ޑިސެމްބަރު 26 އިން ފެށިގެން މާލޭގެ އާންމު ތަންތަނުން ކުނި ނަގާނީ މާލެ ސިޓީ ކައުންސިލުން!
7 ޑިސެމްބަރު 2022 | ބުދަ 12:10ވެމްކޯއާއި ސިޓީ ކައުންސިލާ ދެމެދު ވެފައިވާ އެއްބަސްވުމުގެ މުއްދަތު ހަމަވާނީ ޑިސެމްބަރު 26އަށް
ވެމްކޯ ކުނި ނެގުން
މި މަހުގެ 26 ގެ ފަހުން މާލެ އާއި ވިލިމާލޭގެ އާންމު ތަންތަނުން ސިޓީ ކައުންސިލުން އަމިއްލައަށް ކުނި ނަގަން ނިންމައި ވެމްކޯއާއެކު ވެފައިވާ އެއްބަސްވުން އައު ނުކުރުމަށް އެ ކައުންސިލުން ފާސްކޮށްފިއެވެ.
ސިޓީ ކައުންސިލުން މިގޮތަށް ފާސްކޮށްފައިވަނީ މިދިޔަ ބުރާސްފަތި ދުވަހު ބޭއްވި އެ ކައުންސިލްގެ ބައްދަލުވުމުގައެވެ. ވެމްކޯއާއެކު ވެފައިވާ އެއްބަސްވުން އައު ނުކުރަން މިދިޔަ ސެޕްޓެމްބަރު މަހު ސިޓީ ކައުންސިލުން ނިންމައި އެކަން އިއުލާންވެސް ކުރިއެވެ.
ސިޓީ ކައުންސިލުން "ރާއްޖެ ޓީވީ" އަށް މައުލޫމާތު ދީފައިވާ ގޮތުގައި މާލެ ސަރަހައްދުގެ އާއްމު ތަންތަނުގެ ކުނި ނެގުމަށް ވެމްކޯއާއެކު އެ ކައުންސިލުން ވެފައިވާ އެއްބަސްވުމުގެ މުއްދަތު މި މަހުގެ 26 އަށް ހަމަވާނެއެވެ. އެހެންކަމުން އެ ދުވަހުން ފެށިގެން ކުނި ނަގާނީ އެ ކައުންސިލުގެ މުވައްޒަފުންނެވެ.
އެ ކައުންސިލުން މިގޮތަށް ނިންމީ އެއްބަސްވުމުގެ ދަށުން ވެމްކޯއަށް 2.5 މިލިއަން ރުފިޔާ ޚަރަދު ކުރާއިރު އާއްމު ތަންތަނުގައި ހުންނަ ކުނި ވެމްކޯއަށް ނުނެގި، އެކަން ސިޓީ ކައުންސިލުން މިހާރު ވެސް ކުރަން ޖެހޭތީއެވެ. މީގެ ސަބަބުން ޚަރަދުތައް ބޮޑުވެފައިވާ ކަމަށާއި ލާމަރުކަޒީ ނިޒާމުގެ ދަށުން އެކަން ކުރުމަށް އޮންނަނީ ކައުންސިލަށް ކަމަށް ވެސް އެ ކައުންސިލުން ފާހަގަކުރިއެވެ.
ސިޓީ ކައުންސިލުން އެއްބަސްވުން އައު ނުކުރުމަށް ސެޕްޓެމްބަރު މަހު ނިންމުމާ ގުޅިގެން ވެމްކޯއިން ވަނީ ކަންބޮޑުވުން ފާޅުކޮށް ބަޔާނެއްވެސް ނެރެފައެވެ. އެ ބަޔާނުގައި ވެމްކޯއިން ބުނީ ޚަރަދުގެ ގޮތުގައި މުވައްޒަފުން ބެލެހެއްޓުމަށް އަހަރަކު 12 މިލިއަން ރުފިޔާ ސިޓީ ކައުންސިލުން ހުށަހަޅާފައިވާއިރު މިފަދަ ބޮޑު ޚިދުމަތެއް ފޯރުކޮށްދިނުމުގައި ހިމެނޭ އެހެނިހެން ޚަރަދުތައް ކަމުގައިވާ ވެހިކަލް މަރާމާތު ކުރުމާއި ކުނި ރައްކާތެރިގޮތުގައި ނައްތާލުމަށް ކުރަންޖެހޭ ބޮޑެތި ޚަރަދުތަކަށް އެއްވެސް ވަރަކަށް ރިޢާޔަތްކޮށްފައިނުވާކަމަށެވެ. އަދި 100 އިންސައްތަ ދިވެހި މުވައްޒަފުން ހިއްސާކުރާ ވެމްކޯގެ ބޮޑު އޮޕަރޭޝަންގެ ތެރެއިން މާލެ ސިޓީގެ ހުރިހާ ސަރަހައްދެއް ސާފުކުރުމަށް މާލެ ސިޓީ ކައުންސިލުން ހުށަހަޅާފައިވާ 100 މުވައްޒަފުންނަކީ އެކަށީގެންވާ އަދަދެއްކަމަށް ގަބޫލު ނުކުރެވޭ ކަމަށާއި ސިޓީ ކައުންސިލުގެ މިކުއްލި ނިންމުމާއެކު މިކޯޕަރޭޝަންގެ ކުނި ކެހުމުގެ މަސައްކަތުގައި ހަރަކާތްތެރިވާ ދިވެހި އެތައް މުވައްޒަފުންނެއްގެ ވަޒީފާގެ ކުރިމަގާއި މެދު މިއަދު ސުވާލު އުފެދިފައިވާ ކަން ވަނީ ފާހަގަކޮށްފައެވެ.
މާލެ ސިޓީ ކައުންސިލުގެ އެކިއެކި މުނިސިޕަލް ޚިދުމަތް ދިނުމުގައި އަމަލީ ގޮތުން އެތަކެއް ބައިވަރު ބިދޭސީ މުވައްޒަފުން ހަރަކާތްތެރިވެއެވެ.
