މަގުތައް ތަރައްޤީ ކުރުން: ހެންވޭރު އުތުރު ސެގްމަންޓްގެ އަމަލީ މަސައްކަތް ފަށައިފި
މި މަސައްކަތުގެ ދަށުން 13 މަގު ޒަމާނީ ފެންވަރަށް ތަރައްޤީ ކުރެވިގެންދާނެ
ހެންވޭރު އުތުރު ސެގްމަންޓްގެ އަމަލީ މަސައްކަތް ފެށުމަށް ބޭއްވި ރަސްމިއްޔާތު
މާލެސިޓީގެ މަގުތައް ޒަމާނީ ފެންވަރަށް ތަރައްޤީ ކުރުުމުގެ މަޝްރޫޢުގެ ދަށުން ހެންވޭރު އުތުރު ސެގްމަންޓްގެ އަމަލީ މަސައްކަތް ފަށައިފިއެވެ.
އަންގާރަ ދުވަހުގެ ހަވީރު މި މަސައްކަތް ފެށުމަށް މާލެސިޓީ ކައުންސިލާއި ރޯޑް ޑިވަލޮޕްމަންޓް ކޯޕަރޭޝަން ގުޅިގެން ވަނީ ޚާއްސަ ރަސްމިއްޔާތެއް ބާއްވާފައެވެ.
މި ރަސްމިއްޔާތުގައި ވާހަކަ ދައްކަވަމުން އާރްޑީސީގެ މެނޭޖިންގ ޑިރެކްޓަރ މޫސާ ޢަލީ މަނިކު (މޫކޭ) ވިދާޅުވީ މި މަސައްކަތުގެ ދަށުން 13 މަގު ޒަމާނީ ފެންވަރަށް ތަރައްޤީ ކުރެވިގެންދާނެ ކަމަށެވެ. އެއީ 1.97 ކިލޯ މީޓަރުގެ މަގެކެވެ.
ރަސްމިއްޔާތުގައި ވާހަކަ ދައްކަވަމުން މާލެސިޓީ ކައުންސިލްގެ މޭޔަރ ޑރ. މުޙައްމަދު މުޢިއްޒު ވިދާޅުވީ, ސިޓީ ކައުންސިލްގެ އަމާޒަކީ ރައްޔިތުންނަށް ލުއި ފަސޭހަކޮށްދިނުން ކަމަށާއި މަގުތައް ތަރައްޤީ ކުރާއިރު ބޮޑެތި މަގުތަކުގައި ތާރު އެޅުމަށް ވެސް ނިންމާފައިވާ ކަމަށެވެ.
މާލޭގެ މަގުތަކަށް ދިމާވެފައިވާ ޓްރެފިކްގެ މައްސަލަތަކާއި، ފެންބޮޑުވުމުވުގެ މައްސަލަތައް ޙައްލުކޮށް, މާލޭގެ މަގުތަކަކީ ހިނގާބިގާވެ އުޅޭ ފަރާތްތަކަށާއި ދުއްވާ އުޅަނދުތަކަށް ފަސޭހަވާގޮތަށް ތަރުތީބުކުރެވިފައިވާ ހިތްފަސޭހަ ތަނަކަށް ހެދުމުގެ މަޝްރޫޢެއް ކުރިޔަށްގެންދެވުމަށް (ވަޒީރުންގެ މަޖިލީހުގެ ލަފާފުޅާއެކު) ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނިންމަވާފައިވަނީ 2019 ވަނަ އަހަރުގައެވެ.
މާލޭގެ ސްޓްރީޓް ސްކޭޕިންގ ޑިވެލޮޕްމަންޓް ޕްލޭނަކީ މާލޭގައި ދިރިއުޅޭ ފަރާތްތަކަށް ފަހި މާހައުލެއް ޤާއިމުކުރެވިފައިވާ ތަނަކަށް ހެދުމަށްޓަކައި, (މާލެއަށް މިހާރު ދިމާވެފައިވާ ތޮއްޖެހުމުގެ މައްސަލަތަކަށް ރިޢާޔަތްކޮށް) މާލޭގެ މަގުތަކަކީ ވަކިގޮތަކަށް ތަރުތީބު ކުރެވިފައިވާ މަގުތަކަކަށް ހެދުމުގެ ބޭނުމުގައި އެކުލަވާލެވިފައިވާ ޕްލޭނެކެވެ. މި މަޝްރޫޢުގެ ޕްލޭނާ އެއްގޮތަށް މަގުތައް ހެދިގެންދާއިރު މާލޭގެ މަގުތައް ގިންތި ކުރެވި, ދުއްވާ އުޅަނދުފަހަރާއި ހިނގާބިނގާވެ އުޅޭ ފަރާތްތަކަށް ފަހި މަގުތަކަކަށް ހެދިގެންދާނެއެވެ.
މިކަމުގެ ސަބަބުން ވެހިކަލް ޕާކުކުރުމުގެ މައްސަލައަށް ޙައްލު ލިބި، ފެންހިނދުމުގެ ނިޒާމާއި ޑީވޯޓަރިންނާއި އަދި މުވާޞަލާތީ ޚިދުމަތްތައް ފޯރުކޮށްދިނުމަށް ބޭނުންކުރާ ނަރުތަކާއި، ކަރަންޓާއި، ނަރުދަމާ ނިޒާމާއި، ފެނުގެ ނިޒާމުފަދަ ޔޫޓިލިޓީޒްގެ ޚިދުމަތްތަކުގެ ނިޒާމު ވެސް އިތުރަށް ރަނގަޅު ކުރެވިގެންދާނެއެވެ. މި ޕްލޭނާ އެއްގޮތަށް މަގުތައް ގިންތި ކުރެވޭއިރު އާންމު ދަތުރުފަތުގެ ޚިދުމަތް އަލުން ތަޢާރަފުކުރެވި, މަގުތައް ފެހިކޮށް, ހިނގާބިގާވެ އުޅުމަށް ފަހި މާޙައުލެއް ޤާއިމުކުރެވި، ފައިމަގުގައި އުޅުމަށް ހިތްވަރު ލިބި މަގުތައް ބޭނުން ކުރުމަށް ވެސް އިތުރަށް ފަސޭހަތަކެއް ލިބިގެންދާނެ ކަމަށް ސަރުކާރުން ބުނެއެވެ.
