ނީލަން މުދާ ވިއްކާ ސަރަހައްދުން 67 ޓަނުގެ ކުނި އުކާލައިފި
މާލެ ސިޓީ ކައުންސިލާއި ފުލުހުންނާއި ގުޅިގެން އެސަރަހައްދު ސާފުކުރުމުގެ މަސައްކަތް ހޮނިހިރު ދުވަހު ކޮށްފައިވޭ
ނީލަން މުދާ ވިއްކާ ސަރަހައްދު
ނީލަން މުދާ ވިއްކަމުންދާ ސަރަހައްދުގައި މަގުމައްޗަށްވާ ގޮތަށް ހުރި މުދަލާއި ކުނިތަކުގެ ތެރެއިން 67 ޓަނުގެ ކުނި ނަގާ އުކާލާފައިވާކަމަށް މާލެ ސިޓީ ކައުންސިލުން ބުނެފިއެވެ.
ސިޓީ ކައުންސިލުން ބުނީ މާލެ ސިޓީ ކައުންސިލާއި ފުލުހުންނާއި ގުޅިގެން އެސަރަހައްދު ސާފުކުރުމުގެ މަސައްކަތް ހޮނިހިރު ދުވަހު ކޮށްފައިވާކަމަށެވެ. ސިޓީ ކައުންސިލުން ވަނީ އެސަރަހައްދުގެ މަގުމަތީގައި އެކި ފަރާތްތަކުން ބަހައްޓާފައިވާ ތަކެތި މިމަހުގެ 10 ވަނަ ދުވަހުގެ އިރުއޮއްސި 6 ގެ ކުރިން ނަގައި ފަޅުމަތީ މަގު ސާފުކުރުމަށް އަންގާފައެވެ.
ސިޓީ ކައުންސިލުން ވަނީ އެ ސަރަހައްދުގެ މަގުމަތީގައި މުދާ ބަހައްޓައިގެން ވިޔަފާރި ނުކުރުމަށް އަންގާފައެވެ. އަދި ނުނަގާ ހުރި ތަކެތި ކައުންސިލުން ނަގާ ކުނީގެ ގޮތުގައި ނައްތާލާނެކަމަށާއި އަދި އެތަކެތި ނެގުމުގައާއި ނެގުމަށްފަހު ތަކެއްޗަށް ލިބޭ ގެއްލުމާއި އުނިއިތުރަށް ކައުންސިލުން ޒިންމާ ނުވާނެކަމަށްވެސް ސިޓީ ކައުންސިލުން ކުރި އިއުލާންގައި ބުނެފައިވެއެވެ.
އެސަރަހައްދަކީ މީގެކުރިން ގިނަ އަދަދަކަށް އަލިފާނުގެ ހާދިސާތައް ހިނގާފައިވާ ސަރަަހައްދެކެވެ.
