މާލެހިޔާ ފްލެޓްތަކުގެ ފުރަގަހުގައި ހުޅުވި ފްލޫ ކްލިނިކް ހިންގި އިމާރާތާ މާލެ ސިޓީ ކައުންސިލާ ގުޅުމެއް ނެތް: މޭޔަރު
އެއީ ޔޫތު މިނިސްޓްރީގެ ބިމެއް
މާލެހިޔާ ފްލެޓްތަކުގެ ފުރަގަހުގައި ހުޅުވި ފްލޫ ކްލިނިކް ހިންގި އިމާރާތް
މާލެހިޔާ ފްލެޓްތަކުގެ ފުރަގަހުގައި ހުޅުވި ފްލޫ ކްލިނިކް ހިންގި އިމާރާތާ މާލޭ ސިޓީ ކައުންސިލާ އެއްވެސް ގުޅުމެއް ނެތް ކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
އެބިމުގެ މިލްކުވެރި ފަރާތަކާމެދު ސުވާލު ކުރުމުން މޭޔަރު މުއިއްޒު ވިދާޅުވީ, އެއީ ސިޓީ ކައުންސިލާ އެއްވެސް ގުޅުމެއް އޮތް ތަނެއް ނޫން ކަމަށާއި، ތަނަކީ މި ސަރުކާރުން ޔޫތު މިނިސްޓްރީއަށް ދީފައިވާ ތަނެއް ކަމަށެވެ.
އެ އިމާރާތުގައި ހުކުރު ދުވަހުގެ މެންދުރުފަހު 2:30 ހާއިރު އަލިފާން ރޯވެ ބޮޑެތި ގެއްލުންތަކެއް ލިބިފައިވެއެވެ. މިއަދާ ހަމައަށް އެތަނުގައި ރަލާއި އެނޫންވެސް މަސްތުވާތަކެތި ބޭނުންކުރަމުން އައި ކަމަށާއި, އެކަމުގައި އުޅޭ މީހުން ނިދައި ދިރިއުޅެމުން އައީވެސް އެތަނުގައި ކަމަށް ބައެއް އާއްމުން ބުނެއެވެ. އެސަރަހައްދުގައި ދިރިއުޅޭ ބައެއް އާއްމުން ބުނާ ގޮތުގައި އެއިމާރާތުގެ ކުނި ވަސް މުޅި ސަރަހައްދަށް ދުވައެވެ. އަދި އުދަނގޫ ވަރަށް ބޮޑަށް ފޯރާ ކަމަށެވެ.
ރާއްޖެއެމްވީ އެތަނަގަށް ގޮސް ބެލިއިރު، އެތަނުގައި ބައެއް ޒުވާނުން ނިދާފައި ތިއްބެއެވެ. މީގެ އިތުރުން ކެއުމަށް ބޭނުންކުރާ އެކިބާވަތުގެ ކާ ތަކެތި ކުނިކޮށްފައި އެތާގައި ބަހައްޓާފައި ހުއްޓެވެ. އެއިމާރާތުގައި ފާރުތަކުގައި ވަނީ ބޭއަދަބީ ބަސްތައް ވެސް ލިޔެފައެވެ. އަދި އިމާރާތުގައި ހުރި ފާޚާނާ ވެސް ވަނީ ބޭނުން ނުކުރެވޭ މިންވަރަށް ހަލާކުކޮށްލާފައެވެ. ގިނަ އަދަދަކަށް އިމާރާތުގެ ކުނި ހުރިއިރު، މަސްތުވާތަކެތި ބޭނުންކުރާ ކަމަށް ތުހުމަތު ކުރެވޭ ޒުވާނުންތަކެއް އެތަނުގައި ދަނީ ދިރިއުޅެމުންނެވެ. ދެ ފަންގިފިލާއަށް ހަދާފައި ހުރި އެއިމާރާތުގައި ގިނަ އަދަދެއްގެ ގޮދަޑިވެސް އަޅާފައި ހުއްޓެއެވެ.
