ދަ ގްރާންޑޭ އަތުން ފުރިހަމަ މޮޅެއް ހޯދައިގެން، ޓީސީ ތާވަލުގެ ހަތަރުވަނަ އަށް ޖެހިލައިފި
14 މާރިޗު 2022 | ހޯމަ 14:57މިރޭގެ މެޗުން ޔޫވީ މޮޅުވެއްޖެނަމަ ޓީސީ ފަސްވަނަޔަށް ވެއްޓޭނެ
ލަނޑުޖެހުމަށްފަހު ޓީސީ ކުޅުންތެރިން
ލީގު ތާވަލްގެ ފުލުގައި އޮތް ދަ ގްރާންޑޭ އަތުން ފުރިހަމަ މޮޅެއް ހޯދައިގެން ޓީސީ އިން ދިވެހި ޕްރިމިއަރ ލީގު ތާވަލްގެ ހަތަރުވަނައަށް ޖެހިލައިފިއެވެ. ޓީސީ ހަތަރުވަނައަށް ޖެހިލީ ހަ މެޗުން 9 ޕޮއިންޔް ހޯދައިގެންނެވެ. އެކަމަކު މިރޭ ސަސް ބަލިކޮށްގެން އަލުން ހަތަރަކަށް ޖެހިލުމުގެ ފުރުޞަތު ޔުނައިޓެޑް ވިކްޓްރީއަށް ވެސް އޮންނާނެއެވެ.
މިއަދު ދަ ގްރާންޑޭގެ މައްޗަށް ޓީސީން ކުރި ހޯދީ 4-0 ނެވެ. މެޗުގައި ޓީސީގެ ހަތަރު ލަނޑުގެ ތެރެއިން ދެ ލަނޑު ޖެހީ މުޙައްމަދު މުސްލިހުއެވެ. ޓީސީގެ ފުރަތަމަ ލަނޑު ފުރަތަމަ ހާފްގައި ޖެހީ ބިދޭސީ ކުޅުންތެރިޔާ މުޙައްމަދު ސަލާހުއެވެ. ދެވަނަ ހާފް ފަށައިގެން ފުރަތަމަ ދެ ލަނޑު ޖެހީ މުސްލިހުއެވެ. ފަހު ލަނޑު ޖެހީ މެޗުގެ މޮޅު ކުޅުންތެރިޔާ މުޙައްމަދު އަޖުފާންއެވެ. މިއީ ޓީސީން ލީގުގައި ވިދިވިދިގެން ހޯދި ދެވަނަ މޮޅެވެ.
ލީގުގައި މިހަފްތާގެ ފަހު މެޗުގައި މިރޭ ސަސްއާ ދެކޮޅަށް ނިކުންނައިރު ޓީސީ އޮތީ 7 ޕޮއިންޓާއެކުއެވެ. ސަސް އޮތީ 3 ޕޮއިންޓާއެކުއެވެ.
