ސިޓީން ލީގު ތަށި އުފުލާލިއިރު، އަގުއޭރޯއަށް ރިކޯޑެއް

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ އެވަޓަން ބަލިކުރި މެޗަށްފަހު މެންޗެސްޓާ ސިޓީން ލީގު ތަށި އުފުލާލިއިރު، އެ ޓީމު ދޫކޮށްލަން ނިންމާފައިވާ ތަޖުރިބާކާރު ފޯވާޑް ސާޖިއޯ އަގުއޭރޯ ރިކޯޑެއް ހަދައިފިއެވެ.

އަމިއްލަ ދަނޑުގައި ކުޅުނު މެޗުން ސިޓީ މޮޅުވީ ފަސޭހަކަމާއެކު 5-0 ގެ ނަތީޖާއަކުންނެވެ.

ސިޓީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ 11 ވަނަ މިނެޓުގައި ކެވިން ޑި ބްރޭނާ ވަނީ އެ ޓީމަށް ލީޑު ނަގައިދީފައެވެ. އަދި އޭގެ ތިން މިނެޓު ފަހުން ގަބްރިއެލް ޖީސޫސް ސިޓީއަށް ލީޑު ފުޅާކޮށްދިންއިރު، ދެވަނަ ހާފު ފަށައިގެން އަށްވަނަ މިނެޓުގައި ފިލް ފޯޑެން ވަނީ އެ ޓީމުގެ ތިންވަނަ ލަނޑު ޖަހާފައެވެ.

ދެން މި މެޗުގައި ސިޓީން ކާމިޔާބުކުރި އަނެއް ދެ ލަނޑު އެ ޓީމަށް ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އަގުއޭރޯއެވެ. އެއާއެކު އަގުއޭރޯ ވަނީ ޕްރިމިއާ ލީގުގެ ތާރީޚުގައި އެއް ކުލަބަކަށް އެންމެ ގިނަ ލަނޑު ޖެހުމުގެ ރިކޯޑު ގާއިމުކޮށްފައެވެ. އެގޮތުން އަގުއޭރޯ 184 ލަނޑު ހަމަކޮށްފައިވާއިރު، މީގެ ކުރިން މި ރިކޯޑު އޮތީ މެންޗެސްޓާ ޔުނައިޓެޑަށް 183 ލަނޑު ޖަހާދީފައިވާ ވޭން ރޫނީގެ އަތުގައެވެ.

ލީގުގެ ފަހުން މެޗުން ހޯދި މޮޅާއެކު ސިޓީން ލީގު ނިންމާލީ 86 ޕޮއިންޓާއެކުއެވެ. މި ސީޒަނުގެ ލީގު ޗެމްޕިއަންކަން ސިޓީން ހޯދިއިރު، މިއީ އެ ޓީމުން ޕްރިމިއާ ލީގު ކާމިޔާބުކުރި ފަސްވަނަ ފަހަރެވެ. އަދި މިއީ ކޯޗު ޕެޕް ގާޑިއޯލާގެ އިރުޝާދުގެ ދަށުން ސިޓީން ލީގު ޗެމްޕިއަންކަން ހޯދި ތިންވަނަ ފަހަރެވެ.