންމާފައެވެ.
ސިޓީ ކައުންސިލުން މިގޮތަށް ނިންމީ، ވެމްކޯއަށް މިހާރު އަހަރަކު ދެމުން އަންނަ 2.5 މިލިއަނަށްވުރެ ހެޔޮ އަގެެއްގައި އެ މަސައްކަތް ކުރެވޭނެކަމަށް ބުނެއެވެ. އެކަމަށް ރައްދުދީ ވެމްކޯއިން މީގެ ކުރިން ބުނެފައިވަނީ، ސިޓީ ކައުންސިލުން އެގޮތަށް ނިންމާފައި ވަނީ އެފަދަ އޮޕަރޭޝަނަކަށް ކުރަންޖެހޭ ޚަރަދުތައް ނުހިމަނާ ކަމަށެވެ.
ވެމްކޯގެ ހުރިހާ މުވައްޒަފުންނަކީ ދިވެހިންކަމާއި، ސިޓީ ކައުންސިލުގެ އެކި މަސައްކަތްތަކުގައި ބިދޭސީން ގިނަކަން ފާހަގަކޮށް، ވެމްކޯއިން ނެރުނު ބަޔާނެއްގައި ބުނެފައިވަނީ، ކައުންސިލުގެ ނިންމުމާއެކު، ވެމްކޯއިން ކުނިކެހުމުގެ މަސައްކަތުގައި ހަރަކާތްތެރިވާ މުވައްޒަފުންގެ ވަޒީފާގެ ކުރިމަގާމެދުވެސް ސުވާލުއުފެދިފައިވާ ކަމަށެވެ.
މާލޭގެ އާންމު ސަރަހައްދުތައް ކުނިކަހާ ސާފުކުރުމަށް ވެމްކޯއާ ހަވާލުކޮށްފައިވަނީ 2019 ވަނަ އަހަރުގެ ޑިސެމްބަރު މަހުގެ ތެރޭގައެވެ.
