ޑަބްލިޔުޑީސީގެ މެމްބަރުންނަށް އަދިވެސް މުސާރަ ޖަމާނުވޭ
އެންމެ މަހެއް ފިޔަވައި ހުރިހާ މަސްތަކެއްގައި މުސާރަ ޖަމާވަނީ ކޮންމެ މަހެއްގެ 15ގެ ފަހުން
ޑަބްލިޔުޑީސީގެ މެމްބަރުން މައްޗަންގޮޅީގައި ހުންނަ މާލެސިޓީ ކައުންސިލްގެ އޮފީސް ކައިރީގައި މަޑުކޮށްގެން
އަންހެނުންގެ ތަރައްގީއަށް މަސައްކަތް ކުރާ ކޮމެޓީ (ޑަބްލިޔުޑީސީ)ގެ މެމްބަރުންނަށް މުސާރަ ޖަމާނުވާ މައްސަލަ ފެންމަތިވެއްޖެއެވެ.
އާދިއްތަ ދުވަހު ޑަބްލިޔުޑީސީގެ ބައްދަލުވުމެއް ކުރިއަށް ދަނިކޮށް މައްޗަންގޮޅީގައި ހުންނަ މާލެ ސިޓީ ކައުންސިލްގެ އޮފީސް ބަންދުކުރި މައްސަލައާ ގުޅިގެން ވާހަކަދައްކަވަމުން ގަލޮޅު ހުޅަނގު ދާއިރާގެ ޑަބްލިޔުޑީސީގެ މެމްބަރު އައިމިނަތު އަބްދުލްގައްޔޫމް ވިދާޅުވީ, މަސައްކަތް ކުރަމުންދަނީ ވަރަށް ގިނަ ފުރައްސާރައާއެކު ކަމަށެވެ. ނަމަވެސް ރައްޔިތުންނަށް ދެމުންދާ ޚިދުމަތަކަށްވާތީ މަސައްކަތް ހުއްޓާނުލައި ކުރިއަށް ގެންދާ ކަމަށް އޭނާ ވިދާޅުވިއެވެ.
މުސާރަ ޖަމާނުވާކަން ފާހަގަކުރައްވައި އައިމިނަތު ވިދާޅުވީ, މިހާތަނަށް އެންމެ މަހެއް ފިޔަވައި ހުރިހާ މަސްތަކެއްގައި މުސާރަ ޖަމާވަނީ ކޮންމެ މަހެއްގެ 15ގެ ފަހުން ކަމަށެވެ. އެހެންވުމުންވެސް ގިނަ ދަތިތައް ކުރިމަތިވާ ކަމަށް އޭނާ ވިދާޅުވިއެވެ.
މީގެ އިތުރުން މާފަންނު ހުޅަނގު އުތުރު ދާއިރާގެ ޑަބްލިޔުޑީސީ މެމްބަރު މަރިޔަމް ޝިމާޒާ ވިދާޅުވީ, ކަންބޮޑުވުންތަކާއެކު ލޯކަލް ގަވަމަންޓް އޮތޯރިޓީ (އެލްޖީއޭ)އަށް ސިޓީއެއް ހުށަހަޅާފައިވާ ކަމަށާއި، އެސިޓީއަށް ޖަވާބުދާރީވުމަށް މާލެސިޓީ ކައުންސިލަށް އަންގާފައިވާ ކަމަށެވެ. އާދިއްތަ ދުވަހުގެ ވަގުތެއްގައި ބައްދަލުވުމެއް ކުރިއަށް ދަނިކޮށް އޮފީސް ބަންދުކުރުމުން އެސިޓީގެ ޖަވާބު ވެސް އެލްޖީއޭއަށް ލިބިފައިވާ ކަމަށް ގަބޫލުކުރާ ކަމަށް އޭނާ ވިދާޅުވިއެވެ.
ރާއްޖެއެމްވީއަށް މުސާރަ ޖަމާނުވާ މައްސަލައާ ގުޅިގެން މާލެސިޓީ ކައުންސިލުން ބުނީ ކޮންމެ މަހެއްގައި ޑަބްލިޔުޑީސީ މެމްބަރުންގެ 4 ބައްދަލުވުން ބާއްވަން ޖެހޭ ކަމަށާއި، މުސާރަ ފޮނުވަނީ އެއްބައްދަވުންތައް ބާއްވާ ނިމުމުން ކަމަށެވެ. އަދި ބައެއް ފަހަރު މަހެއްގެ މައްޗަށް 3 ބައްދަލުވުން ވެސް ބާއްވާ ކަމަށް ކައުންސިލުން ބުނެއެވެ. ކައުންސިލުން ބުނީ މަހެއް 25 ވަނަ ދުވަހު 4 ވަނަ ބައްދަލުވުން ކުރިއަށް ގެންގޮސްފިނަމަ އަވަހަށް މުސާރަ ޝީޓް ހެދުމަށްފަހު ފޮނުވާ ކަމަށެވެ. އަދި މި މިމަހުގެ މުސާރަ ވެސް ނިންމުމަށްފަހު ފިނޭންސް މިނިސްޓްރީއަށް ޝީޓް ފޮނުވާފައިވާ ކަމަށެވެ.
