ކުއްޔަށް ދޭ ޕާކިން ސްލޮޓުތަކަށް ވެހިކަލް ރަޖިސްޓްރީކުރުމުގެ ފުރުސަތު ހުޅުވާލައިފި

ޕާކްކުރުމަށް މާލެ ސިޓީ ކައުންސިލުން ކުއްޔަށް ދޭ ޕާކިން ސްލޮޓްތަކަށް ވެހިކަލް ރަޖިސްޓްރީކުރުމުގެ ފުރުސަތު ހުޅުވާލައިފިއެވެ.

މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި މޭޔަރ ޑރ. މުހައްމަދު މުއިއްޒު ވިދާޅުވީ ޕާކިން ސްލޮޓުތައް ކުއްޔަށް ދޫކުރުމަކީ މީގެ ކުރިން ވެސް މާލެ ސިޓީ ކައުންސިލުން ކުރި ކަމެއް ކަމަށެވެ.

އިތުރު ސްލޮޓްތަކެއް ކުއްޔަށް ދޫކުރަން މިހާރު ހުޅުވާލާފައިވާކަން ފާހަގަކުރައްވައި ޑރ. މުއިއްޒު ވިދާޅުވީ މިގޮތަށް ދޫކުރާ ޕާކިން ސްލޮޓުތަކަށް ވެހިކަލް ރަޖިސްޓްރީކުުރުމުގެ ފުރުސަތު މިހާރު ހުޅުވާލާފައިވާކަމަށެވެ. މާލެ ސިޓީ ކައުންސިލާއި އެފަރާތަކާ ދެމެދު ހެދޭ އެއްބަސްވުމެއްގެ ދަށުން މިކަން ކުރެވޭނެ ކަމަށް މޭޔަރު މުއިއްޒު ވިދާޅުވިއެވެ. މިއާއެކު އެ ސްލޮޓަކީ އެ ވެހިކަލްގެ ގަރާޖުގެ ގޮތުގައި ކަނޑައެޅިގެންދާނެ ކަމަށް ޑރ. މުއިއްޒު ވިދާޅުވިއެވެ. މިގޮތަށް ކަނޑައެޅުމަށް 25،000ރ. ކުލީގެ ގޮތުގައި ނަގާނެ ކަމަށް ޑރ. މުއިއްޒު ވިދާޅުވިއެވެ.

މިގޮތަށް ހުޅުވާލާފައިވާނީ 16 އޮގަސްޓުން ފެށިގެން މާލެ އެތެރެކުރާ އުޅަނދުތަކަށް ކަމަށް ޑރ. މުއިއްޒު ވިދާޅުވިއެވެ.

ޑރ. މުއިއްޒު ވިދާޅުވީ މި ސްލޮޓަކީ އެ އުޅަނދެއް ދެމި އޮތްހާ ހިނދަކު އޮންނާނެ ސްލޮޓެއް ކަމަށެވެ. އެއީ މުސްތަގުބަލުގައި ހަދާ ޕާކިން ސްލޮޓަކުން ކަމަށް ވިޔަސް އެމީހަކަށް އެ ސްލޮޓް ކަށަވަރުވެފައި އޮންނާނެ ކަމަށް ޑރ. މުއިއްޒު ވިދާޅުވިއެވެ.