ނޭޕާލް އަތުންވެސް އަންހެން ވޮލީބޯޅަ ޓީމު ބަލިވެއްޖެ

ބަންގްލަދޭޝްގެ ވެރިރަށް ޑާކާގައި މިހާރު ކުރިއަށްދާ އޭވީސީ ސެންޓްރަލް ޒޯން ވޮލީބޯޅަ މުބާރާތުގައި ރާއްޖޭގެ އަންހެން ސީނިއާ ވޮލީބޯޅަ ޓީމުން ކުޅުނު ދެވަނަ މެޗުން ނޭޕާލް އަތުން ބަލިވެއްޖެއެވެ.

ހުކުރު ދުވަހުގެ ހެނދުނު ކުޅުނު މި މެޗުން ނޭޕާލް އަތުން ރާއްޖެ ބަލިވީ ސީދާ ތިން ސެޓުންނެވެ. މީގެ ކުރިން 2019 ވަނަ އަހަރު ބޭއްވި ސެންޓްރަލް ޒޯން ވޮލީބޯޅަ މުބާރާތުގެ ފައިނަލުގައި ވާދަކޮށްފައިވަނީވެސް ރާއްޖެ އާއި ނޭޕާލޭވެ. އެ ފަހަރު ރާއްޖެ ބަލިކޮށް ނޭޕާލުން ވަނީ މުބާރާތް ކާމިޔާބުކޮށްފައެވެ.

ހުކުރު ދުވަހު ކުޅުނު މެޗުގެ ފުރަތަމަ ސެޓު ފަށައިގެން ރާއްޖޭން ރަނގަޅަށް ކުޅެ ނޭޕާލަށް ޕްރެޝަރު ކުރިއެވެ. އެގޮތުން ރާއްޖޭގެ ޝަހާ ޝާމިން އާއި އާމިނަތު އަރީޝާ (އަރީ) ގެ އެޓޭކުތައް ހުއްޓުވަން ނޭޕާލަށް އުނދަގޫވިއެވެ. އެކަމަކު ނޭޕާލުން ވަނީ ގާތްގާތުގައި ގިނަ ޕޮއިންޓުތަކެއް ހޯދައި ބޮޑު ލީޑެއް ނަގައިފައެވެ. އެއާއެކު މި ސެޓު ނޭޕާލުން ގެންދިޔައީ 25-11 އިންނެވެ.

މެޗުގެ ދެވަނަ ސެޓު ފަށައިގެންވެސް ރާއްޖޭގެ ފަރާތުން މޮޅު އެޓޭކުތަކެއް ފެނިގެންދިޔަ ނަމަވެސް، ނޭޕާލު ކުޅުންތެރިން ވަނީ ތަޖުރިބާގެ ބޭނުން ހިފައި 25-09 އިން މި ސެޓު ކާމިޔާބުކޮށްފައެވެ. އަދި ތިންވަނަ ސެޓުގައި ދެ ޓީމުން ގިނަ ބަދަލުތަކެއް ފެނިގެންދިޔައިރު، މި ސެޓުގައި ނޭޕާލުން ވަނީ ހުނަރުވެރި ކުޅުންތެރިޔާ ޕްރަދީބާ މާލީ ކުޅެން އަރުވާފައެވެ. އެއާއެކު މި ސެޓު ނޭޕާލުން ކާމިޔާބުކުރީ ފަސޭހަކަމާއެކު 25-05 އިންނެވެ.

