ތަހުގީގު ޓީމްއަކީ ރިޔާސީ ކޮމިޝަނާއި އެންޓި ކޮރަޕްޝަން ކޮމިޝަން (އޭސީސީ) ގެ އިތުރުން ފުލުހުން ހިމެނޭ ޓީމެއް
އެސިސްޓެންޓް ކޮމިޝަނާރ މުހައްމަދު ރިޔާޒް ރައްޔިތުންގެ މަޖިލީހުގެ ކޮމެޓީގައި
ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއަރުސީގެ ބޮޑު ޚިޔާނާތުގެ މައްސަލަ ބެލުމަށްޓަކާ ތަހުގީގު ޓީމެއް އެކުލަވާލުމުގެ މަސައްކަތް ކުރިއަށް ދާކަމަށް އެސިސްޓެންޓް ކޮމިޝަނާރ އޮފް ޕޮލިސް މުހައްމަދު ރިޔާޒް ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ހާޒިރުވެވަޑައިގެން މެމްބަރުން ކުރިމަތިކުރެއްވި ސުވާލުތަކަށް ޖަވާބުދެއްވަމުން ރިޔާޒް ވިދާޅުވީ ޖޮއިންޓް ތަހުޤީޤް ޓީމްގައި ހިމެނެނީ ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ) އާއި ރިޔާސީ ކޮމިޝަން ކަމަށެވެ. އަދި މި ހަފްތާ ނިމުމުގެ ކުރިން ލިޔެކިޔުންތަކުގެ މަސައްކަތް ނިންމާލެވޭނެކަމަށް އުއްމީދުކުރައްވާކަމަށް ރިޔާޒް ވިދާޅުވި އެވެ.
މެމްބަރުން ކުރިމަތިކުރެއްވި ސުވާލުތަކަށް ޖަވާބުދެއްވަމުން ރިޔާޒް ވިދާޅުވީ ތަހުގިގު ޓީމެއް މިވަގުތު ނެތްނަމަވެސް ތިން ފަރާތްތަކުގެ މެދުގައި މިމައްސަލައާއި ގުޅޭގޮތުން މައުލޫމާތު ބަދަލުކުރެވޭކަމަށެވެ. ނަމަވެސް ކޮމިޓީގެ އެ ބައްދަލުވުމަކީ މީޑިއާ އަށް ހުޅުވާލެވިފައި އޮތް އާންމު ބައްދަލުވުމަކަށްވުމުން މި މައްސަލައާއި ގުޅިގެން ތަފްސީލު ދެއްވުމަށް ރިޔާޒް ވަނީ އުޒުރު ވެރި ވެލައްވާފައެވެ.
އޭނާ ވިދާޅުވީ ކުރީގެ ސަރުކާރުގެ އިސްވެރިންގެ މަސްލަހަތު ހިމެނޭ މައްސަލައަކަށްވެފައި މި މައްސަލައިގެ ތަހުގީގުތައް މިހާރުވެސް ކުރިއަށްދާތީ ސިއްރު ކޮމެޓީއެއްގައި ތަފްސީލުތައް މެމްބަރުންނަށް އަރުވާނެކަމަށެވެ.
އެމްއެމްޕީއާރުސީގެ 1.3 ބިލިއަން ރުފިޔާގެ ޚިޔާނާތުގެ މައްސަލައިގައި ބީއެމްއެލްގެ މައްސަލަތަކެއްވެސް ތަހުގީގު ކުރެވެމުންދާއިރު، އެސްއޯއެފްގެ ޑޮލަރު އެކައުންޓަށް މައިގަނޑު ގޮތެއްގައި ވަދެފައިވަނީ ރަށްތަކާއި ފަޅުތައް ކުއްޔަށް ދޫކޮށްގެން ލިބުނު ފައިސާތައްކަމަށް ވެސް ރިޔާޒް ފާހަގަ ކުރެއްވިއެވެ.
