ޓީޖެޓީއާއި ނޯތު ހާބަރުގެ އާމްދަނީ ބަހާނީ އެއްބަސްވުމަކަށް އައިސް އިކޮނޮމިކް ކައުންސިލުން ފާސްކުރުމުން – އެމްޕީއެލް
ސިޓީ ކައުންސިލުން ވަނީ ލިޔުމުން ހުށަހަޅަން އެމްޕީއެލްއަށް އަންގާފައި
ޓީ ޖެޓީއާއި ނޯތް ހާބަރުގެ މައްސަލައިގައި ސިޓީ ކައުންސިލާއި އެމްޕީއެލްއާއި ދެމެދު މަޝްވަރާކުރުމަށް ބޭއްވި ބައްދަލުވުން
މާލޭގެ ޓީޖެޓީ އާއި ނޯތު ހާބަރުން ލިބޭ އާމްދަނީގެ އެއްބައި މާލޭ ސިޓީ ކައުންސިލަށް ދޭން ރައީސް އޮފީހުން އެމްޕީއެލްއަށް އެންގުމާއި ގުޅިގެން އެކަމުގެ މަޝްވަރާތައް ފަށާފައިވާ ކަމަށާއި، އެއަށް ގޮތެއް ނިންމާނީ މަޝްވަރާއަށްފަހު ކަމަށް އެމްޕީއެލްއިން ބުނެފިއެވެ.
ދެ ބަނދަރުން ލިބޭ އާމްދަނީ އާއި ގުޅޭ ގޮތުން، ރާއްޖެއެމްވީއަށް މައުލޫމާތު ދެއްވަމުން އެމްޕީއެލްގެ ސީއޯއޯ ޝާހިދު ހުސައިން މޫސާ ވިދާޅުވީ، ރައީސް އޮފީހުގެ އެންގެވުމާއެއް ގޮތަށް ސިޓީ ކައުންސިލާއި މިކަމާއި ގުޅިގެން މަޝްވަރާ ކޮށްފައިވާ ކަމަށެވެ. އަދި ދެ ބަނދަރުން ލިބޭ އާމްދަނީ ބަހާނެ ގޮތަކާމެދު މަޝްވަރާ ކޮށްފައިވާއިރު، ސިޓީ ކައުންސިލްގެ އެދުމުގެ މަތިން ލިޔެ ކިޔުންތައް އެ ކައުންސިލަށް ފޮނުވާނެ ކަމަށެވެ.
ޝާހިދު ވިދާޅުވީ ދެ ފަރާތުގެ މަޝްވަރާއަށްފަހު، ނިންމާ ނިންމުންތައް އިކޮނަމިކް ކައުންސިލަށް ހުށަހެޅިގެންދާނެ ކަމަށެވެ. އަދި އެކަމުގައި ގޮތެއް ނިންމާނީ އިކޮނަމިކް ކައުންސިލުން ކަމަށެވެ.
ޝާހިދު ވިދާޅުވީ އެމްޕީއެލްގެ ބެލުމުގެ ދަށުން ބަލަހައްޓަމުން އަންނަ ނޯތު ހާބަރަކީ މާބޮޑު ފައިދާއެއް ލިބޭ ތަނެއް ނޫން ކަމަށާއި، އެތަނަކީ ރަށްރަށުން އަންނަ އުޅަނދުފަހަރަށް ޚިދުމަތްދޭ ތަނެއް ކަމަށެވެ. އަދި އެތަނަށް ކުރަން ޖެހޭ ޚަރަދުވެސް ބޮޑު ކަމަށާއި، އެމްޕީއެލްއިން އެތަން ބަލަހައްޓަނީ އެ ކުންފުންޏާއި އެތަން ހަވާލުކޮށްފައި އޮތުމުން ކަމަށެވެ.
ނަމަވެސް ޓީ ޖެޓީން ކޮންމެވެސް ވަރެއްގެ ފައިދާއެއް ލިބެމުންދާ ކަމަށާއި، ދައުލަތުގެ ބިމަކުން ލިބޭ ފައިދާއަކީ ދައުލަތުގެ އާމްދަނީގެ ތެރެއަށް ވަންނަ އެއްޗެއް ކަމަށެވެ.
