ނޮވެންބަރު ތިނެއް، 1988 ގައި ރާއްޖެއަށް ދިން ޓެރަރިސްޓް ހަމަލާގައި ޝަހީދުވި ބަޠަލުން ފަސްދާނުލެވިފައިވާ މަގުބަރާގެ އާބާތުރަ ފިލުވުމުގެ މަސައްކަތް މާލޭ ސިޓީ ކައުންސިލުން ކޮށްފިއެވެ.

ސިޓީ ކައުންސިލުން މިއަދު ބުނީ ނޮވެންބަރު ތިނެއްގެ ޝަހީދުން ފަސްދާނުލެވިފައިވާ ސަރަހައްދު ހަޑިވެ ވީރާނާވެފައިވާތީ، އެ ސަރަހައްދު ސާފުކޮށް އާބާތުރަފިލުވުމުގެ މަސައްކަތް އެ ކައުންސިލުން ހޯމަދުވަހު ކޮށްފައިވާ ކަމަށެވެ.

އެގޮތުން އެ މަގުބަރާގެ ކުލަފޮޅިފައިވާ ފާރުތަކާއި މަހާނަ ގައުތަކުގައި ކުލަ އާކޮށް، ކަޅުވެފައިވާ އެ ސަރަހައްދަށް ދޮންވެލިލައި ރީތި ކޮށްފައިވެއެވެ.

ނޮވެމްބަރު ތިނެއްގައި ޝަހީދުވި ބަތަލުން ފަސްދާނުލާފައިވަނީ ހެންވޭރު ސަހަރާގައެވެ.

ދިވެހިރާއްޖޭގެ ވެރިކަން ވައްޓާލައި ވެރިކަމަށް އިސްވުމަށް ތަމަޅަ ޓައިގަރުންގެ 80 މީހުންނާއެކު ބާޣީ އަބްދުﷲ ލުތުފީ އިސްވެހުރެ ރާއްޖެއަށް ހަމަލާ ދީފައިވަނީ 3 ނޮވެމްބަރ 1988 ގައެވެ. އެދުވަހުގެ އުދުވާނީ ހަމަލާގައި ދިވެހިންގެ 11 މީހުން ޝަހީދު ކޮށްލައި، 39 މީހުން ޒަޚަމް ކޮށްލާފައިވެއެވެ. ޝަހީދު ކޮށްލި މީހުންގެ ތެރޭގައި ދިވެހި ސިފައިންގެ 8 ބޭކަލުން ހިމެނެއެވެ.

މީގެ އިތުރުން އެދުވަހުގެ ބާޣީން ވަނީ އާންމުންގެ 27 މީހުން ރަހީނުކޮށް ކަނޑުމަގުން ފިލަން ވެސް މަސައްކަތްކޮށްފައެވެ. އެހެންނަމަވެސް ދެފަރާތުން ހަމަލާ ބަދަލު ކުރަން ފެށުމުން ބާޣީން ވަނީ އަމާންދީފައެވެ.

މި އަހަރުގެ ނޮވެމްބަރ 3 ވަނަ ދުވަހަަކީ 33 ވަނަ ނަސްރުގެ ދުވަހެވެ.