މެޗަށްފަހު ވާހަކަ ދައްކަމުން ގައުމީ ޓީމުގެ ކޯޗު މުމްތާޒް އަލީ (މުންތޭ) ބުނީ މި މެޗަށް ނުކުތީވެސް ނޭޕާލަކީ ކިހާވަރެއްގެ ޓީމެއްކަން ދެނެގެން ކަމަށާއި، އެގޮތުން ރާއްޖޭގެ މި ވަގުތު އޮތް ސްކޮޑަށް ބަލާނަމަ، މިއީ ޕްރެކްޓިސް މެޗަކަށް ދެކިގެން ނުކުތް މެޗެއް ކަމަށް ކުޅުންތެރިންނަށް ވިސްނައިދިން ކަމަށެވެ. އަދި ފުރަތަމަ ދެ ސެޓުގައި ޓީމުގެ ފަރާތުން ފެނުނު ކުޅުމާމެދު ހިތްހަމަޖެހޭ ކަމަށްވެސް ބުންޏެވެ. މުންތޭ ބުނީ ފަހު ސެޓު ތަފާތު ބޮޑުވީ ފުރަތަމަ ދެ ސެޓު ރަނގަޅަށް ކުޅެވިފައި، މެޗު ކާމިޔާބުކުރުމުގެ ވިސްނުމުގައި ކުޅުންތެރިންނަށް ކުޅެވުމުން ކަމަށެވެ.

މި ފަހަރުގެ މުބާރާތުގައި އަންހެން ޓީމު ވާދަކުރަމުން އަންނައިރު، މި މުބާރާތުގައި ވާދަކުރާ އަންހެން ވޮލީބޯޅަ ޓީމަށް ވަނީ ބޮޑެތި ބަދަލުތަކެއް އައިސްފައެވެ. އެގޮތުން މީގެ ކުރިން ގައުމީ ސީނިއާ ޓީމަށް ކުޅުނު ކުޅުންތެރިންގެ ތެރެއިން މި ފަހަރުގެ ޓީމުގައި ހިމެނެނީ ހަތަރު ކުޅުންތެރިއެކެވެ. ދެން މި ޓީމުގައި ހިމެނޭނީ މުޅިން އަލަށް ގައުމީ ޓީމުން ޖާގަ ހޯދި ކުޅުންތެރިންނެވެ.

އެގޮތުން ގައުމީ ސީނިއާ އަންހެން ވޮލީ ޓީމުގެ އެވެރެޖް އުމުރަކީ 20-23 އަހަރާ ދެމެދެވެ. އަދި މި މުބާރާތަށް ނުކުތް ޓީމުގައި ގިނައީ މީގެ ކުރިން ބައިނަލްއަގުވާމީ މެޗުތަކުގެ ތަޖުރިބާ ލިބިފައިނުވާ ކުޅުންތެރިންނެވެ.

މި ފަހަރުގެ ސެންޓްރަލް ޒޯން އަންހެން މުބާރާތުގައި ރާއްޖެއާއެކު ވާދަކުރާނީ ނޭޕާލުގެ އިތުރުން ބަންގްލަދޭޝް އާއި، އުޒްބެކިސްތާނާއި، ސްރީ ލަންކާ އަދި ކިރްގިސްތާނެވެ.

މުބާރާތުގެ ތިންވަނަ މެޗުގައި ހޮނިހިރު ދުވަހު ރާއްޖެ ނުކުންނަން ޖެހޭނީ މި މުބާރާތުގެ ފޭވަރިޓުންގެ ތެރޭގައި ހިމެނޭ ލަންކާއާ ދެކޮޅަށެވެ. އަދި ހަތަރުވަނަ މެޗުގައި އާދީއްތަ ދުވަހު ރާއްޖެ ކިރްގިސްތާނާ ދެކޮޅަށް ނުކުންނައިރު، މުބާރާތުގެ ފަހު މެޗުގައި ހޯމަ ދުވަހު ރާއްޖެ ނުކުންނާނީ ބަންގްލަދޭޝްއާ ދެކޮޅަށެވެ.

މި މުބާރާތް ރާވާފައިވާ ގޮތުން ހަ ގައުމުގެ މެދުގައި ލީގު އުސޫލުން ކުޅުމަށްފަހު، ފައިނަލުގައި ކުޅޭނީ ރޭންކިންގެ ކުރީގައި އޮންނަ ދެ ޓީމެވެ. އަދި ތިންވަނަ އާއި ހަތަރުވަނަ ޓީމު ރޭންކިން މެޗެއް ކުޅޭ ގޮތަށްވެސް ވަނީ ހަމަޖެހިފައެވެ.