މާލޭގެ މިސްކިތްތަކުގައި ސީސީޓީވީ ކެމެރާ ހަރުކުރުމަށް 3 ބަޔަކާ ހަވާލުކޮށްފި
12 ފެބުރުއަރީ 2022 | ހޮނިހިރު 03:02މަޝްރޫޢު ނިމޭއިރު ހުރިހާ މިސްކިތްތަކެއްގައި ހުންނާނީ ހުރިހާ ދިމާލަކުން ކަވަރ ވާގޮތަށް ކެމެރާ ހަރުކުރެވިފައި
މާލެ ސިޓީގައި ސީސީޓީވީ ކެމެރާ ހަރުކުމުގެ މަސައްކަތް އަންނަނީ ކުރަމުން
މާލެ ސިޓީގައި ހުރި މިސްކިތްތަކުގައި ކެމެރާ ހަރުކުރުމަށް ސިޓީ ކައުންސިލުން ކުރަމުންދާ މަސައްކަތުގެ ދަށުން ކެމެރާ ހަރުކުރުމުގެ މަސައްކަތް ކުރުމަށް 3 ބަޔަކާ ހަވާލުކޮށްފައިވާ ކަމަށް މާލެ ސިޓީގެ މޭޔަރ ޑރ މުހައްމަދު މުއިއްޒު ވިދާޅުވެއްޖެއެވެ.
މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ އެމަޝްރޫޢުގެ އެކި ކޮމްޕޮނެންޓްސްތައް ކުރިޔަށް ގެންދިޔުމަށް ތިން ޕާޓީއަކާއި ހަވާލުކޮށްފައިވާކަމަށެވެ. އުންމީދުކުރައްވަނީ ރަމަޟާން މަސް ފެށެންވާއިރަށް މިމަޝްރޫޢު ނިމުމަކާއި ހިސާބަށް ގެނައުން ކަމަށް މުއިއްޒު ވިދާޅުވިއެވެ. އަދި މަޝްރޫޢު ނިމޭއިރު ހުރިހާ މިސްކިތްތަކެއް ހުންނާނީ ހުރިހާ ދިމާލަކުން ކަވަރ ވާގޮތަށް ކެމެރާ ހަރުކުރެވިފައިކަމަށް މުއިއްޒު ވިދާޅުވިއެވެ.
މާލޭގެ 42 މިސްކިތެއް ބެލެހެއްޓުމުގެ މަސައްކަތް ކުރަމުން އަންނަނީ ސިޓީ ކައުންސިލުންނެވެ. މާލެ ސިޓީގެ މިސްކިތްތަކުގެ އާބާތުރަ ރަމަޟާން މަހަށް ފިލުވުމުގެ މަސައްކަތްވެސް ސިޓީ ކައުންސިލުން އަންނަނީ ކުރަމުންނެވެ.
މާލެ ސިޓީގައި ސީސީޓީވީ ކެމެރާ ހަރުކުރުމަށް ހުޅުވާލީ ނޮވެމްބަރ މަހުއެވެ.
މާލޭގެ މިސްކިތްތަކުގައި ކެމެރާ ހަރުކުރުމަށް ނިންމާފައިވަނީ މިސްކިތުގެ ހުރުމަތް ކެނޑޭފަދަ ޢަމަލުތައް ހިންގަމުންދާކަން ފާހަގަކުރެވޭތީ އާއި އަދި މިސްކިތުގައި ހުންނަ ސަމާނު ވަގަށްނެގުންފަދަ ކަންކަން ބައެއް މީހުން ކުރަމުންދާތީއެވެ.
