އަންހެނުންގެ ތަރައްގީއަށް މަސައްކަތް ކުރާ ކޮމެޓީ (ޑަބްލިޔުޑީސީ)ގެ ބައްދަލުވުމެއް ކުރިއަށް ދަނިކޮށް މައްޗަންގޮޅީގައި ހުންނަ މާލެ ސިޓީ ކައުންސިލްގެ އޮފީސް ބަންދުކުރި މައްސަލައެއް ފެންމަތިވެއްޖެއެވެ.
ރާއްޖެއެމްވީއަށް ޑަބްލިޔުޑީސީގެ ރައީސް ރައީސް ފާތުފަތު ޝިފާ ވިދާޅުވީ, ބައްދަލުވުންތައް ކުރިއަށް ގެންދަނީ މާލެސިޓީ ކައުންސިލްއަށް ރަސްމީކޮށް އެންގުމަށްފަހު ކަމަށެވެ. އެގޮތުން އާދިއްތަ ދުވަހު 1:30ގައި ރަސްމީ ބައްދަލުވުން ކުރިއަށް ގެންގޮސްފައިވާ ކަމަށާއި، 2:00ގައި ނުރަސްމީ ބައްދަލުވުމެއް ކުރިއަށް ގެންގޮސްފައިވާ ކަމަށެވެ. ބައްދަލުވުމަށް މައްޗަންގޮޅީ މާލެ އޮފީހަށް ދިޔައިރު ވެސް މުވައްޒަފުން ތިބި ކަމަށް އޭނާ ވިދާޅުވިއެވެ.
ޝިފާ ވިދާޅުވީ ބައްދަލުވުން ނިންމައި 3:10ހާއިރު މީޓިން ރޫމުން ނުކުތްއިިރު އޮފީސް ބަންދުކޮށްފައިވާ ކަމަށާއި، ނުކުމެވޭނެ އެއްވެސް ގޮތެއް ނެތް ކަމަށެވެ. އަދި އެވަގުތުން ފެށިގެން މާލެސިޓީ ކައުންސިލްގެ އެކި ބޭފުޅުންނަށް ގުޅި ކަމަށާއި، އޮފީސް ހުޅުވާފައިވަނީ އޭގެ ގާތްގަނޑަކަށް 45 މިނެޓް ފަހުން ކަމަށް ޝިފާ ވިދާޅުވިއެވެ.
އާއްމު ގޮތެއްގައި ނުރަސްމީ ޖަލްސާ މިއޮންނަނީ މައްޗަންގޮޅި އޮފީހުގަ. މިއަދު ޖަލްސާގައި ފެށި ވަރަށް ގިނަ މުވައްޒަފުން ތިބި އޮފީސް ތިރީގަ. ޖަލްސާ ނިންމާފައި ތިރިއަށް ފައިބަން ނުކުންނަން ބެލިއިރުގައި ދެ ދޮރު ވެސް ހުރީ ތަޅުލާފައި. ގާތްގަނޑަކަށް 3:10ގައި އެތަނުން ނުކުންނަން މިފޭބީ. ފޭބީއްސުރެ އެތާގައި ނުނިކުމެވި މަޑުކުރަން މިޖެހުނީ ގާތްގަނޑަކަށް 45 މިނެޓް އެތަނުގައި އެތެރޭގައި. މިއީ އަސްލު އަންހެނުން ތަރައްގީއަށް މަސައްކަތް ކުރަން ތިބި ޑަބްޑިޔުޑީސީ މެމްބަރުގެ ހާލަތަކީ. މިދަނީ ވަރަށް ގިނަ ފުރައްސާރައާއި މާލާމާތާއި ގޮންޖެހުންތަކާއި ކުރިމަތިލަމުން. މިއަދު ދިމާވި ކަންކަން ހަރުކަށި އިބާރާތުން ކުށްވެރިކުރަން.ޑަބްލިޔުޑީސީގެ ރައީސް ރައީސް ފާތިފަތު ޝިފާ![]()
