211 ޕާކިންގ ސްލޮޓުގެ ގުރުނެގުން ބާއްވައިފި

މާލެ ސިޓީ ކައުންސިލުން އިއުލާނު ކޮށްފައިވާ ޕާކިންގ ސްލޮޓްތަކުގެ ގުރުއަތުލުން ކުރިއަށްގެންގޮސްފިއެވެ.

އާދިއްތަ ދުވަހުގެ ރޭ މާލެ ސިޓީ ކައުންސިލްގައި ކުރިއަށްދިޔަ ގުރުއަތުލުމުގައި ސިޓީ ކައުންސިލުން ދޫކުރަން ނިންމާފައިވާ 211 ޕާކިންގ ސްލޮޓްގެ ހައްގުވެރިން ވަނީ ހޮވާފައެވެ. މިކަމާގުޅިގެން މާލެ ސިޓީ ކައުންސިލްގެ ޑެޕިއުޓީ މޭޔަރ އަހުމަދު ނަރީޝް ވިދާޅުވީ، މި 211 ސްލޮޓަށް 969 މީހަކު ކުރިމަތިލާފައިވާކަމަށެވެ.

ނަރީޝް ވިދާޅުވީ މި ސްލޮޓްތަކަށް ކުރިމަތިލި ކޮންމެ ފަރާތަކަށްވެސް ސްލިޕެއް ހަވާލުކުރި ކަމަށެވެ. ގުރުއަތު ނެގުމަށް ބޭނުންކޮށްފައިވަނީ ސްލިޕް ނަންބަރު ކަމަށާއި، މި ސްލިޕް ނަންބަރުތައް ހޯމަ ދުވަހުގެ ވަގުތެއްގައި މާލެ ސިޓީ ކައުންސިލްގެ ވެބްސައިޓް، އަދި ސޯޝަލް މީޑިއާ ޕްލެޓްފޯމްތަކުގައި ހިއްސާކުރާނެ ކަމަށް ނަރީޝް ވިދާޅުވިއެވެ.

އަދި ގުރުއަތުން ހޮވުނު ފަރާތްތަކާއެކު އެގްރީމެންޓް ހެދުމުގެ މަސައްކަތްވެސް ހޯމަ ދުވަހުން ފެށިގެން ކުރިއަށްދާނެ ކަމަށާއި، އެގްރީމެންޓް ހަދައި ޕާކިންގ ސްލޮޓްތައް ދޫކުރަމުންދާނެ ކަމަށް ނަރީޝް ވިދާޅުވިއެވެ. މީގެ އިތުރުން ގަރާޖުތައް ދޫކުރުމަށް ޑިސެމްބަރު 15ގެ ފަހުން އިއުލާނުކުރާނެ ކަމަށްވެސް ނަރީޝް ވިދާޅުވިއެވެ.

މި ސްލޮޓްތަކާ ގުޅޭގޮތުން މާލެ ސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު ވިދާޅުވީ، މާލެ ސިޓީ ކައުންސިލާއި އެ ސްލޮޓް ލިބޭ ފަރާތަކާމެދު ހެދޭ އެއްބަސްވުމެއްގެ ދަށުން، އެ ސްލޮޓަކީ އެ ވެހިކަލްގެ ގަރާޖުގެ ގޮތުގައި ކަނޑައެޅިގެންދާނެ ކަމަށެވެ. އަދި މިގޮތަށް ކަނޑައެޅުމަށް 25،000ރ. ކުލީގެ ގޮތުގައި ނަގާނެ ކަމަށް ޑރ. މުއިއްޒު ވިދާޅުވިއެވެ.

މި ސްލޮޓަކީ އެ އުޅަނދެއް ދެމިއޮތްހާ ހިނދަކު އޮންނާނެ ސްލޮޓެއް ކަމަށެވެ. އެއީ މުސްތަގުބަލުގައި ހަދާ ޕާކިންގ ސްލޮޓަކުން ކަމަށް ވިޔަސް އެމީހަކަށް އެ ސްލޮޓް ކަށަވަރުވެފައި އޮންނާނެ ކަމަށް ޑރ. މުއިއްޒު ވިދާޅުވިއެވެ.