ސަރުކާރުން ވަކިގޮތެއް ނާންގާހާ ހިނދަކު އެމްޕީއެލްއިން ޓީޖެޓީ ބަލަހައްޓާނެ
ވަކި މުއްދަތެއް ނެތްގޮތަށް އެމްޕީއެލްއާ ސަރުކާރުން ހަވާލުކޮށްފައިވާ މިބިން ހޯދުމަށް މާލޭ ސިޓީ ކައުންސިލުން އަންނަނީ ގިނަ މަަސައްކަތްތަކެއް ކުރަމުން
އެމްޕީއެލްގެ މެނޭޖިންގް ޑިރެކްޓަރ ޝާހިދު އަލީ
ޓީޖެޓީގެ މައްސަލައިގައި ސަރުކާރުން ވަކިގޮތެއް ނާންގާހާ ހިނދަކު މޯލްޑިވްސް ޕޯޓްސް ލިމިޓެޑް (އެމްޕީއެލް)ން ޓީޖެޓީ ބަލަހައްޓާނެ ކަމަށް އެމްޕީއެލްގެ މެނޭޖިންގ ޑިރެކްޓަރ ޝާހިދު އަލީ ވިދާޅުވެއްޖެއެވެ.
ޚާއްސަ އެއްބަސްވުމެއްގެ ދަށުން ޓީޖެޓީ ބެލެހެއްޓުމަށް އެމްޕީއެލްއާ ހަވާލުކޮށްފައިވަނީ މިހާރުގެ މޭޔަރ ޑރ. މުއިއްޒު ހައުސިން މިނިސްޓަރު ކަމުގައި ހުންނެވި އިރު 2015 ވަނަ އަހަރުގެ މާޗް 12 ގައެވެ. ވަކި މުއްދަތެއް ނެތްގޮތަށް އެމްޕީއެލްއާ ސަރުކާރުން ހަވާލުކޮށްފައިވާ މި ބިން ހޯދުމަށް މާލޭ ސިޓީ ކައުންސިލުން އަންނަނީ ގިނަ މަަސައްކަތްތަކެއް ކުރަމުންނެވެ.
މިކަމާ ގުޅިގެން މާލޭ ސިޓީ ކައުންސިލުން އެމްޕީއެލްއާ ބައްދަލުކޮށް ޓީޖެޓީ އަނބުރާ މާލޭ ސިޓީ ކައުންސިލާ ހަވާލުކުރުމަށް އެދުމުން އެކަން ލިޔުމަކުން އެންގުމަށް އެމްޕީއެލްއިން ވަނީ އެދިފައެވެ. އަދި ޓީޖެޓީ ހޯދުމަށް ކައުންސލިގެ ފަރާތުން އެމްޕީއެލްއަށް ލިޔުމުން ހުށަހެޅުމުން، އެކަމުގެ މަޝްވަރާތައް ސަރުކާރާއެކު ކޮށްފައިވާނެ ކަމަށް ޝާހިދު ވިދާޅުވިއެވެ. ސަރުކާރާއެކު މަޝްވަރާކުރުމަށްފަހު ސަރުކާރުން ނިންމީ އެމްއޯޔޫގައި ވާގޮތަށް އެމްޕީއެލްއިން ޓީޖެޓީ ބެލެހެއްޓުމަށެވެ.
އޭގެ ފަހުންވެސް ކައުންސިލުން އަންނަނީ ޓީޖެޓީ ހޯދުމުގެ މަސައްކަތް ހުއްޓާނުލާ ކުރަމުންނެވެ. އެގޮތުން މާލޭ ސިޓީ ކައުންސިލްގެ 4 ވަނަ ދައުރުގެ 30 ވަނަ ޖަލްސާގައި ވަނީ ޓީޖެޓީ މާލޭ ސިޓީ ކައުންސިލާ ހަވާލުކުރުމަށް ދީފައިވާ 90 ދުވަހުގެ މުއްދަތު ހަމަވުމުން، އެ މުއްދަތުގެ ތެރޭގައި އެތަން މާލޭ ސިޓީ ކައުންސިލާ ހަވާލުނުކޮށްފިނަމަ ކުރަންޖެހޭ ހުރިހާ ކަމެއް ކުރުމަށް ފާސްކޮށްފައެވެ.
މިކަމާ ގުޅިގެން ރާއްޖެޓީވީއަށް މައުލޫމާތު ދެއްވަމުން ޝާހިދު ވިދާޅުވީ އެމްޕީއެލްއިން ޓީޖެޓީ ބެލެހެއްޓުމަށްޓަކައި ގިނަ މަސައްކަތްތަކެއްކޮށް ބޮޑެތި ޚަރަދުތަކެއް ކުރަމުން އަންނަ ކަމަށެވެ. އަދި މި މައްސަލައިގައި ސަރުކާރުން ވަކި ގޮތެއް ނާންގާހާ ހިނދަކު އެމްޕީއެލްއިން ޓީޖެޓީ ބަލަހައްޓާނެ ކަމަށެވެ. މީގެ އިތުރުން، ޓީޖެޓީ، ސިޓީ ކައުންސިލާ ހަވާލުކުރަން ޖެހިއްޖެ ހާލަތެއްގައި ވަކި އުސޫލެއްގެ ދަށުން، އެމްޕީއެލްއިން އެސަރަހައްދުގައި ކުރަމުން އަންނަ މަސައްކަތާއި ދެމުން އަންނަ ޚިދުމަތްތަކަށް ބުރޫ ނާރާނެ ގޮތަށް ތަން ހަވާލުކުރުމުގެ މަސައްކަތް ކުރިއަށް ގެންދަން އެދިފައިވާނެ ކަމަށް ޝާހިދު ވިދާޅުވިއެވެ.
