ވެމްކޯއިން ގޭގެއަށް ގޮސް ކުނި ނަގާނެ ކަމަށް ބުނެ ފަތުރަނީ ދޮގު ވާހަކައެއް!

ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން ގޭގެއަށް އަރާ ކުނި ނަގާނެ ކަމަށް ބުނެ ފަތުރަނީ ދޮގު ވާހަކަތަކެއް ކަމަށް އެ ކޯޕަރޭޝަނުން ބުނެފިއެވެ.

ވެމްކޯ އިން ނެރުނު ނޫސްބަޔާނެއްގައި ބުނީ ކޮވިޑުން ރައްކާތެރިވުމަށްޓަކައި އެޅި ހާއްސަ ފިޔަވަޅެއްގެ ގޮތުން މިދިޔަ އަހަރުގެ އޭޕްރިލް 16 ވަނަ ދުވަހުން ފެށިގެން ކުނި ނަގަމުން އަންނަނީ ގެތަކުގެ ތިރިން ކަމަށެވެ. އަދި ވެމްކޯ އިން ކުނި ނެގުމުގެ އުސޫލުތަކަށް ބަދަލުގެނެވިފައިވާ ވާހަކައަކީ ސައްހަ މައުލޫމާތެއް ނޫން ކަމަށާއި ހިދުމަތަށް ބަދަލު ގެންނަ ނަމަ އެޗްޕީއޭ އާއި ސަރުކާރުގެ ކަމާއިބެހޭ އިދާރާތަކާއެކު މަޝްވަރާ ކުރުމަށް ފަހު ގޮތެއް ނިންމާ އެކަން ރައްޔިތުންނަށް އިއުލާން ކުރާނެ ކަަމަށް ވެސް ވެމްކޯ އިން ބުންޏެވެ.

ވެމްކޯ އިން މިގޮތަށް ނޫސްބަޔާން ނެރެފައިމިވަނީ ކުރިންވެސް މާލޭ ސިޓީގައި ކުނި ނަގަމުން އައިގޮތަށް، ގޭގެއިން ކުނި ނަގާގޮތަށް ހަމަޖައްސަވަން ހުށަހަޅުއްވާނެކަމަށް  މާލޭ ސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވުމާއި ގުޅިގެންނެވެ. ވެމްކޯއާއެކު ބައްދަލުވުމެއް ބޭއްވި ކަމަށާއި ގޭގެއަށް އަރާ ކުނި ނެގުމަށް ނިންމާފައިވާ ކަމަށް ވެސް މުއިއްޒު ވިދާޅުވިއެވެ.

ވެމްކޯ އިން މިހެން ބުނެފައިވާއިރު ކޮވިޑުގެ ހާލަތުގައި ކުނި ނެގުމުގެ މަސައްކަތް ކުރިން ފޯރުކޮށްދެމުންދިޔައީ މެންދުރުގެ ވަގުތުގައެވެ. އެހެންނަމަވެސް މެންދުރުގެ ވަގުތަކީ، މާލޭގެ މަގުތަކުގައި ދުއްވާ އުޅަނދާއި، އާންމުން ގިނަ އަދަދަކަށް ހަރަކާތްތެރިވާ ވަގުތަކަށް ވުމުން އެ ކުންފުނިން ވަނީ ކުނި ނަގަމުން އައި ގަޑި ބަދަލުކޮށްފައެވެ.

ވެމްކޯގެ ހައުސްހޯލްޑް ޔުނިޓްއިން މާލޭ ސިޓީގެ ގޭބިސީތަކުން ކުނި ނެރެންވާނީ ހޮނިހިރު ދުވަހުން ފެށިގެން ބުރާސްފަތި ދުވަހަށް 08:30 އިން 00:00 އާއި ދެމެދުގެ ވަގުތެއްގައި ކަމަށް ވެމްކޯއިން ވަނީ ހާމަކޮށްފައެވެ. އަދި ހުކުރު ދުވަހު 08:30ން 11ށް އަދި 14:00ށް 00:00 ކަމަށް ވެމްކޯ އިން ބުންޏެވެ. ވިލިމާލޭ އާއި ހުޅުމާލޭގައި ވެސް ކުނި ނެރެންވާނީ މިގަޑިތަކުގައި ކަމަށް ވެމްކޯއިން ބުންޏެެވެ. މި އުސޫލަށް އަމަލުކުރަން ވާނީ މާލެ ސަރަހައްދުގެ ގޭބީސީތައް ކަމަށާއި ވެމްކޯއިން ޚިދުމަތްތައް ފޯރުކޮށްދޭނީ ކުރިއެކޭވެސް އެއްފަދައިން ޢިމާރާތުގެ ބޭރުން، ދޮރުމަތިންކަމަށް އެ ކުންފުނިން ބުނެއެވެ.

ވެމްކޯއިން އިތުރަށް ބުނީ ވެމްކޯގެ އެއްވެސް މުވައްޒަފަކު އިމާރާތެއްގެ ވަކިވަކި ފަންގިފިލާތަކުން ކުނި ނެގުމަށް ހަމަޖެހިފައި ނުވާ ކަމަށާއި މިހާލަތުގައި ވެސް ރައްކާތެރި ގޮތުގައި ކުނި ބަންދުކުރުމަށާއި އެންގިފައިވާ ވަގުތުގައި ކުނި ބަންދުކޮށްފައި ނެރުމަށް ވެމްކޯ އިން ވަނީ އިލްތިމާސްކޮށްފައެވެ.

އަދި މިފަދައިން އަމަލުނުކޮށް، އިތުރު ވަގުތުގައި މަގުތަކަށް ކުނި ނެރޭނަމަ، މަގުތައް ގޮނޑުވުމުގެ މައްސަލައަށް އެދެވިގެންވާ ފަދަ ހައްލެއް ނުލިބޭނެ ކަމަށް ބުނެ އެކަން އެގޮތަށް ނުކުރުމަށް ވެމްކޯ އިން ވަނީ ނަސޭހަތްތެރިވެފައެވެ.