މުބާރާތުގައި ޓީމު ދެއްކި ކުޅުމާމެދު ހިތްހަމަޖެހޭ: ފައްލޯ

ވޮލީބޯޅަ އެސޯސިއޭޝަން ކަޕްގައި ޕޮލިސް ކުލަބުގެ ކުޅުންތެރިން ދެއްކި ކުޅުމާމެދު ހިތްހަމަ ޖެހޭ ކަމަށް ޕޮލިސް ކުލަބުގެ ކޯޗު ފަތުހުﷲ ވަހީދު (ފައްްލޯ) ބުނެފިއެވެ.

މުބާރާތުގައި ހޮނިހިރު ދުވަހުގެ ރޭ ކުލަބް ވެމްކޯ އަތުން ބަލިވެ ޕޮލިހަށް ވަނީ އަމިއްލަ ބާރު ގެއްލިފައެވެ. އެ މެޗުގައި ޕޮލިސް ބަލިވީ ފުރަތަމަ ސެޓު ގެނެސްފައި ވަނިކޮށް، އަނެއް ތިން ސެޓު ގެއްލިގެންނެވެ. މެޗުގެ ދެ ވަނަ ސެޓުގައި ޕޮލިސް ޓީމުގެ ބިދޭސީ ކުޅުންތެރިޔާ އަކިން އަށް ރަތް ކާޑު ދައްކައި ކޯޓުން ފޮނުވާލުމުން ޕޮލިހަށް އޭގެ އަސަރުކުރިއެވެ. އޭނާއަށް ރަތް ކާޑު ދައްކާފައިވަނީ ރެފްރީގެ ނިންމުމާމެދު ހިތްހަމަ ނުޖެހި، ތަކުރާރުކޮށް ރެފްރީއާ ޒުވާބު ކުރުމުންނެވެ. އޭގެ ކުރީ މެޗުގައި ވެސް ޕޮލިހަށް ދިމާވީ އެ މައްސަލައެވެ. އެ މެޗުގައި އެ ޓީމުގެ ސެޓަރު މުތުސާމީއަށް ވަނީ ރަތް ކާޑު ދައްކާފައެވެ.

ޕޮލިހަށް ސެމީގެ ޖާގައެއް ލިބޭނީ މިރޭ ދިވެހި ސިފައިންގެ ކުލަބާއި ގުޑީސް ސްޕޯޓްސް ކުޅޭ މެޗުގައި ފަސް ސެޓަށް ނުގޮސް ސިފައިން ބަލިވެއްޖެނަމައެވެ. ސެމީގެ ޖާގައެއް ހޯދުމަށް ސިފައިންނަށް ބޭނުންވަނީ އެންމެ ޕޮއިންޓެކެވެ.

މެޗަށްފަހު ފައްލޯ ބުނީ ޖުމުލަ ގޮތެއްގައި ބަލާނަމަ، އެ މެޗުގައި ވެސް ޕޮލިސް ޓީމުގެ ކުޅުން ރަނގަޅު ކަމަށެވެ. އަދި ދެވަނަ ސެޓުގައި ބަކި ހިސާބަކުން އަކިން ފައިބަންޖެހުމުން، ދިވެހި ކުޅުންތެރިން ރަނގަޅު ކުޅުމެއް ދެއްކި ކަމަށެވެ. އަދި އެ ސެޓު ގެއްލުމުގެ ސަބަބުން އިތުރު މަސައްކަތްތަކެއް ކުރަން ޖެހުނު ކަމަށެވެ.

މީގެ އިތުރުން ފައްލޯ ބުނީ ކުރިން ވެސް ބުނި ގޮތަށް ވެމްކޯއަކީ ހުރިހާ ޑިޕާޓްމަންޓުތަކެއް ވަރަށް ހަމަހަމަ ޓީމެއް ކަމަށެވެ. އަދި ގަބޫލުކުރެވޭ ގޮތުގައި މެޗުގައި ވެމްކޯއަށް ލިބުނީ އޭގެ ފައިދާ ކަމަށެވެ. މުޅި މުބާރާތަށް ބަލާ ނަމަ، ޕޮލިސް ޓީމުގެ ކުޅުންތެރިންގެ ކުޅުން ރަނގަޅުކަން ފައްލޯ ފާހަގަކުރިއެވެ.

މުބާރާތަށް ޕޮލިސް ޓީމާއެކު ފައްލޯ އެކުލަވާލާފައިވަނީ ޒުވާން ޓީމެކެވެ. އެ ޓީމުގައި ހިމެނޭ ހައިލަމް ހަސަން އާއި މާއިޝް އަހުމަދުގެ ކުޅުން މުބާރާތުގައި ފާހަގަކޮށްލެވެއެވެ. ވަރުގަދަ މެޗުތަކުގައި ވެސް އެ ޓީމުގެ ޒުވާން ކުޅުންތެރިން އައީ މޮޅު ކުޅުމެއް ދައްކަމުންނެވެ. އިތުބާރާއެކު ކުޅެމުންނެވެ. ސެމީގެ ޖާގަ ނުލިބިއްޖެނަމަ، ޕޮލިސް މުބާރާތް ނިންމާލާނީ ހަތަރު ވަނައިގައެވެ.