މާލޭގައި އިންދަން 500 ގަސް ހޯދަނީ
21 ފެބުރުއަރީ 2022 | ހޯމަ 07:28މާލެ ސިޓީ ކައުންސިލުން ބުނީ 180 ކަދުރު ރުއް އަދި 320 އެހެނިހެން މޭވާ އަޅާ ގަސް އިންދަން ބޭނުންވާކަމަށް
މާލެ ސިޓީގައި އެއްލައްކަ ގަސް އިންދުމުގެ ޕްރޮގްރާމްގެ ތެރެއިން
މާލެ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމެނޭ "1 ލައްކަ ގަސް" ޕްރޮގްރާމްގެ ދަށުން މޭވާ އަޅާ 500 ގަސް ހޯދަން ބޭނުންވާތީ މި މަސައްކަތަށް ބީލަން ހުށަހެޅުމުގެ ފުރުސަތު ހުޅުވާލައިފިއެވެ.
އެކަމާއި ގުޅިގެން މާލެ ސިޓީ ކައުންސިލުން ބުނީ 180 ކަދުރު ރުއް އަދި 320 އެހެނިހެން މޭވާ އަޅާ ގަސް އިންދަން ބޭނުންވާކަމަށެވެ. މިކަން ކުރުމަށް މައުލޫމާތު ސާފުކުރުން އޮންނަނީ 23 ފެބްރުއަރީގައެވެ. އަގު ހުށަހެޅުން އޮންނާނީ 28 ފެބްރުއަރީ ގައެވެ.
ސިޓީ ކައުންސިލުން ބުނީ އަގު ހުށަހެޅުމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމަންޓް، އަދި ވިޔަފާރި ކުރުމުގެ ހުއްދަ ލިބިފައިވާ ފަރާތްތަކަށް ކަމަށެވެ.
ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމެނިފައިވާ 100،000 ގަސް އިންދުމުގެ ޕްރޮގްރާމުގެ ދަށުން މަގުތަކާއި ޕާކުތަކުގައި މުޅި އަހަރަށް ބަލާއިގެން އެކި ދުވަސްތަކުގެ މަތިން ގަސްތައް އިންދަން ރާވާފައިވެއެވެ. އަދި މިހާރު މާލޭގައި އިންދާފައި ހުރި ގަސްތަކުގެ ތެރެއިން ނުހެދި ނުވަތަ މަރުވެފައި ހުރި ގަސްތައް ނެގުމަށް ފަހު އެ ތަންތަނުގައި ވެސް އައު ގަސްތައް އިންދުމަވެސް ވަނީ ހަމަޖެހިފައެވެ.
