މާލޭގެ 16 މަގެއްގައި ތާރު އަޅަނީ
ތާރު އަޅަން ނިންމާފައިވަނީ ބޮޑެތި މަގުތަކުގައި
މާލޭގެ މަގުތަކުގައި ތާރު އެޅުމުގެ މަސައްކަތުގެ އެއްބަސްވުމުގައި ސޮއިކުރުން
މާލެ ސިޓީގެ 16 މަގެއްގައި ތާރު އެޅުމުގެ މަސައްކަތް ރޯޑް ޑިވޮލޮޕްމެންޓް ކޯޕަރޭޝަން (އާރުޑީސީ)އާ ހަވާލުކޮށްފިއެވެ.
މިކަމުގެ އެއްބަސްވުމުގައި މާލެ ސިޓީ ކައުންސިލްގެ ފަރާތުން ސޮއިކުރެއްވީ މޭޔަރ ޑރ. މުޙައްމަދު މުޢިއްޒުއެވެ. އާރްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ މޫސާ ޢަލީ މަނިކުއެވެ. މި މަޝްރޫއަކީ މާލޭގެ މަގުތައް ޒަމާނީ ފެންވަރަށް ތަރައްގީކުރުމަށް މާލޭ ސިޓީ ކައުންސިލުން ކުރަމުންދާ މަސައްކަތުގެ ދަށުން ވެފައިވާ އެއްބަސްވުމެކެވެ.
މި އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން އާރުޑީސީގެ އެމްޑީ މޫސާ ޢަލީ މަނިކު ވިދާޅުވީ, މާލޭގެ މަގުތަކަށް ދިމާވެފައިވާ މައްސަލަތައް ހައްލުކުރުމަށް މީގެ ކުރިން އޮތް ކައުންސިލާއެކުވެސް އާރުޑީސީން އެއްބަސްވުމަކަށް ގޮސްފައިވާ ކަމަށެވެ. އެހެންނަމަވެސް މިހާރުގެ ކައުންސިލުން އެ އެއްބަސްވުމަށް ބަދަލުތަކެއް ގެނެސްފައިވާކަމަށާއި، މި ސޮއިކުރެވުނު އެއްބަސްވުމަކީ މިއަދުގެ ކައުންސިލުން ބަދަލު ގެނެސްފައިވާ އެއްބަސްވުމެއް ކަމަށެވެ.
މިއާއެކު މި މަޝްރޫއަށް އިތުރު ފުރިހަމަކަމެއް ލިބިގެންދާނެ ކަމަށް ގަބޫލުކުރައްވާކަމަށް މޫސަ ވިދާޅުވިއެވެ. މި އެއްބަސްވުމުގެ ދަށުން މާލޭގެ ބޮޑެތި މަގުތަކުގެ ތެރެއިން 16 ވަރަކަށް މަގުގައި ތާރު އަޅައި ޒަމާނީ ފެންވަރަށް ތަރައްގީކުރެވިގެންދާނެ ކަމަށް މޫސަ ވިދާޅުވިއެވެ.
މޫސަ އިތުރަށް ވިދާޅުވީ މިހާތަނަށް ކުރެވުނު ތަޖުރިބާއަށް ބަލާއިރު، މި މަސައްކަތަކީ ގޮންޖެހުން ބޮޑު ތަކުލީފު ގިނަ މަސައްކަތެއްގެ ގޮތުގައި ފާހަގަކުރެވުނު ކަމަށެވެ. އެހެންނަމަވެސް ސިޓީ ކައުންސިލުން މާލޭގެ މަގުތަކަށް ގެންނަން ބޭނުންވާ ބަދަލު މާލޭގެ މަގުމަތިން ފެނިގެންދާނެ ކަމަށް މޫސަ ވަނީ ވިދާޅުވެފައެވެ.
