ޓީޖެޓީގެ މައްސަލަ ސިވިލް ކޯޓަށް ހުށަހަޅައިފި

މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ހިންގާ ޓީޖެޓީ، މާލެ ސިޓީ ކައުންސިލްގެ ދަށަށް ގެނައުމަށް އެ މައްސަލަ ސިވިލް ކޯޓަށް ހުށަހަޅައިފިއެވެ.

ޓީޖެޓީ މާލެ ސިޓީ ކައުންސިލާ ހަވާލުކުރުމަށް އެމްޕީއެލްއިން ދެކޮޅު ހެދުމާއި ގުޅިގެން މި މައްސަލައިގައި ކޯޓަށް ދާނެ ކަމުގެ އިންޒާރު މާލެ ސިޓީ ކައުންސިލުން ވަނީ ދީފައެވެ. މާލެ ސިޓީ ކައުންސިލްގެ ފަރާތުން މި މައްސަލަ ސިވިލް ކޯޓަށް ހުށަހަޅާފައިވަނީ ނިމިދިޔަ ޑިސެމްބަރު މަހުގެ 30 ވަނަ ދުވަހުއެވެެ.

Advertisement

ކުރީގެ ހައުސިންގ މިނިސްޓަރުކަމުގައި ހުންނެވި ޑރ. މުހައްމަދު މުއިއްޒު ސޮއިކުރައްވާފައިވާ އެއްބަސްވުމެއްގެ ދަށުން ޓީޖެޓީ އޭރު ސިޓީ ކައުންސިލާ ހިންގަން ހަވާލުކުރުމުގެ ބަދަލުގައި އެމްޕީއެލްއަށް ދީފައިވަނީ މުއްދަތެއް ނެތްގޮތަށެވެ. ނަމަވެސް އައު ސިޓީ ކައުންސިލުން ބޭނުންވަނީ ލާމަރުކަޒީ ގާނޫނުގެ ތެރެއިން މާލޭގެ އިހްތިސާސްގެ ތެރޭގައި ހިމެނޭތީ ޓީޖެޓީ އަތުލުމަށެވެ.

އެމްޕީއެލްއަށް ސިޓީ ކައުންސިލުން 90 ދުވަހު ނޯޓިސްއެއް ވެސް ދީފައިވެއެވެ. އަދި އެ ނޯޓިސްގެ މުއްދަތު ހަމަވި ފަހުން އިތުރު 7 ދުވަހުގެ ނޯޓިސްއެއް ދީ އެތަން އަތުލުމަށް ހޯމަ ދުވަހު ސިޓީ ކައުންސިލްގެ މެންބަރުން ޓީޖެޓީއަށް ވަޑައިގެންފައިވެއެވެ. އެތަނުގައި ހުންނަވައި ދެއްވި އިންޓަރވިއުއެއްގައި ޑެޕިއުޓީ މޭޔަރ އަހުމަދު ނަރީޝް ވިދާޅުވީ ޓިޖެޓީއާ ގުޅޭގޮތުން ނިންމަންޖެހޭ ކަމެއް ނިންމަން ޖެހޭނީ ސިޓީ ކައުންސިލްގެ ބަހެއް އޮވެގެން ކަމަށެވެ. އަދި ޓީޖެޓީ އެމްޕީއެލްއިން ހިންގުމަށް އިއުތިރާޒެއް ނެތް ކަމަށާއި، އެހެނަމަވެސް މާލެ ސިޓީ ކައުންސިލަށް އަދި މާލޭގެ ރައްޔިތުންނަށް ލިބެންޖެހޭ ބިމުގެ ކުލި ނުލިބުމަކީ ކަންބޮޑުވާ ކަމެއް ކަމަށެވެ.

ނަރީޝް ވިދާޅުވީ އެމްޕީއެލްގެ ވެރިންގެ ގޮތުގައި ތިބި އެއްވެސް ބޭފުޅަކަށް މާލޭ ސިޓީގެ ރައްޔިތުންގެ ހައްގުގައި މާލެ ސިޓީ ކައުންސިލާ ބައްދަލުކުރަން ވަޑައިގަންނަވަން ކެރިވަޑައިނުގެންނެވި ކަމަށާއި، މިވީ 97 ދުވަހުގެ ތެރޭގައި އެމްޕީއެލްއިން ކައުންސިލާ ވާހަކަދައްކާކަށް ވެސް ބޭނުމެއް ނުވި ކަމަށެވެ.

މިކަމާއި ގުޅިގެން އެމްޕީއެލްގެ މެނޭޖިންގ ޑިރެކްޓަރ ޝާހިދު އަލީ ވިދާޅުވީ އެމްޕީއެލްއިން ޓީޖެޓީ ބެލެހެއްޓުމަށްޓަކައި ގިނަ މަސައްކަތްތަކެއްކޮށް ބޮޑެތި ޚަރަދުތަކެއް ކުރަމުން އަންނަ ކަމަށެވެ. އަދި މި މައްސަލައިގައި ސަރުކާރުން ވަކި ގޮތެއް ނާންގާހާ ހިނދަކު އެމްޕީއެލްއިން ޓީޖެޓީ ބަލަހައްޓާނެ ކަމަށެވެ. އަދި ޓީޖެޓީ، ސިޓީ ކައުންސިލާ ހަވާލުކުރަން ޖެހިއްޖެ ހާލަތެއްގައި ވަކި އުސޫލެއްގެ ދަށުން، އެމްޕީއެލްއިން އެސަރަހައްދުގައި ކުރަމުން އަންނަ މަސައްކަތާއި ދެމުން އަންނަ ޚިދުމަތްތަކަށް ބުރޫ ނާރާނެ ގޮތަށް ތަން ހަވާލުކުރުމުގެ މަސައްކަތް ކުރިއަށް ގެންދަން އެދިފައިވާނެ ކަމަށް ޝާހިދު ވިދާޅުވިއެވެ.