މި މަހު 15ން ފެށިގެން ވެމްކޯއިން އުކާނީ ރަޖިސްޓްރީވެފައިވާ ފަރާތްތަކުގެ ކުނި އެކަނި
ގިނަ ގޭބިސީތަކުން އަދިވެސް ވެމްކޯގައި ރަޖިސްޓްރީ ނުވޭ
ވެމްކޯއިން ކުނި އުކާލުން
މި މަހު 15ން ފެށިގެން ވޭސްޓް މެނޭޖްމަންޓް ކޯޕަރޭޝަން (ވެމްކޯ)ން އުކާނީ އެ ކުންފުނީގައި ރަޖިސްޓްރީވެފައިވާ ފަރާތްތަކުގެ ކުނި އެކަނި ކަމަށް ބުނެފިއެވެ.
މާލޭ ސިޓީ ކައުންސިލްގައި ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވެމްކޯގެ ޑެޕިއުޓީ މެނޭޖިންގ ޑިރެކްޓަރު ޔޫސުފް ސިރާޖް ވިދާޅުވީ މި މަހުގެ 15ވަނަ ދުވަހުން ފެށިގެން, ވެމްކޯއިން ކުނި ނަގަމުން އަންނަ ގޮތަށް ބަދަލުތަކެއް ގެނައުމަށް ނިންމާފައިވާ ކަމަށެވެ. އަދި މި ބަދަލުތަކަކީ ސިޓީ ކައުންސިލާއެކު ބޭއްވުނު މަޝްވަރާތަކުގެ ތެރެއިން ނިންމި ނިންމުމެއް ކަމަށް ސިރާޖް ވިދާޅުވިއެވެ.
އެގޮތުން ގްރޭޓަރ މާލޭ ސިޓީ ސަރަހައްދުން ކުނި ނެގުމަށް ހަމަޖެހިފައިވާ ގަޑިތަކަށް ބަދަލު ގެނަސްފައިވާ ކަމަށް ސިރާޖް ވިދާޅުވިއެވެ. އެގޮތުން މާލޭ ސިޓީ ސަރަހައްދުން ކުނި އުކަން ހަމަޖެހިފައިވާ ގަޑިއަކީ ރޭގަނޑު 7:00ން ފެށިގެން 11:00ށް ކަމަށް ވެމްކޯއިން ބުނެއެވެ. އަދި ގޭބިސީ ތަކުން ރޭގަނޑު 6:00ން ފެށިގެން 7:00އާ ދެމެދު ކުނި ގްރައުންޑް ފްލޯއަށް ބޭލުމަށް ވަނީ އިލްތިމާސްކޮށްފައެވެ. އަދި މި މަހުގެ 15ން ފެށިގެން މާލޭ ސިޓީގެ މަގުމައްޗަށް ކުނި ނުނެރުމަށް ވެމްކޯއިން ވަނީ އިލްތިމާސްކޮށްފައެވެ.
ސިރާޖް ވިދާޅުވީ މާލޭ ސިޓީގެ ގިނަ ގޭބިސީތައް އަދިވެސް ވެމްކޯގައި ރަޖިސްޓްރީވެފައި ނުވާ ކަމަށާއި، އެކަމުގެ ސަބަބުން ކުންފުންޏަށް ބޮޑެތި ގެއްލުންތަކެއް ވަމުން އަންނަ ކަމަށެވެ. އެހެންކަމުން ކުރިޔަށް އޮތް ދުވަސްތަކުގައި ވެމްކޯއިން ނަގާނީ ހަމައެކަނި އެ ކުންފުނީގައި ރަޖިސްޓްރީވެފައިވާ ފަރާތްތަކުގެ ކުނި އެކަނި ކަމަށެވެ.
މަގުމައްޗަށް ކުނި ނެރުމަށް ނިންމީ ކޮވިޑް-19އާއެކު މާލޭ ސިޓީ ލޮކްޑައުންކުރުމުންނެވެ. ނަމަވެސް ލޮކްޑައުން ނިމި ދުވަސްތަކެއް ފާއިތުވެގެން ދިޔައިރުވެސް މާލޭ ސިޓީން ކުނި ނަގަމުން އައީ މިގޮތުގެމަތިންނެވެ. ސިޓީ ކައުންސިލުން ވަނީ މާލޭ ސިޓީގެ މަގުމައްޗަށް ކުނި ނެރެފައި ހުންނަ ވަގުތު އެކަމުގެ ސަބަބުން އާންމުންނަށް އުނދަގޫތަކެއް ކުރިމަތިވަމުން އަންނަ ކަމަށް ބުނެފައެވެ.