މަސައްކަތްތައް ކުރިއަށް ގެންދިއުމަށް ވަރަށް ދަތިވާކަން ފާހަގަކުރައްވައި ޑަބްލިޔުޑީސީގެ މެމްބަރުން ވިދާޅުވީ, މަސައްކަތް ކުރުމަށް ވަކި އޮފީހެއް ނެތުމަކީ ވަރަށް ބޮޑު ގޮންޖެހުމެއް ކަމަށެވެ. އަދި މަސައްކަތްތައް ކުރުމަށް ތަނެއް ވެސް ލިބެނީ ގިނަ ފަހަރަށް ކައުންސިލްގެ ބޭފުޅުން ގާތު އާދޭސްކޮށްގެން ކަމަށެވެ. ގާނޫނުގައި ސިޓީ ކައުންސިލުން 18 ޑަބްލިޔުޑީސީގެ މެމްބަރުންނާ ބައްދަލުކުރަން ޖެހޭ ކަމަށް އޮތް ނަމަވެސް ފާއިތުވި 9 މަސް ދުވަހުގެ ތެރޭގައި އެއްވެސް ބައްދަލުވުމެއް ބާއްވާފައިނުވާ ކަމަށް މެމްބަރުން ވިދާޅުވިއެވެ.
މެމްބަރުން ވިދާޅުވީ މާލެސިޓީ ކައުންސިލުން ޑަބްލިޔުޑީސީގެ މެމްބަރުންނަށް އުނދަގޫތައް ކުރިމަތިކުރުވަނީ ސިޔާސީ ގޮތުން އޮންނަ ހިތްހަމަ ނުޖެހުމެއްގެ ސަބަބުން ކަމަށެވެ. އަދި ކައުންސިލުންގެ އެއްބާރުލުން ނުލިބުނު ނަމަވެސް ރައްޔިތުންގެ އެންމެހައި ކަންކަމުގައި ޑަބްލިޔުޑީސީގެ މެމްބަރުން މަސައްކަތް ކުރާނެ ކަމަށާއި، މިއަހަރު ތަފާތު ދައްކާނެ ކަމަށެވެ. މާލެސިޓީގެ މޭޔަރ ޑރ. މުހައްމަދު މުއިއްޒަށް ނިސްބަތްކުރައްވައި މެމްބަރުން ވިދާޅުވީ, ސަރުކާރުން އެއްބާރުލުން ނުދެއްވާ ކަމަށް އެބޭފުޅާ ވިދާޅުވި ނަމަވެސް އެކަމަކީ ގަބޫލުކުރެވޭ ކަމެއް ނޫން ކަމަށާއި، ކައުންސިލްގެ ދަށުން މަސައްކަތް ކުރާ ބަޔަކަށް އެއްބާރުލުން ނުދެވޭ ކަމަށެވެ.
މިމައްސަލައާ ގުޅިގެން މާލެސިޓީ ކައުންސިލުން ބުނީ މައްޗަންގޯޅީގައި ހުންނަ މާލެސިޓީ ކައުންސިލްގެ އޮފީސް ބަންދުކުރީ ގަސްތުގައި ނޫން ކަމަށާއި، ނުރަސްމީ ބައްދަލުވުމެއް ކުރިއަށް ގެންދާކަން އަންގާފައިނުވާ ކަމަށެވެ. އަދި މީގެ ކުރިން ވެސް އެއޮފީހުގައި ނުރައްމީ ބައްދަލުވުންތައް ކުރިއަށް ގެންދާ ކަމަށާއި، އެކަން އެޗްއާރަށް އެންގުމުން އެފުރުސަތު ދޭ ކަމަށް ކައުންސިލުން ބުނެއެވެ. އާއްމު ގޮތެއްގައި މެންދުރުފަހު 2:00ގައި އެއޮފީސް ބަންދު ކުރާ ކަމަށް ކައުންސިލުން ބުނެއެވެ.