އީރާން ސަރުކާރާއި ދެކޮޅަށް ކުރާ މުޒާހަރާތައް- ޔުނިވަރސިޓީ ދަރިވަރުންގެ ހިމޭން އިހުތިޖާޖުތަކެއް

އީރާންގައި ސަރުކާރާ ދެކޮޅަށް ކުރިއަށްދާ ހަރަކާތްތަކުގައި ބައިވެރިވެ، އެޤައުމުގެ ޔުނިވަރސިޓީތަކުގެ ދަރިވަރުން ހިމޭން އިހުތިޖާޖުތަކެއް ކުރަން ފަށައިފިއެވެ.

މި އިހުތިޖާޖުތައް ކުރަމުން ދަނީ އިށީނދެގެން ތިބެ ކުރާ އިހުތިޖާޖުތަކެއްގެ ސިފައިގައި ކަމަށް ވާއިރު އިހުތިޖާޖުގެ ބައިވެރިން ވަނީ ސަރުކާރާއި ދެކޮޅަށް ލިޔެފައިވާ މެސެޖުތައް ހުރި ބޯޑުތަކާއި ލިޔުންތައް މި އިހުތިޖާޖުތަކުގައި ބޭނުންކޮށްފައެވެ. އީރާންގެ ސަރުކާރާއި ދެކޮޅަށް ކުރާ އިހުތިޖާޖުތައް ހުއްޓުވަން އެ ގައުމުގެ އިދާރާތަކުން ދަނީ ބާރުގެ ބޭނުން އިންތިހާ އަށް ކުރަމުންނެވެ. އެހެންނަމަވެސް ސަރުކާރަށް އަމާޒުވާ ފާޑުކިޔުންތައް މަދުވުމުގެ ބަދަލުގައި ގޮންޖެހުންތައް އިތުރުވަމުންދާކަމަށް މީޑިއާ ރިޕޯޓުތަކުން ހާމަވެއެވެ.

އެޤައުމުގެ ބައެއް ޔުނިވަރސިޓީގެ ދަރިވަރުން ހިފަހައްޓައިގެން ތިބި ލިޔުންތަކުގައި، މުޒާހަރާތަކުން ހައްޔަރު ކުރި ދަރިވަރުން ދޫކޮށްނުލާހާ ހިނދަކު ކުލާސްތައް ނުބޭއްވޭނެ ކަމަށް ބުނެފައިވެއެވެ.

މީޑިއާ ރިޕޯޓުތައް ބުނާ ގޮތުން ފާއިތުވި 6 ހަފްތާއެއްހާ ދުވަހުގެ ތެރޭގައި 300 މީހުން ވަނީ ހައްޔަރުކޮށްފައެވެ.

އީރާންގައި މިމުޒާހަރާތައް ހުއްޓުމެއްނެތި ކުރިއަށްދާތާ އެތައް ދުވަހެއް ވެފައިވާއިރު އެގައުމުގެ ވެރިރަށް ތެހްރާން ހިމެނޭހެން 40 ސިޓީއެއްގައި މުޒާހަރާތައް ކުރަމުންދާކަން ފާހަަގަކޮށްލެވެއެވެ. އަދި އީރާންގެ ސަލާމަތީ ބާރުތަކުން މުޒާހަރާތައް ހުއްޓުވުމަށް ބާރުގެ ބޭނުންކުރުމުގެ ސަބަބުން އެތައް ބަޔަކަށް ދަނީ އަނިޔާވަމުންނެވެ. އަދި ސަލާމަތީ ބާރުތަކާއި ހިނގި ކުރިމަތިލުންތަކުގައި މިހާތަނަށް 50 އާއި ގާތްކުރާ އަދަދަކަށް މީހުން މަރުވެ އެތައް ސަތޭކަ މީހުން ހައްޔަރުކޮށްފައިވާކަމަށް މީޑިއާ ރިޕޯޓުތައް ބުނެއެވެ.