ވިލިނގިލީގެ ކާފިއު ވަގުތު އުވާލުމަށް އެޗްޕީއޭގައި އެދިއްޖެ

ކޮވިޑް-19 އާ ގުޅިގެން ގއ. ވިލިނގިލީގައި އަޅާފައިވާ ކާފިއުގެ ވަގުތު އުވާލުމަށް އެރަށު ކައުންސިލުން އެޗްޕީއޭގައި އެދިއްޖެއެވެ.

ގއ. ވިލިނގިލިން ކޮވިޑްގެ ކޭސްތަކެއް ފެނިގެން މެއި މަހު 15 ވަނަ ދުވަހު އެ ރަށް މޮނިޓަރިންގެ ހާލަތަށް ގެނެވުނެވެ. ރާއްޖެ އެމްވީއަށް މައުލޫމާތު ދެއްވަމުން ވިލިނގިލި ކައުންސިލްގެ ރައީސް ވިޝާލް މުހައްމަދު ވިދާޅުވީ ފެންނަ ކޭސްތައް މިހަފްތާގެ ތެރޭގައި މަދުވެފައިވާ ކަމަށާއި، ކާފިއުގެ ވަގުތުތައް އުވާލުމަށް ކައުންސިލުން އެޗްޕީއޭގައި އެދިފައިވާކަމަށެވެ. އެހެންކަމުން މި ހަފްތާތެރޭގައި ކޮވިޑަށް ޕޮޒިޓިވްވެފައިވާ ކޭސްތަކަކީ ހޯމް ކަރަންޓީނުގައި ތިބި ފަރާތްތައް އެކަނި ކަމަށެވެ.  

ގއ ވިލިނގިއްޔަކީ އަތޮޅުގެ ވެރިކަންކުރާ ރަށަށް ވެފައި ރަށް މޮނިޓަރިންގެ ހާލަތުގައި އޮތުމުން އަތޮޅުގެ އެހެން ރަށްރަށަށް ދަތި އުދަގޫތަކަކާ ކުރިމަތިލާން ޖެހިފައިވެއެވެ. ރަށް މޮނިޓަރިންއިން ނެގުމަށް ކައުންސިލުންނާއި އެރަށު ހޮސްޕިޓަލުން އަންނަނީ ކެނޑިނޭޅި މަސައްކަތް ކުރަމުންނެވެ. އެގޮތުން ބުދަ ދުވަހުގެ ހަވީރު ރެންޑަމް ސާމްޕަލްތައް ނެގުމުގެ މަސައްކަތްތައް ކުރިއަށްގެންދިއުމަށް ނިންމާފައިވާ ކަމަށް ވެސް ވިޝާލު ވިދާޅުވިއެވެ. އަދި މޮނިޓަރިން ހާލަތުން ރަށް ނެގޭނީ މިއަދު ނަގާ ރެންޑަމް ސާމްޕަލްތަކުގެ ނަތީޖާއަށް ބެލުމަށްފަހުގައި ކަމަށް ވެސް ވިދާޅުވިއެވެ.

ވަކިގޮތެއް އަންގަންދެން، ގއ. ވިލިނގިލީގައި ކޮންމެ ދުވަހެއްގެ ހަވީރު 6:00ން ފަތިހު 4:00އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުމެއުޅުން ހުއްޓައިލުމަށް އަންގާފައިވަނީ މިދިޔަ މެއި މަހުގެ 27 ވަނަ ދުވަހުން ފެށިގެންނެވެ. އެޗްޕީއޭއިން ބުނީ މި ފިޔަވަޅުން ސިފައިންނާއި، ފުލުހުންނާއި، ޞިއްޙީ ޚިދުމަތް ދޭ އިދާރާތަކުގެ މުވައްޒަފުންނާއި، އެ މުވައްޒަފުން ދުއްވާ އުޅަނދުފަހަރާއި، އެމްބިއުލާންސާއި، ގއ. ވިލިނގިލީ ޓާސްކުފޯހުގެ ފާސް ލިބިފައިވާ ފަރާތްތަކާއި، އަދި އެމެޖެންސީކޮށް ޞިއްޙީ ޚިދުމަތް ހޯދަންޖެހޭ ފަރާތްތައް އިސްތިސްނާ ވާނެ ކަމަށެވެ.

އަދި މި އިސްތިސްނާ ހާލަތްތަކުގެ އިތުރުން، ކަނޑައަޅާ ޚާއްޞަ ހާލަތްތަކުގައި، އަންގާ ގޮތެއްގެ މަތިން ޢަމަލުކުރެވޭނެ ކަމަށެވެ. އަދި މި ފިޔަވަޅުތައް ތަންފީޒު ކުރުމުގައި ވަގުތާއި ހާލަތަށް ރިޢާޔަތްކޮށް، އަޅަންޖެހޭ އެންމެހައި ފިޔަވަޅުތައް އަޅާނީ މޯލްޑިވްސް ޕޮލިސް ސަރވިސްއާއި ކަމާބެހޭ އެހެނިހެން މުއައްސަސާތަކުން ކަމަށް އެންގެވުމުގައި ބުނެފައިވެއެވެ. އަދި މި ފިޔަވަޅުތައް ތަންފީޒުކޮށް، އެ ފިޔަވަޅުތަކަށް ފުރިހަމައަށް ޢަމަލުކުރުމަށް، އެންމެހައި އިދާރާތަކަށާއި އާންމުންނަށް އަންގައި، އަދި މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް ޢަމަލުކުރުމަށް ވެސް އެންމެހައި ފަރާތްތަކަށް އަންގާފައިވެއެވެ.

މިހާތަނަށް ގއ. ވިލިނގިލިން ކޮވިޑަށް ޕޮޒިޓިވްވެފައިވާ 173 ކޭސްއާއެކު 142 މީހަކު ވަނީ ކޮވިޑުން ފަސޭހަވެފައެވެ. އަދި މިހާރު އެކްޓިވް ކޭސްގެ ގޮތުގައި ތިބީ 30 މީހުންނެވެ. ކޮވިޑްގައި އެރަށުން ވަނީ 81 އަހަރުގެ އަންހެނަކު ނިޔާވެފައެވެ.