ކާފިއު ވަގުތަށް ބަދަލު ނުގެނެސް ގއ. ވިލިނގިލިގައި އަޅާފައިވާ ފިޔަވަޅުތަކަށް ލުއި ދީފި

ކޮވިޑް-19 އާއި ގުޅިގެން އިއުލާނުކޮށްފައިވާ ކާފިއުގެ ވަގުތަށް ބަދަލު ގެނައުމެއްނެތި، ގއ. ވިލިނގިލީގައި އަޅާފައިވާ ފިޔަވަޅުތަކަށް ލުއި ދީފިއެވެ.

ބުރާސްފަތި ދުވަހުގެ ރޭ ހެލްތު ޕްރޮޓެކްޝަން އެޖެންސީ ނެރުނު އެންގެވުމުގައި ބުނެފައިވަނީ، ވަކިގޮތެއް އަންގަންދެން، ގއ. ވިލިނގިލީގައި ކޮންމެ ދުވަހެއްގެ ހަވީރު 6:00ން ފަތިހު 4:00އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުމެއުޅުން ހުއްޓައިލުމަށް އަންގާ ކަމަށެވެ. އަދި މި ފިޔަވަޅުން ސިފައިންނާއި، ފުލުހުންނާއި، ޞިއްޙީ ޚިދުމަތް ދޭ އިދާރާތަކުގެ މުވައްޒަފުންނާއި، އެ މުވައްޒަފުން ދުއްވާ އުޅަނދުފަހަރާއި، އެމްބިއުލާންސާއި، ގއ. ވިލިނގިލީ ޓާސްކުފޯހުގެ ފާސް ލިބިފައިވާ ފަރާތްތަކާއި، އަދި އެމެޖެންސީކޮށް ޞިއްޙީ ޚިދުމަތް ހޯދަންޖެހޭ ފަރާތްތައް އިސްތިސްނާ ވާނެ ކަމަށެވެ.

އަދި މި އިސްތިސްނާ ހާލަތްތަކުގެ އިތުރުން، ކަނޑައަޅާ ޚާއްޞަ ހާލަތްތަކުގައި، އަންގާ ގޮތެއްގެ މަތިން ޢަމަލުކުރެވޭނެ ކަމަށެވެ. އަދި މި ފިޔަވަޅުތައް ތަންފީޒު ކުރުމުގައި ވަގުތާއި ހާލަތަށް ރިޢާޔަތްކޮށް، އަޅަންޖެހޭ އެންމެހައި ފިޔަވަޅުތައް އަޅާނީ މޯލްޑިވްސް ޕޮލިސް ސަރވިސްއާއި ކަމާބެހޭ އެހެނިހެން މުއައްސަސާތަކުން ކަމަށް އެންގެވުމުގައި ބުނެފައިވެއެވެ. އަދި މި ފިޔަވަޅުތައް ތަންފީޒުކޮށް، އެ ފިޔަވަޅުތަކަށް ފުރިހަމައަށް ޢަމަލުކުރުމަށް، އެންމެހައި އިދާރާތަކަށާއި ފަރާތްތަކަށް އަންގާ، އަދި މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް ޢަމަލުކުރުމަށް ވެސް އެންމެހައި ފަރާތްތަކަށް އަންގާފައިވެއެވެ.

މި މަހުގެ 20 ވަނަ ދުވަހު ވިލިނގިލީގައި ފިޔަވަޅުތައް އަޅަން ނިންމީ އެ ރަށުން ކޮވިޑްގެ ކޭސްތަކެއް ފެނުމާއި ގުޅިގެންނެވެ. އެގޮތުން 20 މެއިން 26 މެއިގެ ނިޔަލަށް ހަރުކަށި ފިޔަވަޅުތަކެއް އަޅާ ތަންފީޒުކޮށްފައިވެއެވެ. ކޮވިޑާއި ގުޅިގެން މިހާތަނަށް އެރަށުގައި 43 މީހަކު ވަނީ ޕޮޒިޓިވްވެފައެވެ. އަދި އެރަށުގައި ހުންނަ ކޮވިޑް ފެސިލިޓީގައި ފަރުވާދެމުން ދިޔަ މީހަކު ވަނީ ނިޔާވެފައެވެ. ބުރާސްފަތި ދުވަހު ވެސް އެރަށުން 4 މީހަކު ވަނީ ޕޮޒިޓިވްވެފައެވެ. އަދި މިހާތަނަށް 475 މީހަކު ވަނީ ކަރަންޓީންކޮށްފައެވެ.