ދިވެހިންނާ ކައިވެނިކޮށްގެން އުޅޭ ބިދޭސީންނަށް ދާއިމީ ޑްރައިވިންގ ލައިސަންސް ދެވޭ ގޮތަށް ގަވާއިދު އިސްލާހު ކޮށްފިއެވެ.
އެއްގަމު އުޅަނދުފަހަރު ދުއްވުމުގެ ލައިންސަންސް ދޫކުރުމާ ބެހޭ ގަވާއިދަށް ގެނައި ފުރަތަމަ އިސްލާހު މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވަނީ އާދީއްތަ ދުވަހު ގެޒެޓް ކޮށްފައެވެ. އެ ގަވާއިދުގެ ތިން މާއްދާއަކަށް މިނިސްޓްރީން ވަނީ ބަދަލުތައް ގެނެސްފައެވެ.
މި ގަވާއިދަށް އިސްލާހު ގެނައުމުގެ ކުރިން ދާއިމީ ލައިސަންސް ދޫކުރެވެނީ ދިވެހިންގެ ތެރެއިން ވަގުތީ ލައިސަންސްގެ މުއްދަތު ހަމަވެފައިވާ މީހުންނަށް އެކަންޏެވެ. ނަމަވެސް ގަވާއިދަށް ގެނައި ބަދަލާއެކު ދިވެހިންނާއި ކައިވެނިކޮށްގެން ތިބޭ ބިދޭސީންނަށް ވެސް ދާއިމީ ލައިސަންސް ދޫކުރެވޭނެއެވެ.
މީގެ ކުރިން ގަވާއިދުގައި އޮންނަ ގޮތުން ބިދޭސީންނަށް ދެނީ އެއް އަހަރު ދުވަހުގެ ވަގުތީ ލައިސަންސެކެވެ. އެ މުއްދަތު ހަމަވުމުން އަނެއްކާ ވެސް ޖެހެނީ ލައިސަންސް އާކުރާށެވެ. ނަމަވެސް ދިވެހިންނާ ކައިވެނިކޮށްގެން އުޅޭ ބިދޭސީންނަށް ދެން ލައިސަންސް ދޫކުރާނީ ދިވެހިންނާ އެއްގޮތަށް 10 އަހަރުގެ މުއްދަކަށެވެ.
މި އިސްލާހަށް އާދީއްތަ ދުވަހުން ފެށިގެން އަމަލު ކުރަން ފަށާފައިވާއިރު ދިވެހިންނާ ކައިވެނިކޮށްގެން އުޅޭ ބިދޭސީންގެ ތެރެއިން ލައިސަންސް އޮތް މީހުންނަށް ފޯމު ހުށަހަޅައިގެން އެ ލައިސަންސް ދާއިމީ ކުރުމުގެ ފުރުސަތު މިހާރު ވެސް ލިބޭނެ ކަމަށް ގަވާއިދަށް ގެނައި އިސްލާހުގައި ވަނީ ބުނެފައެވެ.