ސިޓީ ކައުންސިލުން ބުނީ މާލޭ ނޯތު ހާބަރާއި، ޓީ ޖެޓީ އޮޕަރޭޓް ކުރުމާއި ގުޅޭގޮތުން ރައީސް އޮފީހުގެ އެންގެވުމާއި އެއްގޮތަށް އެމްޕީއެލްއިން މާލެ ސިޓީ ކައުންސިލާއެކު މަޝްވަރާކޮށްފައިވާ ކަމަށެވެ. އިތުރު ތަފްސީލެއް ނުދެއެވެ.
މާލޭގެ ޓީޖެޓީ އާއި ނޯތު ހާބަރުން ލިބޭ އާމްދަނީގެ އެއްބައި މާލޭ ސިޓީ ކައުންސިލަށް ދޭން ރައީސް އޮފީހުން އެމްޕީއެލްއަށް އަންގައި ސިޓީ ފޮނުވާފައިވަނީ ބުދަ ދުވަހުއެވެ. ދެ ބަނދަރުން ލިބޭ އާމްދަނީގެ އެއްބައި ސިޓީ ކައުންސިލަށް ދޭން އަންގައި ރައީސް އޮފީހުން ފޮނުވި ސިޓީއެއް ލިބިފައިވާ ކަމަށާއި އެއާ ގުޅިގެން ކުރަންޖެހޭ ކަންކަން މިހާރު ކުރަމުން އަންނަ ކަމަށް އެމްޕީއެލްއިން ބުނެއެވެ.
ރައީސް އޮފީހުން މިގޮތަށް އަންގައި އެމްޕީއެލްއަށް ސިޓީ ފޮނުވާފައިމިވަނީ، ޓީޖެޓީ ކައުންސިލާ ހަވާލުކުރަން އެމްޕީއެލްއިން ދެކޮޅު ހަދާފައިވަނިކޮށެވެ. އެކަމާ ގުޅިގެން ކޯޓަށް މައްސަލަ ހުށަހަޅާނެ ކަމަށް ބުނެ ފާއިތުވި ހަފުތާގައި ސިޓީ ކައުންސިލުން ވަނީ އެމްޕީއެލްއަށް އިންޒާރުވެސް ދީފައެވެ. ކައުންސިލުން ބުނެފައިވަނީ ޓީޖެޓީ ބެލެހެއްޓުމަށް ސަރުކާރުން އެމްޕީއެލާއެކު ހަދާފައިވާ އެއްބަސްވުމުގެ މުއްދަތު ހަމަވި ފަހުން މިހާރު ތިން އަހަރު ވެފައިވާ ކަމަށެވެ. އެމްޕީއެލުން ބުނަނީ އެ އެއްބަސްވުން ހަދާފައިވަނީ މުއްދަތެއް ނެތް ގޮތަށް ކަމަށެވެ.
ޓީޖެޓީ ހުސްކޮށް، އެ ތަން ސިޓީ ކައުންސިލާއި ހަވާލުކުރަން 90 ދުވަހުގެ ނޯޓިސްއެއްވެސް ދީފައިވެއެވެ. އެ މުއްދަތު ހަމަވިއިރު އެތަން ހަވާލު ކޮށްފައި ނުވާތީ ސިޓީ ކައުންސިލުން އެތަނާ ހަވާލުވާން ކަމަށް ބުނެ އެތަނަށް ގޮސްފައިވެއެވެ. އެހެންނަމަވެސް އެމްޕީއެލްއިން އެ ދުވަހު ސިޓީ ކައުންސިލާ ބައްދަލުކޮށްފައެއް ނުވެއެވެ.
މާލެ ސިޓީ ކައުންސިލްގެ ބަޖެޓް މި އަހަރަށް ފާސްކުރީވެސް ޓީޖެޓީން އާމްދަނީ ލިބޭނެކަމަށް ބަލައި އެ އަދަދުތައް ހިމަނައިގެންނެވެ.
ޓީޖެޓީ ބެލެހެއްޓުން އެމްޕީއެލާ ހަވާލުކުރީ ކުރީގެ ރައީސް އަބްދުﷲ ޔާމީނުގެ ވެރިކަމުގައެވެ. އޭރުގެ ހައުސިން މިނިސްޓަރު ކަމުގައި ހުންނެވީ މިހާރު މާލެ ސިޓީގެ މޭޔަރު ޑރ. މުހައްމަދު މުއިއްޒުއެވެ.
