ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި ނިޔާވި, މާލެ ސިޓީ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ވިލިމާލޭ ދާއިރާގެ މެމްބަރު އައިމިނަތު އީމާންއަށް ލިބެމުންދިޔަ އެލަވަންސް އާއިލާއަށް ދިނުމަށް އެދި ސަރުކާރަށް ހުށަހެޅުމަށް, މާލެ ސިޓީ ކައުންސިލުން ނިންމައިފިއެވެ.

މާލެ ސިޓީ ކައުންސިލްގެ 4 ވަނަ ދައުރުގެ 42 ވަނަ ޖަލްސާގައި ވިލިމާލެ ދާއިރާގެ ކައުންސިލަރު ނަހުލާ އަލީ ހުށަހަޅުއްވައި, ޑެޕިއުޓީ މޭޔަރު އަހުމަދު ނަރީޝް ތާއީދު ކުރެއްވި މި ހުށަހެޅުއްވުމުގައި ވަނީ, މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރުންނަށް ލިބެމުން ދިޔަ 5000 ރުފިޔާގެ އެލަވަންސް, 5 އަހަރުގެ ދައުރު ހަމަވަންދެން އީމާންގެ އާއިލާއަށް މެދުކެނޑުމެއްނެތި ދިނުމަށް ސަރުކާރަށް ހުށަހެޅުމަށެވެ.

ބުދަ ދުވަހު ކުރިއަށް ގެންދިޔަ ޖަލްސާގައި ބައިވެރިވެ ވަޑައިގަތް މެމްބަރުންގެ އިއްތިފާގުން މިހުށަހެޅުން ވަނީ ފާސްވެފައެވެ. ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި އީމާން ނިޔާވުމާއި ގުޅިގެން ޖަލްސާގައި ވަނީ 1 މިނެޓްގެ ސުކޫތެއް ގެނެސްފައެވެ.

ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި ފަރުވާ ހޯދަމުން ދަނިކޮށް އީމާން ނިޔާވެފައިވަނީ އަންގާރަ ދުވަހުގެ ހެނދުނު 7:42ހާއިރެވެ. އީމާން އެކްސިޑެންޓުވެފައިވަނީ ހުޅުމާލޭ ކުރެދިމާ ހިނގުމުގައެވެ.