ސިޓީ ކައުންސިލަށް ޕީޕީއެމްއިން ކޮންސަލްޓެންޓުން ނަގާ ކަމުގެ ޝަކުވާ
10 ޖޫން 2022 | ހުކުރު 16:21އެމީހުން ނަގާފައިވަނީ ބޮޑު މުސާރައެއްގައި ކަމަށް މައުލޫމާތު ލިބޭ
މާލެ ސިޓީގެ މޭޔަރ ޑރ. މުހައްމަދު މުއިއްޒު
މާލެ ސިޓީ ކައުންސިލަށް ކޮންސަލްޓެންޓުން ނަގާފައިވަނީ ސީދާ ޕީޕީއެމް މެމްބަރުންނަށް ބަލައިގެނެއް ނޫން ކަމަށް އެ ކައުންސިލުން ބުނެފިއެވެ.
ޕީޕީއެމްގެ ގިނަ މެމްބަރުންތަކެއް މާލެ ސިޓީ ކައުންސިލަށް ކޮލްސަލްޓެންޓުންގެ ގޮތުގައި ނަގާފައިވާކަމަށް ދަނީ މައުލޫމާތުލިބެމުންނެވެ. އަދި އެމީހުންނަށް ބޮޑު މުސާރައެއް ދޭ ކަމަށް މައުލޫމާތު ލިބެއެވެ.
މިކަމާ ގުޅިގެން މާލެ ސިޓީ ކައުންސިލްގެ ސްޕޯކްސްޕަރސަން މަރިޔަމް ޝިއުނާ ވިދާޅުވީ ސިޓީ ކައުންސިލަކީ ގިނަ މަސައްކަތްތަކެއް ކުރަންޖެހޭ އިދާރާއެއް ކަމަށެވެ. މި މަސައްކަތްތަކާ އެއްވަރަށް މުވައްޒަފުން ހޯދުމަށް ސިޓީ ކައުންސިލުން ކޮށްފައިވާ މަސައްކަތަށް ސިވިލްސަރވިސް ކޮމިޝަނުން އެއްބާރުލުން ދީފައިނުވާކަމަށެވެ.
އެހެންކަމުން ސިޓީ ކައުންސިލަށް ކޮންސަލްޓެންޓުން ނަގާފައިވާކަމަށާއި، އެ މުވައްޒަފުން ނަގާފައިވަނީ އުސޫލުގެ ތެރެއިން ކަމަށް ޝިއުނާ ވިދާޅުވިއެވެ. އަދި މުވައްޒަފުން ނަގާފައިވަނީ ޕީޕީއެމްއަށް ނިސްބަތްވާ މެމްބަރުންނަށް ބަލައިގެނެއް ނޫން ކަމަށް އޭނާ ވިދާޅުވިއެވެ. ކައުންސިލަށް ނަގާފައިވަނީ ކިހާ މުވައްޒަފުންނެއް ކަމާއި، އެ މުވައްޒަފުންގެ މުސާރައިގެ ތަފްސީލު ފަހުން ހިއްސާކުރާނެ ކަމަށް ޝިއުނާ ވިދާޅުވިއެވެ.
މައުލޫމާތު ލިބޭގޮތުގައި ސިޓީ ކައުންސިލަށް ކޮންސަލްޓެންޓުންގެ ގޮތުގައި ނަގާފައިވާ ޕީޕީއެމަށް ނިސްބަތްވާ އިސް މެމްބަރުންގެ ތެރޭގައި އެ ޕާޓީގެ ނާއިބު ރައީސް މުހައްމަދު ޝަރީފު ހިމެނެއެވެ.
