ރިލްވާންގެ މައްސަލަ އިސްތިއުނާފު ކުރަން ދައުލަތުން ފޮނުވާފައެއް ނުވޭ: ހައިކޯޓު
10 އޯގަސްޓު 2019 | ހޮނިހިރު 06:31ރިލްވާނު ގެ މައްސަލަ އިސްތިޢުނާފު ކުރުމަށް ޤަސްދުކުރައްވާކަމަށް ވިދާޅުވެ، 2018 ވަނަ އަހަރު ޕީޖީ އޮފީހުގެ ފަރާތުން ދިވެހިރާއްޖޭގެ ހައިކޯޓަށް ސިޓީއެއް ފޮނުއްވި
މިނިވަން ނޫހުގެ ނޫސްވެރިޔާ އަހްމަދް ރިލްވާނު އާއި އޭނާގެ މަންމަ
ރިލްވާންގެ މައްސަލަ އިސްތިއުނާފް ކުރަން ދައުލަތުން ފޮނުވާފައެއް ނުވާ ކަމަށް ހައިކޯޓުން ބުނެފިއެވެ.
ހައިކޯޓުން މިހެން ބުނެފައިވަނީ ރިލްވާނުގެ މައްސަލަ އިސްތިޢުނާފު ކުރުމުގެ ހުއްދަ ދެއްވުމަށް އެދި ހުށަހަޅުއްވާފައިވާ ކަމަށް ބުނެ، ޕްރޮސިކިއުޓަރ ޖެނެރަލްގެ އޮފީހުން ކުރައްވާފައިވާ ޓްވީޓާ ގުޅިގެންނެވެ.
ހައިކޯޓުން ނެރުނު ބަޔާނުގައި ވަނީ ރިލްވާނު ގެ މައްސަލަ އިސްތިޢުނާފުކުރުމަށް ޤަސްދުކުރައްވާކަމަށް ވިދާޅުވެ، 2018 ވަނަ އަހަރުގެ އޮގަސްޓު މަހުގެ 2 ވީ ބުރާސްފަތި ދުވަހު، ޕީޖީ އޮފީހުގެ ފަރާތުން ދިވެހިރާއްޖޭގެ ހައިކޯޓަށް ސިޓީއެއް ފޮނުއްވާފައިވާ ކަމަށެވެ. އެގޮތުން އެ ސިޓީގައި ރިލްވާނުގެ މައްސަލަ އިސްތިޢުނާފު ކުރެއްވުމަށް ޤަސްދުކުރައްވާތީ، އެ މައްސަލައިގެ ޝަރީޢަތް ނިމުމުގެ ގޮތުގެ ރިޕޯޓް ލިބިވަޑައިގަތުމުން މައްސަލަ އިސްތިޢުނާފު ކުރުމަށް ހުށަހެޅުއްވުމުގެ ހުއްދަ ދެއްވުން އެދިވަޑައިގެންފައިވާ ކަމަށް ބަޔާނުގައި ވެއެވެ.
އަދި މައްސަލައާއި ގުޅިގެން ހައި ކޯޓާއި ޕްރޮސިކިއުޓަރ ޖެނެރަލްގެ އޮފީހާއި ދެމެދު މީގެ އިތުރުން އެއްވެސް މުޢާމަލާތެއް ކޮށްފައި ނުވާ ކަމަށް ވެސް ބަޔާނުގައި ވެއެވެ. އަދި ހައި ކޯޓުން ޕީޖީ އޮފީހަށް ޖަވާބު ދީފައިވީ ނަމަވެސް، އެ ފަހުން އެއް އަހަރު ދުވަސްވެފައިވާއިރުވެސް މައްސަލަ އިސްތިޢުނާފު ކުރައްވާކަށް ވެސް އަދި އިސްތިޢުނާފު ކުރުމުގެ ހުއްދައަށް ވެސް އެދި އެ ކޯޓަށް ފޮނުއްވާފައި ނުވާކަމަށް ވެއެވެ.
ހައިކޯޓުން ވަނީ ރައްޔިތުންގެ ހިތްތަކުގައި ދިވެހިރާއްޖޭގެ ހައިކޯޓުގެ އަގު ވެއްޓޭ ގޮތަށް ވާހަކަފުޅު ނުދެއްކެވުމަށާއި ކަމުގެ ހަގީގަތް އޮޅޭ ގޮތަށް ޓްވީޓު ނުކުރެއްވުމަށް ޕްރޮސިކިއުޓަރ ޖެނެރަލްގެ އޮފީހަށް އިލްތިމާސް ކޮށްފައެވެ.
ފުރަތަމަ މަރުހަލާގެ ކޯޓަކުން ނުވަތަ ޓްރައިބިއުނަލްއަކުން ނިންމާ ނިންމުން އިސްތިޢުނާފަށް މައްސަލަ ހުށަހަޅަން ޖެހޭ މުއްދަތުކަމުގައި ދުވަސް ފާއިތުވުމަށް ފަހު ހުށަހަޅާ މައްސަލައެއްނަމަ، އެ މައްސަލައެއް ހުށަހަޅަން ޖެހޭނީ ހައިކޯޓުގެ ގަވާއިދުގެ 29 ވަނަ މާއްދާގެ (ނ) ގެ ދަށުން އިސްތިޢުނާފުކުރުމުގެ ހުއްދައަށް އެދިކަމުގައި ކަމަށާއި މި މާއްދާގެ ދަށުން މައްސަލަ ހުށަހެޅުމުން ގަވައިދާ އެއްގޮތްވާ ގޮތުގެ މަތިން އެ މައްސަލައަކާއި މެދު ގޮތެއް ނިންމޭނެ ކަމުގައި ހައިކޯޓުން 2018 އޮގަސްޓް މަހުގެ 6 ދުވަހުގައި ދިން ޖަވާބުގައި ވާކަމަށް ބަޔާނުގައިވެއެވެ.
