ރަސްފަންނު ސަރަހައްދަށް ކުނި އެޅި މައްސަލަ ބަލާނަން: އީޕީއޭ

ރަސްފަންނު ސަރަހައްދަށް ކުނި އެޅި މައްސަލަ ބަލަންފަށާނެ ކަމަށް އެންވަޔަރަންމެންޓަލް ޕްރޮޓެކްޝަން އެޖެންސީގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވެއްޖެއެވެ.

މިދިޔަ ޑިސެމްބަރު މަހުގެ 26 އިން ފެށިގެން މާލެ ސަރަހައްދުގައި ނައިޓް މާކެޓް ބާއްވާފައިވާއިރު ކޮވިޑްގެ ކޭސްތައް އިތުރުވާންފެށުމާއެކު މިމަހުގެ 6 ވަނަ ދުވަހު އެޗްޕީއޭއިން ވަނީ ނައިޓް މާކެޓް ހުއްޓުވާފައެވެ. އެއާއެކު ވިޔާފާރިވެރިން ވަނީ އެބައެއްގެ ސްޓޯލްތައް ނަގާފައެވެ.

އެހެންނަމަވެސް އަދިވެސް އެ ސަރަހައްދަށް ގިނަ އަދަދެއްގެ ކުނި ވަނީ ޖަމާކޮށްފައެވެ. މީގެ ތެރޭގައި ސަތަރިއާއި، ޕެލެޓާއި، ގިނަ އަދަދެއްގެ ލަކުޑި ހުރިކަން ވަނީ ފާހަގަކުރެވިފައެވެ. މިކަމާއި އީޕީއޭއިން މި މައްސަލަ ބަލަމުންދޭތޯ ކުރެވުނު ސުވާލަށް ޖަވާބުދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވީ މި މައްސަލަ ބައްލަވާނެ ކަމަށެވެ. އެންމެ ފުރަތަމަ ބަލާނީ މިކަން ހިނގައިދިޔަގޮތާއި، މިކަމުގައި އޮތީ ކޮން ބައެއްގެ އިހުމާލެއްތޯ ކަމަށް ނައީމް ވިދާޅުވިއެވެ. އަދި އެއަށްފަހު ފިޔަވަޅު އަޅަންޖެހޭނަމަ ފިޔަވަޅު އަޅުއްވާނެ ކަމަށް ނައީމް ވިދާޅުވިއެވެ.

މި މައްސަލަ ބަލާނެ ކަމަށް އީޕީއޭއިން ބުނެފައިވާއިރު، ނައިޓް މާކެޓް ކުރިއަށް ދިޔަ ސަރަހައްދު ސާފުކުރުމުގެ މަސައްކަތް ފަށާފައިވާކަމަށް މާލެ ސިޓީ ކައުންސިލުން ވަނީ ބުނެފައެވެ. މައުލޫމާތު ލިބޭގޮތުގައި ސިޓީ ކައުންސިލުން ވަނީ އެތަން ހުސްކުރުމަށް މުއްދަތެއް ދީފައެވެ. އެހެންނަމަވެސް އެ މުއްދަތުގައިވެސް ބައެއް ތަންތަން ހުސްކޮށްފައެއް ނުވެއެވެ.

މިދިޔަ ޑިސެމްބަރު މަހުގެ 28 އިން ފެށިގެން މާލެ ސަރަހައްދުން ފެންނަ ކޮވިޑްގެ ކޭސްތައް ދަނީ އިތުރުވަމުންނެވެ. ކޭސްތައް އިތުރުވަމުންދާތީ ނައިޓް މާކެޓް ބޭއްވުން ހުއްޓާލުމަށް އެޗްޕީއޭއިން ވަނީ އަންގާފައެވެ. އެއާއެކު ގިނަ އަދަދެއްގެ ވިޔަފާރިވެރިން ވަނީ ކަންބޮޑުވުން ފާޅުކޮށްފައެވެ. އަދި ވިޔަފާރިވެރިންތައް އެއްވެ އެ ސަރަހައްދުގައި މުޒާހަރާވެސް ކޮށްފައިވެއެވެ. އެއާއެކު އެޗްޕީއޭގެ ގައިޑްލައިނާ އެއްގޮތަށް ނައިޓް މާކެޓް ކުރިއަށްގެންދިއުމަށް ހުއްދަ ދޭން ވަނީ ނިންމާފައެވެ. އެހެންނަމަވެސް ގައިޑްލައިނާ އެއްގޮތަށް ނައިޓް މާކެޓް ކުރިއަށްނުދާ ކަމަށްބުނެ އެޗްޕީއޭއިން ވަނީ އެތަން ބަންދުކުރުމަށް އަންގާފައެވެ.

މާލެ ސަރަހައްދުގައި ކޮވިޑްގެ ކޭސްތައް އިތުރުވަމުންދާތީ ޚާއްސަ ފިޔަވަޅުތަކެއް އެޅުމަށްވެސް މިމަހުގެ 9 ވަނަ ދުވަހު އެޗްޕީއޭއިން ވަނީ އަންގާފައެވެ. މީގެ ތެރޭގައި 50 މީހުންނަށްވުރެ ގިނަ މީހުން ޖަމާވާގޮތަށް ހަފްލާތަކާއި އިވެންޓްތަކާއި އެއްވުންތައް ނުބާއްވަން އެންގުމާއި، 50 މީހުންނަށްވުރެ މަދުން މީހުން ހިމަނައިގެން ބާއްވާ މިފަދަ ކަންކަން ރައްކާތެރިކަމުގެ މިންގަނޑުތަކާއި އެއްގޮތަށް ބޭއްވުމަށް ވަނީ އަންގާފައެވެ. މީގެ އިތުރުން މަގުމަތީ ބާޒާރުތައް ނުބޭއްވުމަށާއި، ކުޅިވަރު މުބާރާތްތައް، ކުޅި ބަލާ މީހުންނަށް ވަދެވޭގޮތަށް ނުބޭއްވުމަށް ވަނީ އަންގާފައެވެ.