މާލެ ސިޓީގެ މަގުތަކާއި ފާރުތަކުގައި ހުރި ގްރެފިޓީތައް ނައްތާލުމުގެ މަސައްކަތް ފަށައިފިއެވެ.

މިއީ ފުލުހުންގެ ޚިދުމަތާއި ސިފައިން އަދި މާލެ ސިޓީ ކައުންސިލުން ގުޅިގެން ކުރިއަށްދާ މަސައްކަތެކެވެ. މާލެގެ މަގު ފާރުތަކުގައި ހުރި ގްރެފިޓީތައް ނައްތާލުމުގެ މަސައްކަތް ކުރިއަށްދާއިރު، އެސަރަހައްދު މޮނިޓަރ ކުރުމަށް ސަލާމަތީ ބާރުތަކުން ހަރަކާތްތެރިވެއެވެ.

ކައުންސިލުން ބުނީ މާލެ ސިޓީގެ މަގު ފާރުތަކުގައި ހުރި ގްރެފިޓީތައް ނައްތާލުމުގެ މަސައްކަތް ހުކުރު ދުވަހު ފަށައިގެން ކުރިއަށްދާ ކަމަށެވެ. މިމަސައްކަތުގެ ދަށުން މާލެ ސަރަހައްދުގެ ހުރިހާ ދިމާލެއްގައި އެހެން ހުރި ކުރެހުންތަކާއި ލިޔުންތައް ނައްތާލާނެ ކަމަށް ކައުންސިލުން ބުނެއެވެ.

ކައުންސިލުން ބުނީ އެ މަސައްކަތަކީ ވެސް މާލޭގެ ރައްޔިތުންނަށް އަމާން ރައްކާތެރި ވެއްޓެއް ގާއިމްކޮށްދިނުމަށް ކުރަމުންދާ މަސައްކަތެއް ކަމަށާއި، މިމަސައްކަތުގައި އާއްމު ރައްޔިތުންގެ ފަރާތުން އެއްބާރުލުން ލިބޭ ކަމަށެވެ. އަދި ކުރިއަށް އޮތްތަނުގައި މަސައްކަތްފުޅާ ކުރާނެ ކަމަށާއި، ޝަކުވާއެއް އޮތްނަމަ ކައުންސިލްއާ ހިއްސާކޮށްދިނުމަށް އެދިފައިވެއެވެ.

މަގު ފާރުތަކުގައި ހުރި ގްރެފިޓީތައް ނައްތާލުމުގެ މަސައްކަތް ފުލުހުންގެ ޚިދުމަތާއި ގުޅިގެން ކުރިއަށްދާއިރު، ޖެނުއަރީ 9 ވަނަ ދުވަހު ފުލުހުންނާއި ސިފައިން ގުޅިގެން ވަނީ ޚާއްސަ އޮޕަރޭޝަނެއް ފަށާފައެވެ. އެއީ ރައީސުލްޖުމްހޫރިއްޔާގެ ބެއްލެވުމުގެ ދަށުން އުފައްދާފައިވާ "ގޭންގު ކުށްތައް ހުއްޓުވުމަށް ގައުމީ ފެންވަރުގައި މަސައްކަތްކުރާ ޓާސްކު ފޯސް"ގެ މަސައްކަތްތައް ތަންފީޒުކުރުމުގެ ގޮތުން ކުރިޔަށްގެންދާ ޚާއްސަ އޮޕަރޭޝަނެއް ކަމަށް ފުލުހުން ބުނެއެވެ.

މިއޮޕަރޭޝަނާ ގުޅިގެން ސަލާމަތީ ބާރުތަކުން ގުޅިގެން ނެރުނު ބަޔާނެއްގައި ބުނެފައިވަނީ، ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް މާލޭގެ އަމާންކަމާއި ރައްކާތެރިކަމަށް ޔަގީންކުރުމުގެ ގޮތުން "ގުޅިގެން" ނަމުގައި ޚާއްސަ އޮޕަރޭޝަނެއް ފަށާފައިވާކަމަށެވެ.