މިހާރު ރާއްޖެ ވަޑައިގެން އުޅުއްވާ ސްރީލަންކާގެ ޔޫތު އެންޑް ސްޕޯޓްސް މިނިސްޓަރ ނަމާލް ރާޖަޕަކްސަ އާދީއްތަ ދުވަހު ދިވެހި ބަހުން ޓުވީޓެއް ކުރައްވައިފިއެވެ.

މިއީ ސްރީލަންކާގެ ވަޒީރަކު ދިވެހި ބަހުން ޓްވީޓް ކުރެއްވި ދެވަނަ ފަހަރެވެ. އެންމެ ފުރަތަމަ ޓްވީޓު ކުރެއްވީވެސް ނަމާލް ރާޖަޕަކްސައެވެ. އެ ޓްވީޓު ކުރެއްވީ ދެހާސް ވިހީގެ ސެޕްޓެމްބަރު މަހު ރާއްޖެއިން ސްރީލަންކާއަށް ކަނޑަޑައަޅުއްވާފައިވާ ސަފީރު އުމަރު ރައްޒާގާ ބައްދަލުކުރެއްވުމަށްފަހުއެވެ. އެފަހަރު ވިދާޅުވީ ސަފީރާއި ބައްދަލުކޮށް ދެގައުމުގެ ގުޅުން ކުޅިވަރާއި ޒުވާނުންގެ ރޮނގުން އިތުރަށް ވަރުގަދަ ކުރުމަށް މަޝްވަރާ ކުރެވުމަކީ ލިބުނު އުފަލެއް ކަމުގައެވެ. ރާއްޖެ އަދި ލަންކާއަކީ ގާތް އެކުވެރި ދެގައުމު ކަމުގައެވެ.

ސާފް ޗެމްޕިއަންޝިޕްގައި ދިވެހިރާއްޖެ އާއި ސްރީލަންކާ އާދީއްތަ ދުވަހު ބައްދަލު ކުރި މެޗު ބައްލަވައިލެއްވުމަށް މާލެ ވަޑައިގެން ދިވެހި ބަހުން ކުރެއްވި ޓްވީޓުގައި ނަމާލް ވިދާޅުވެފައި ވަނީ މެޗު ބަލާލަން އާދެވުނުކަމީ އުފަލެއް ކަމަށާއި ދެ ޓީމަށްވެސް ކާމިޔާބީއަށް އެދިވަޑައިގަންނަވާ ކަމަށެވެ. ކުޅުންތެރިން ދަނޑުމަތީގައި ދައްކާ ކުޅިވަރުގެ ރޫހަކީ ދެ ގައުމުގެ ދެމެދުގައި އޮންނަ ވަރުގަދަ ގުޅުމުގެ އަލިގަދަ ރަމްޒަކަށްވާނޭ ކަމުގައެވެ.

އުމުރުފުޅުން 35 އަހަރުވީ ނަމާލް އަކީ ކުރީގެ ރައީސް އަދި މިހާރުގެ ބޮޑުވަޒީރު މަހިންދަ ރާޖަޕަކްސާގެ ދަރިކަލެކެވެ. ސްރީލަންކާގެ ޔޫތު މިނިސްޓަރުކަމަށް އައްޔަން ކުރެވުނީ 2020 ގައެވެ. ޔޫތު އެންޑް ސްޕޯޓްސް މިނިސްޓަރު ކަމުގެ އިތުރަށް ސްޓޭޓް މިނިސްޓަރ އޮފް ޑިޖިޓަލް ޓެކްނޮލޮޖީއަކީ ވެސް އޭނާއެވެ. ގިނަ ބަޔަކު ގަބޫލުކުރާ ގޮތުގައި ކުރިމަގުގައި ސްރީލަންކާގެ ރިޔާސަަތަށް ރާޖަޕަކްސާ އާއިލާއިން ދޮންކުރަމުންދާ ލީޑަރަކީ ނަމާލް ރާޖަޕަކްސާއެވެ. ސްރީލަންކާގެ ޕާލަމެންޓްގައި ނަމާލް ފުރުއްވަމުން ގެންދަވަނީ ހަމްބަންޓޮޓާ ޑިސްޓްރިކްޓްގެ ގޮނޑިއެވެ. އެއީ ރާޖަޕަކްސާ އާއިލާގެ ބާރު އެންމެ ގަދަ ސަރަހައްދެވެ.

ބޭރުގެ ލީޑަރުންގެ ތެރެއިން އިންޑިޔާގެ ބޮޑުވަޒީރު ނަރެންދުރަ މޯދީ ވެސް ވަނީ ދާދި ފަހުން ދިވެހި ބަހުން ޓުވީޓެއް ކުރައްވާފައެވެ. މިއަދު ނަމާލް ރާޖަޕަކްސާ ކުރެއްވި ޓްވީޓު ދޭސީންނާއި ބިދޭސީންގެ ތެރެއިން އެތައް ސަތޭކަ ބަޔަކު ރިޓްވީޓް ކޮށްފައިވެއެވެ. އަދި މިހާތަނަށް ހާހެއްހައި މީހުން އެ ޓުވީޓަށް ލައިކް ދީފައިވެއެވެ.