އުމުރުން 13 އަހަރުގެ ކުއްޖަކު ރަހީނުކޮށް، މަރާލައި މޫދަށް އެއްލާލާފައި އޮއްވާ ފެނުނު މައްސަލައިގައި މިހާރު ލިބިފައިވާ ހެކިތަކުން މައްސަލަ ސާބިތުކުރެވޭނެ ކަމަށް ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.

ބުރާސްފަތި ދުވަހު ޕީޖީ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕީޖީ ޝަމީމް ވިދާޅުވީ, 13 އަހަރުގެ ކުއްޖާ މަރާލުމާއި ގުޅޭ ކަންކަމުގައި ހިމެނޭ މީހުން މިހާރު ހޯދިފައިވާ ކަމަށާއި، އިތުރު ބަޔަކު މިކަމުގައި އުޅޭ ކަމަށް ގަބޫލުނުކުރެވޭ ކަމަށެވެ. މިހާދިސާއާ ގުޅިގެން ފުލުހުން ސީސީޓީވީ ފޫޓޭޖުގެ އިތުރުން ގިނަ ކަންތައްތަކެއް ބަލާ ތަހުގީގުކޮށްފައިވާ ކަމަށް ޝަމީމް ވިދާޅުވިއެވެ.

މިހާރު ހުރި ހެކިތަކަށް ބަލާއިރު މައްސަލަ ސާބިތުކުރެވޭނެކަން ފާހަގަކުރައްވައި ޝަމީމް ވިދާޅުވީ މިފަދަ މައްސަލަތަކުގައި އަވަހަށް ޝަރީއަތް ކުރިއަށް ގެންދިއުމަކީ ވަރަށް މުހިންމު ކަމެއް ކަމަށެވެ.

13 އަހަރުގެ ކުއްޖަކު ރަހީނުކޮށް، މަރާލައި މޫދަށް އެއްލާލާފައި އޮއްވާ ފެނުނު މައްސަލައިގައި ހައްޔަރުކޮށްފައިވާ ދެ މީހުންގެ މައްޗަށް ގަސްތުގައި މީހަކު މެރުމުގެ ދައުވާ އުފުލައި ކްރިމިނަލް ކޯޓަށް ބުރާސްފަތި ދުވަހު ވަނީ ފޮނުވާފައެވެ.

ގަސްދުގައި މީހަކު މަރާލިކަމުގެ ދައުވާ އުފުލާފައިވަނީ 13 އަހަރުގެ ކުއްޖާގެ މަރާ ގުޅިގެން މިހާރު ހައްޔަރުކޮށްފައިވާ ނ. ލަންދޫ، ބަގީޗާގޭ އިބްރާހިމް ޒިހާންގެ އިތުރުން 17 އަހަރުގެ ފިރިހެން ކުއްޖާއަށެވެ. ޒިހާންގެ މައްޗަށް 7 ބާވަތެއްގެ 13 ދައުވާއެއް އުފުލާފައިވާއިރު، އޭނާގެ މައްޗަށް ދައުވާ ސާބިތު ވެއްޖެނަމަ 100 އަހަރުގެ ޖަލު ހުކުމެއް އަންނާނެ އެވެ.

ހުޅުމާލޭގެ ދެވަނަ ފިޔަވަހީގެ އިރުމަތީ ފަރާތު މޫދުގައި މަރާލާފައި ފޮއްޓެއްގެ ތެރެއަށްލާފައި އޮއްވާ ފެނުނު 13 އަހަރުގެ ފިރިހެން ކުއްޖާގެ ޕޯސްޓްމޯޓަމް ހަދަން ބޭރަށް ފޮނުވީ ޖުލައި 5 ވަނަ ދުވަހުއެވެ. އަދި އެކުއްޖާގެ ޕޯސްޓްމޯޓަމް ހެދުމަށްފަހު މާލެ ގެނެސް ވަޅުލާފައިވަނީ ޖުލައި 12 ވަނަ ދުވަހުއެވެ.