ޕޯސްޓް މެދުވެރިކޮށް ރާއްޖެ ގެންނަ ޕެކޭޖްތައް ސްކޭން ކުރޭ: ކަސްޓަމްސް
ޕިކްޕޯޓްސް މެދުވެރިކޮށް ޕާޓީ ޑްރަގްސް ރާއްޖެ އެތެރެ ކުރޭ
ޕޯޓްސް މެދުވެރިކޮށް ރާއްޖެއަށް އެތެރެ ކުރި ޕާޓީ ޑްރަގްސް
ޕޯސްޓް މެދުވެރިކޮށް ރާއްޖެ ގެންނަ ޕެކޭޖްތައް ސްކޭން ކުރާ ކަމަށް ކޮމިޝަނަރު ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވެއްޖެއެވެ.
ޕިކްޕޯޓްސް މެދުވެރިކޮށް ޕާޓީ ޑްރަގްސް ރާއްޖެ އެތެރެކުރާ ކަމަށާއި ސްކޭންކޮށް އެކަން ހުއްޓުވާނެ އެކަށީގެންވާ ނިޒާމެއް ނެތްކަމަށް ފުލުހުން ބުނުމާއި ގުޅިގެން ރާއްޖެއެމްވީން ސުވާލުކުރުމުން ޝަރީފް ވިދާޅުވީ ޕޯސްޓް އޮފީހުގައި ވެސް ސްކޭން މެޝިން ހުންނާނެ ކަމަށެވެ. މިހާރު ވެސް ގެންނަ ޕެކޭޖްތައް ސްކޭން ކުރާ ކަމަށާއި ބައެއް ފަހަރު ކޮލެޓީ ދަށް މެޝިންތަކުން ސްކޭން ކުރާއިރު އެއީ ކޯއްޗެއްކަން ހުރި ޕެކޭޖެއްކަން ނޭނގިދާނެ ކަމަށް ވެސް އޭނާ ވިދާޅުވިއެވެ.
ޓްރެކް ނުކުރެވޭނެ ހުރިހާ ގޮތެއް ބަލައި ރާއްޖޭގައި ތިބެ އެކި ސައިޓުތަކުން އޯޑަރުކޮށްގެން ޕިކްޕޯސްޓަށް ގެންނަނީ ހުސް ފޮށިތަކެކެވެ. އެގޮތަށް ފޮނުވާ ފޮށިތަކުގެ ތެރެއިން ފޮއްޓެއް ފުލުހުން ނޫސްވެރިންގެ ކުރިމަތީގައި ކެނޑިއިރު އެތެރޭގައި އެއްވެސް އެއްޗެއް ފެންނާކަށް ނެތެވެ. އެކަމަކު ފޮށީގެ އަރިމަތިން ކަފާލިއިރު ފޮށި ވަށައިގެން ހުރީ ބޭސްގުޅަތަކެކެވެ.
ޝަރީފް އިތުރަށް ވިދާޅުވީ މިހާރު ވެސް ޝައްކު ކުރެވޭ ޕެކޭޖުތައް ބަހައްޓާފައިވާ ކަމަށާއި އެންމެ ގިނައިން މަސްތުވާތަކެތި އަތުލައިގެންފައިވަނީ ޕޯސްޓުގެ މަގުން ކަމަށެވެ. އެއްވެސް ޕެކޭޖަކީ ސްކޭން ނުކޮށް ދޫކޮށްލެވޭ ޕެކޭޖެއް ނޫން ކަަމަށް ޝަރީފް ވިދާޅުވިއެވެ. މިހާރު ވެސް ދުވާލެއްގެ މައްޗަށް 4،000 ވަރަކަށް ޕޯސްޓަލް ޕެކޭޖް ރާއްޖެ އެތެރެކުރާ ކަމަށް ޝަރީފް ވިދާޅުވިއެވެ.
ޑްރަގް އޮޕަރޭޝަންތަކުގެ މައުލޫމާތު މީޑިއާތަކަށް ހިއްސާ ކުރުމަށް ފުލުހުން ކުރިއަށް ގެންދިޔަ މީޑިއާ އިވެންޓުގައި ފުލުހުން އާންމު ކުރި ތަފާސްހިސާބުތަކަށް ބަލާއިރު މާލޭގައި ހިންގާ ޑްރަގް ކެފޭތަކުން 1،118 މީހުން މަސްތުވާތަކެތި ބޭނުންކުރެއެވެ. އޭގެތެރެއިން 65 އަންހެނުންނާއި 50 އަހަރުން މަތީގެ 56 މީހުން ކެފޭތަކުން ހިދުމަތް ހޯދައެވެ. މަސްތުވާތަކެތީގެ މައްސަލަތަކުގައި 2015 ވަނަ އަހަރުން 2021 ވަނަ އަހަރަށް 146 ބިދޭސީން ހިމެނޭއިރު ބަނގުރަލުގެ ވިޔަފާރީގައި 525 ބިދޭސީން ހިމެނެއެވެ.
މީގެއިތުރުން 2019 ވަނަ އަހަރު 518 ކިލޯގެ މަސްތުވާތަކެތި ފުލުހުން އަތުލައިގަތްއިރު 2020 ވަނަ އަހަރު 384 ކިލޯގެ މަސްތުވާތަކެތި ވަނީ އަތުލައިގެންފައެވެ. އަދި 2021 ވަނަ އަހަރު 487 ކިލޯގެ މަސްތުވާތަކެތި އަތުލައިގަތެވެ.
މަސްތުވާތަކެތީގެ މައްސަލަ ހައްލު ކުރުމަށް ފުލުހުން މަސައްކަތް ކުރަމުންދާއިރު ގާނޫނަށް ގެންނަން ޖެހޭ ބަދަލުތަކެއް ވެސް ހުރި ކަމަށް ފުލުހުން ވަނީ ބުނެފައެވެ.
