ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން މާލެ ސިޓީ ކައުންސިލްގެ އިހުތިސާސްގެ ތެރޭގައި ހިމެނޭ މަސައްކަތްތަކުގެ މައްސަލަ ހައްލުނުވެގެން އެންމެ ފަހުން ސިޓީ ކައުންސިލުން ރައްޔިތުންގެ މަޖިލީހާ ހަމައަށް ގޮސްފިއެވެ.
މިދިޔަ ހަފުތާގައި ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މަޖިލީހުގެ ނާއިބުރައީސް އީވާ އަބްދުﷲ ވިދާޅުވީ މާލެ ސިޓީ ކައުންސިލްގެ އިދާރާއިން މާލޭގެ މޭޔަރާއި އަދި ސިޓީ ކައުންސިލްގެ މެމްބަރުން ސެޕްޓެމްބަރ މަހުގެ 5 ވަނަ ދުވަހު ރައްޔިތުންގެ މަޖިލީހުގައި ހިމެނޭ މާލޭގެ ދާއިރާތަކުގެ މެމްބަރުންނާއި ބައްދަލުކޮށްފައިވާ ކަމަށެވެ. އަދި މިބައްދަލުކުރުމުގައި ސިޓީ ކައުންސިލަށް ދިމާވާ ގޮންޖެހުންތަކާއި ކަންބޮޑުވުންތަކާއި ބެހޭ ގޮތުން މަޝްވަރާކުރައްވާފައިވާކަމަށް އީވާ ވިދާޅުވިއެވެ.
މިމަޝްވަރާގެ ދަށުން އެއްބަސްވެވިފައިވަނީ ރައްޔިތުންގެ މަޖިލީހުގެ ކަމާބެހޭ ކޮމިޓީއަށް އެމައްސަލަތައް ނުވަތަ ކަންބޮޑުވުންތައް ހުށަހަޅައިގެން މިއަހަރުގެ ބަޖެޓް ސަރުކާރުން ހުށަހެޅުމާއި އަދި ރައްޔިތުންގެ މަޖިލިހުން ފާސްކުރުމުގެ ކުރިން ސިޓީ ކައުންސިލަށް ދިމާވެފައިވާ ގޮންޖެހުންތަކަށް ކޮންމެވެސް ވަރެއްގެ ހައްލެއް ހޯދައިދިނުމަށް މަސައްކަތްކުރުމަށް ކަމަށް އީވާ ވިދާޅުވިއެވެ. އަދި މާލެ ސިޓީ ކައުންސިލުން މިކަމުގައި ރައްޔިތުންގެ މަޖިލީހަށް ސިޓީއެއް ފޮނުވާފައިވާކަމަށް އީވާ ވިދާޅުވިއެވެ.
އެގޮތުން މާލޭ ސިޓީ ކައުންސިލްގެ އިދާރާއިން 9 ސެޕްޓެމްބަރ ގައި ރައްޔިތުންގެ މަޖިލީހަށް ސިޓީއެއް ފޮނުއްވާފައި އެބަވޭ 7 މައްސަލައެއް ހުށަހަޅުއްވާފައި. އަޅުގަނޑުމެންނަށް އޭރު މަޝްވަރާގައި ފާހަގަކުރެވުނު ގޮތުންވެސް އަދި މިސިޓީންވެސް އަޅުގަނޑަށް ފާހަގަކުރެވުނީ އަދިވެސް މިދިމާވަނި އިހުތިސާސާ ބެހޭ މައްސަލަތަކޭ. އެހެންވީމާ ރައްޔިތުންގެ މަޖިލީހުގެ ކޮމިޓީންވެސް ވީވަރަކުން އަޅުގަނޑުމެންވެސް އެމައްސަލަތައް ހައްލުކޮށްދޭން އެބަޖެހޭއީވާ އަބްދުﷲ / ރައްޔިތުންގެ މަޖިލީހުގެ ނާއިބުރައީސް
އީވާ ވިދާޅުވީ މިމައްސަލަތަކަށް މާލޭ ސިޓީ ކައުންސިލާއި ގުޅިގެން އަދި ސަރުކާރުގެ ކުންފުނިތަކާއި އެހެނިހެން އިދާރާތަކާއި ގުޅިގެން ގެންނަންޖެހޭ ހައްލުތައް ގެނައުމަށްޓަކައި ލާމަރުކަޒީ ކޮމިޓީއަށް ފޮނުވާނެކަމަށެވެ.
އިހުތިސާސްގެ މައްސަލާގައި މާލެ ސިޓީ ކައުންސިލަށް އެންމެ ބޮޑަށް ދިމާވެފައިވާ މައްސަލައިގެ ގޮތުގައި ފާހަގަކުރަމުން އަންނަނީ ހުޅުމާލޭގެ މައްސަލައެވެ. ގާނޫނު ބުނާގޮތުން މުނިސަޕަލް ޚިދުމަތްތަކުގެ އިތުރުން ތަރައްގީގެ މަޝްރޫއުތައް ހިންގުމަށް ލާޒިމްކޮށްފައިވަނީ ކައުންސިލާއެވެ. ނަމަވެސް ހުޅުމާލޭގައި އެ ޚިދުމަތްތަކައި މަސައްކަތްކުރުމުގެ ފުރުސަތު ސަރުކާރުން ފަހިކޮށްނުދޭކަމަށް ސިޓީ ކައުންސިލުން އަންނަނީ ބުނަމުންނެވެ. ހުޅުމާލޭގައި އެކަންކަން ކުރަމުން އަންނަނީ އެޗްޑީސީންނެވެ.
ހުޅުމާލޭގައި މުނިސިޕަލް ޚިދުމަތްތައް ދިނުމަށް ސިޓީ ކައުންސިލްގައި ބަޖެޓު ނެތުމުން އެޗްޑީސީގައި އޮތް ބަޖެޓް ސިޓީ ކައުންސިލަށް ދިނުމަށް ސިޓީ ކައުންސިލުން ވަނީ އެދިފައެވެ.
