އެސްޓޮން ވިލާ ބަލިކޮށް, އިނގިރޭސި ލީގު ކަޕްގެ ހަތަރު ވަނަ ބުރުން މެންޗެސްޓަރ ޔުނައިޓެޑް ޖާގަ ހޯދައިފިއެވެ.
ޔުނައިޓެޑް ލީގު ކަޕްގެ ހަތަރު ވަނަ ބުރުން ޖާގަ ހޯދީ 4-2 ން އެސްޓޮން ވިލާ ބަލިކޮށްގެންނެވެ. މެޗުގައި ފުރަތަމަ ލަނޑު ޖަހާ ކުރި ހޯދީ އެސްޓޮން ވިލާއިންނެވެ. 48 ވަނަ މިނެޓުގައި އެ ޓީމަށް ކުރިހޯދައިދިނީ ވަޓްކިންސްއެވެ. އެކަމަކު އެ ލަނޑަށް މިނެޓެއް ވެސް ނުވަނީސް މާޝިއަލް ލަނޑެއް ޖަހާ ޔުނައިޓެޑަށް ނަތީޖާ ހަމަހަމަކޮށްދިނެވެ. ދެވަނަ ފަހަރަށް ވެސް ކުރި ހޯދީ އެސްޓޮން ވިލާއަށެވެ. އެކަމަކު އެއީ ޑަލޯ އަތުން ބައިކޮޅަށް ވަތް ގޯލަކުންނެވެ. ދެ ވަނަ ފަހަރަށް ނަތީޖާ ހަމަހަމަކޮށްދިނީ ރަޝްފޯޑެވެ. ކުރި ހޯދއިދިނީ ބުރޯނޯ ފެނާންޑޭސްއެވެ. ލީޑު ފުޅާކޮށްދިނީ އިތުރު ވަގުތުގައި މެކްޓޮމިނޭއެވެ. ޔުނައިޓެޑްގެ ފަހު ދެ ލަނޑު ޖަހަން ފުރުޞަތު ތަނަވަސްކޮށްދިނީ ޒުވާން ގާނާޗޯއެވެ.
ލީގު ކަޕްގެ ހަތަރު ވަނަ ބުރުގައި މެންޗެސްޓަރ ޔުނައިޓެޑް ވާދަކުރަން ޖެހޭނީ ބާންލީ އަށެވެ. އެ ޓީމަށް ކޯޗުކޮށްދެނީ މެންޗެސްޓަރ ސިޓީގެ ކުރީގެ ކެޕްޓަން ކޮމްޕެނީއެވެ. ލީގު ކަޕްގެ ހަތަރު ވަނަ ބުރުގައި އޮތް އެންމެ ވަރުގަދަ މެޗަކީ މެންޗެސްޓަރ ސިޓީއާއި ލިވަޕޫލް ވާދަކުރާ މެޗެވެ. ލިވަޕޫލުން ވަނީ މި ސީޒަނުގައި ދެ ފަހަރު ސިޓީ ބަލިކޮށްފައެވެ.
