ފައިސަލް ހުރި ގޮޅި ކޮންމެ 10 މިނެޓަކުން ފުލުހުން ދިޔައީ ޗެކްކުރަމުން

ހދ. ނޮޅިވަރަމު 28 އަހަރުގެ ނިޝާމާ މުހައްމަދުގެ މަރުގެ މައްސަލައިގައި ހައްޔަރުކޮށްފައިވާ އޭނާގެ ފިރިމީހާ، އދ. ފެންފުށި ރޯޒީ ވިލާ، 32 އަހަރުގެ އަބޫބަކުރު ފައިސަލް ދަންޖެހެން މަސައްކަތް ކުރީ ގޮޅި ކޮންމެ 10 މިނެޓަކުން ފުލުހުން ޗެކް ކުރަމުން ގޮސްފައިވާކަން ރާއްޖެއެމްވީއަށް އެނގިއްޖެއެވެ.

ފައިސަލްގެ ބަންދާ މެދު ގޮތެއް ނިންމަން ކޯޓަށް ހާޒިރު ކުރުމުން 15 ދުވަހުގެ މުއްދަތަށް ބަންދުގައި ބަހައްޓައިގެން ތަހުގީގު ކުރުމަށް ކޯޓުން ވަނީ ހުއްދަ ދީފައެވެ.

Advertisement

މި މައްސަލައާ ގުޅޭގޮތުން ފުލުހުން ބުނެފައިވަނީ، ފައިސަލް ދަަންޖެހެން މަސަައްކަތް ކުރަނިކޮށް ހޯމަ ދުވަހުގެ ރޭ 23:15 އެހާއިރު ފުލުހުންނަށް ފެނިފައިވާ ކަމަށެވެ. ފައިސަލް ދަންޖެހިފައިވަނީ ކުޅުދުއްފުށީ ފުލުހުންގެ ބަންދުގައި ހުއްޓާއެވެ. މި ހާދިސާގެ އިތުރު ތަފްސީލެއް ފުލުހުން ހާމައެއް ނުކުރެއެވެ.

އިތުބާރު ހުރި މަސްދަރަކުން ރާއްޖެއެމްވީއަށް ކިޔާދީފައިވާ ގޮތުގައި، ފުލުހުންގެ ބެލުމުގެ ދަށުގައި ހުއްޓައި އޭނާ ދަންޖެހެން މަސައްކަތް ކުރީ ބާލީހުގެ އުރަ ގޮޅީގެ ތޭރިތަކުގައި އައްސައިގެންނެވެ.

ރާއްޖެއެމްވީއަށް އެނގިފައިވާ ގޮތުގައި ކޮންމެ 10 މިނެޓަކުން ފުލުހުން ގޮޅި ޗެކް ކުރެއެވެ. އެގޮތުގެ މަތިން އޭނާގެ ގޮޅި ޗެކް ކުރިތާ 10 މިނެޓު ނުވަނިސް ފުލުހުން އަނެއްކާވެސް އެ ގޮޅި ޗެކް ކޮށްފައިވެއެވެ. ވުމާއެކު، އޭނާ ދަންޖެހެން އެޓެމްޕްޓު ކުރިތާ ކުޑަ ވަގުތުކޮޅެއް ނުވަނީސް ފުލުހުންނަށް ވަނީ އެ ސީންއަށް އެޓެންޑުވެވިފައެވެ.

މައުލޫމާތު ލިބިފައިވާ ގޮތުގައި އޭނާ ހޮސްޕިޓަލަށް ގެންދިޔަ އިރުވެސް ވިންދު ނެތެވެ. އަދި އެމަރޖެންސީގައި ވަގުތުން ފަރުވާ ފަށާ، ވިންދު އައުމުން އައިސީޔޫއަށް ބަދަލުކުރެވި ވެންޓިލޭޓަރަށްވެސް ވަނީ ލާފައެވެ.

ކުޅުުއްފުށީ ރީޖަނަލް ހޮސްޕިޓަލްގެ މީޑިއާ އޮފިޝަލް ވިދާޅުވީ ފައިސަލްގެ ހާލު ވަރަށް ކްރިޓިކަލް ކަމަށާއި، އަދިވެސް އޮތީ އައިސީޔުގައި ވެންޓިލޭޓަރުގައި ކަމަށެވެ.

ފައިސަލް ދަން ޖެހުމުގައި ފުލުހުންގެ އިހުމާލެއް އޮތްތޯ ބަލަން ރައްޔިތުންގެ މަޖިލީހަށް ވަނީ މައްސަލައެއްވެސް ހުށަހަޅާފައެވެ. ރައްޔިތުންގެ މަޖިލިހުގެ މަޑުއްވަރީ ދާއިރާގެ ޕީއެންސީގެ މެންބަރު އާދަމް ޝަރީފް އުމަރު ވަނީ މި މައްސަލަ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ މެދުވެރިކޮށް ބަލައިދިނުމަށް އެދި ރައްޔިތުންގެ މަޖިލީހުގެ ރައީސަށް ސިޓީއެއް ހުށަހަޅުއްވާފައެވެ.

ކުށުގެ ތުހުމަތުގައި ހައްޔަރުކޮށްފައި ތިބޭ މީހުން ބެލެހެއްޓުމަކީ ފުލުހުންގެ ޒިންމާއެއްކަން ފާހަގަ ކުރައްވައި އެ ސިޓީގައި އާދަމް ޝަރީފް ވަނީ ފުލުހުންގެ ބެލުމުގެ ދަށުގައި ހުއްޓާ ފައިސަލް މިފަދަ ނުރައްކާތެރި އަމަލެއް ހިންގިއިރު، ފުލުހުންނަށް ނޭނގުމަކީ ވަރަށް ބޮޑު އިހުމާލެއް ކަމަށް ބެލުމުގެ ފުރުސަތު އޮތް ކަމެއްކަމަށް ވިދާޅުވެފައެވެ.

އަދި، މި މައްސަލައިގައި ފުލުހުންގެ އިހުމާލެއްވޭތޯއާއި، އެފަދަ ކަންކަން ކުރިމަގުގައި ދިމާ ނުވާނެ ގޮތްތަކެއް ހެދުމަށް ފުލުހުން މަސައްކަތް ކުރަމުންދޭތޯ ކޮމިޓީ މެދުވެރިކޮށް ބަލައިދިނުމަށް ސިޓީގައި އެދިވަޑައިގެންފައިވެއެވެ.