މާފުށީ ޖަލު ހުންނަ ސަރަހައްދުގައި މޫދު ކުޅިވަރު ކުޅުން މަނާކޮށްފި

މާފުށީ ޖަލު ސަރަހައްދުގައި މޫދު ކުޅިވަރުތައް ނުކުޅުމަށް އެ ރަށު ކައުންސިލުން އަންގައިފިއެވެ.

އާދީއްތަ ދުވަހު އެ ރަށު ކައުންސިލުން ކުރި އިއުލާނެއްގައި ވަނީ، ޖަލު ހިމެނޭ ސަރަހައްދު މަތިން ޕެރެސައިލިން ކުރުމާއި ޑްރޯން އެރުވުމާއި ޖަލުގެ މޫދުގެ އައްސޭރިފަށާ ކައިރިން ޖެޓްސްކީފަދަ ވޯޓަރ ސްޕޯޓްސްގެ އުޅަނދުތައް ދުއްވާކަމުގެ ޝަކުވާ ލިބެމުންދާ ކަމަށެވެ. އަދި އެ ސަރަހައްދަކީ ޚާއްސަ ހުއްދައާއެކު ވަދެވޭ ތަނަކަށްވާއިރު، ގައިދީންނާއި ބަންދު މީހުންގެ އިތުރުން، ޖަލުގައި ހިންގާ ހަރަކާތްތައް ފެންނަން ނުޖެހޭ މީހުންނަށް ފެނުމުގެ ފުރުސަތު އެބައޮތްކަން އެ ކައުންސިލުން ވަނީ ފާހަގަކޮށްފައެވެ.

އޭގެ އިތުރުން، ހުއްދަ ނެތި ޖަލު ހިމެނޭ ސަރަހައްދުގެ ފޮޓޯ ނެގުމާއި ވީޑިއޯކޮށް ސޯޝަލް މީޑިއާގައި އާއްމުކުރުމުގެ ފުރުސަތު އެބައޮތްކަމަށާއި، ޖަލަށް ވެއްދުން މަނާތަކެތި އުކުމުގެ، ނުވަތަ ވައްޓާލުމުގެ ނުވަތަ ޕޮޓް ކުރުމުގެ ފުރުސަތު އޮވެދާނެ ކަމަށާއި، އެއީ ޖަލުގެ ސަލާމަތާއި ރައްކާތެރިކަމަށް އަސަރުކޮށްފާނެ ކަމެއް ކަމަށް ކައުންސިލުން ބުނެއެވެ.

މާފުށީ ކައުންސިލުން ނެރުނު ބަޔާނާ އެއްގޮތަށް އަމަލުކުރަން ފަށާފައިވަނީ އާދީއްތަ ދުވަހުން ފެށިގެންނެވެ.