ކުނި ނަގާ އުސޫލަށް ބަދަލުގެންނަން ވެމްކޯއިން އެއްބަސްވި: ނަރީޝް
21 ވަނަ ދުވަހު ގޭގެއަށް ގޮސްގެން ކުނި ނަގަން ފަށަން ވެމްކޯއިން އެއްބަސްވި
ާމާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުން
މިހާރު ގޭގެއިން ކުނި ނެގުމުގައި އަމަލުކުރާ އުސޫލަށް ބަދަލުގެންނަން ނިންމީ ވެމްކޯއާ މަޝްވަރާކުރުމަށްފަހުގައި ކަމަށް މާލޭ ސިޓީގެ ޑެޕިއުޓީ މޭޔަރ އަހުމަދު ނަރީޝް ވިދާޅުވެއްޖެއެވެ.
މިމަހުގެ 21 ވަނަ ދުވަހުން ފެށިގެން މާލެ ސަރަހައްދުގެ ގޭބީސީތަކުން ކުނި ނަގާނީ ގޭގެއަށް ގޮސްގެން ކަމަށް ނިންމައި މާލެ ސިޓީ ކައުންސިލުން ވަނީ ވެމްކޯއަށް ސިޓީއެއް ފޮނުވާފައެވެ. އެހެންނަމަވެސް ވެމްކޯއިން ވަނީ މިފަދަ ކަމެއް ކުރަން އެއްބަސްނުވާ ކަމަށްބުނެ ނޫސްބަޔާނެއް ނެރެފައެވެ.
މިކަމާ ގުޅިގެން މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި މާލެ ސިޓީ ކައުންސިލްގެ ޑެޕިއުޓީ މޭޔަރ އަހުމަދު ނަރީޝް ވިދާޅުވީ ސިޓީ ކައުންސިލުން މި ނިންމުން ނިންމީ ވެމްކޯއާއެކު ބައްދަލުވުމެއް ބާއްވައި މިކަމުގެ މަޝްވަރާތައް ކުރުމަށް ފަހުގައި ކަމަށެވެ. އެ ބައްދަލުވުމުގައި ވެމްކޯއިން މިކަންކަން ކޮށްދޭނެކަމަށް އެއްބަސްވެފައިވާކަމަށް ނަރީޝް ވިދާޅުވިއެވެ. އެހެންނަމަވެސް ވެމްކޯގެ ފަރާތުން ފަހުން ފެނުނީ މިއާ ޚިލާފަށް އަމަލުކުރިތަން ކަމަށް ނަރީޝް ވިދާޅުވިއެވެ.
ނަރީޝް ވިދާޅުވީ ވެމްކޯއިން މިފަދަ ކަމެއް ކުރަން ނިންމާފައިނުވާކަން ފާހަގަކޮށް ބަޔާން ނެރުމުން އަނެއްކާވެސް އެ ކުންފުންޏާ ބައްދަލުކޮށްފައިވާކަމަށެވެ. އެ ބައްދަލުވުމުގައި ވެސް މިކަންކަން ކޮށްދޭނެ ކަމަށް ވެމްކޯއިން ބުނި ކަމަށް ނަރީޝް ވިދާޅުވިއެވެ. އަދި އެ ކުންފުންޏަށް ދިމާވާ ބައެއް ދަތިތައް ވެސް ހިއްސާކޮށްފައިވާ ކަމަށާއި، މިކަންކަން ހިއްސާކުރުމުން ވެމްކޯއަށް ފަސޭހަ ދުވަހަކުން އެ މަސައްކަތް ފެށުމަށް ފުރުސަތު ދީފައިވާކަމަށް ނަރީޝް ވިދާޅުވިއެވެ. އެހެންނަމަވެސް މިއަދާ ހަމައަށް ވެސް ވެމްކޯއިން ޖަވާބެއް ދީފައިނުވާކަމަށް ނަރީޝް ވަނީ ވިދާޅުވެފައެވެ.
ނަރީޝް ވިދާޅުވީ ގޭގޭގެ ބޭރަށް ކުނި ނެރެގެން ކުނި އުކުމުގެ މަސައްކަތް ކޮށްފައިވަނީ ކޮވިޑް-19ގެ ހާލަތާ ގުޅިގެން ކަމަށެވެ. އެހެންނަމަވެސް އޭރު އެޅި ގިނަ ފިޔަވަޅުތަކަކަށް މިހާރު ލުއި ދީފައިވާއިރު، ކުނި ނެގުމުގެ ކަންކަން ވެސް ގޭގެއަށް ގޮސްގެން ކުރުމުގެ ފުރުސަތު ލިބެންޖެހޭކަމަށް ނަރީޝް ވިދާޅުވިއެވެ.
މާލޭ ސިޓީ ކައުންސިލްގެ މި ނިންމުން ވެމްކޯއިން ދޮގުކުރަމުންދާއިރު ވެމްކޯއިން ވަނީ މިފަދަ ނިންމުމެއް ނިންމާފައިނުވާކަމަށް ބުނެފައެވެ. އަދި މިފަދަ ނިންމުމެއް ނިންމުމުގެ ކުރިން ސަރުކާރާއި، އެޗްޕީއޭއާ މަޝްވަރާކުރާނެ ކަމަށް ވެމްކޯއިން ބުނެފައިވެއެވެ.
