މުލީގެ މަގުތަކަށް ނަޖިސް ބޭރުވާ މައްސަލަ ބޮޑުވެއްޖެ
10 ނޮވެމްބަރު 2018 | ހޮނިހިރު 13:26މަގުތަކަށް ނަޖިސް ބޭރުވާތާ 5 މަހަށް ވުރެ ގިނަ ދުވަސް ވަނީ ވެފައި
މުލީގެ މަގުމަތަކަށް ނަޖިސް ފެން ބޭރުވެ ފެން ބޮޑުވެފައި: ފޮޓޯ: ކައުންސިލް
މ. މުލީގައި ނަރުދަމާ ޕަމްޕުތައް ހަލާކުވެ މަގުތަކަށް ގިނަ އަދަދަކަށް ނަޖިސްފެން ބޭރުވަމުންދާ މައްސަލަ ބޮޑުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން މުލީ ކައުންސިލްގެ ރައީސް އިބްރާހިމް ޒަކީ ވިދާޅުވީ އެރަށުގައި ނަރުދަމާ ނިޒާމް ގާއިމް ކުރީ ރައީސް ނަޝީދުގެ ވެރިކަމުގައި ކަމަށާއި، ނަމަވެސް ނަރުދަމާގެ ނިޒާމު ބަލަހައްޓާފައި ނުވާ ކަމަށެވެ. އެގޮތުން ފާއިތުވެދިޔަ ފަސް އަހަރު ނަރުދަމާގެ ޕަންޕުތައް މަރާމާތުކޮށްފައިވާ ނުވާ ކަމަށް އޭނާ ވިދާޅުވިއެވެ.
ޒަކީ ވިދާޅުވީ މަގުތަކަށް ނަޖިސް ބޭރުވާތާ 5 މަހަށް ވުރެ ގިނަ ދުވަސްވެފައިވާ ކަމަށާއި، މިމައްސަލަ ސަރުކާރުގެ ކަމާބެހޭ ހުރިހާ މުއައްސަސާއެއްގެ ސަމާލު ކަމަށް ގެނެސްފައިވާ ކަމަށެވެ. އަދި ފެނަކަ ކޯޕްރޭޝަންގެ އިސްބޭފުޅުންނާއި ބައްދަލުކޮށް މިމައްސަލަ ހައްލުކޮށްދިނުމަށް އެދިފައިވާ ކަމަށާއި ހައްލު ކޮށްދޭނެ ކަމަށް ސަރުކާރުގެ އިސްބޭފުޅުން ވެސް ވިދާޅުވެފައިވިޔަސް އެއްވެސް ހައްލެއް ލިބިފައިނުވާ ކަމަށް ޒަކީ ވިދާޅުވިއެވެ.
"2008 ވަނަ އަހަރު ރައީސް ނަޝީދުގެ ވެރިކަމުގައި ނަރުދަމާ ނިޒާމު ގާއިމް ކުރީ ލަންކާ ކުންފުންޏަކުން. މިހާރު ގާއިމް ކުރާ ނަރުދަމާ ނިޒާމާ ތަފާތުވި ނަމަވެސް ރަނގަޅު ފެންވަރަކަށް ގާއިމްކޮށްފައި ހުރީ. އެކަމަކު މިފާއިތުވެގެން ދިޔަ ފަސް އަހަރު މަރާމާތުގެ އެއްވެސް މަސައްކަތެއް ކޮށްފަ ނުވޭ. މަރާމާތު ނުކުރާ ނަމަ ކޮންމެ އެއްޗެއް ވެސް ހަލާކުވާނެ. މިހެން ކޮންމެ ދުވަހަކު ނަޖިސް ފެން ބޭރުވާތާ ފަސް މަސް ދުވަހަށްވުރެ ގިނަ ދުވަސް ވެދާނެ. އެކަމަކު މާކުރިން މިމައްސަލަ ފެނިއްޖެ" ޒަކީ ވިދާޅުވިއެވެ.
ޒަކީ ވިދާޅުވީ މިއަދަކީ އެރަށަށް ވިއްސާރަ ދުވަހެއް ނޫން ކަމަށާއި، ނަމަވެސް ރަށުގެ އެއްފަޅި ވާރޭވެހިގެން ފެންބޮޑުވާ ގޮތަށް ނަޖިސްފެންގަނޑު ބޮޑުވެފައި އޮތް ކަމަށެވެ. މިހެން ނަޖިސް ފެން ބޭރުވުމުން ފެނަކައިގެ މުއައްޒަފުން ނުކުމެ މެނުއަލް ޕަންޕުތަކުން ފެންގަނޑު ހިންދަނީ ކަމަށް ޒަކީ ވިދާޅުވިއެވެ.
މީގެ އިތުރަށް ޒަކީ ވިދާޅުވީ ނަޖިސް މަގުމައްޗަށް ބޭރުވާތީ އެކަމުގެ ޝަކުވާ ރައްޔިތުން ކުރާތާ އެތައް ދުވަހެއް ވެފައިވާ ކަމަށާއި، ދާއިމީ ހައްލެއް ނުލިބޭތީ އެކަމާއި ހިތާމަ ކުރާ ކަމަށެވެ. އަދި ގޭގޭގެ ދޮރުމަތީގައި ނަޖިސް ފެންގަނޑު ހެދިފައި އޮންނާތީ ގިނަ ދަތިތަކަކާ ކުރިމަތިލާންޖެހިފައިވާ ކަމަށް އޭނަ ވިދާޅުވިއެވެ.
މަގަށް ނަޖިސް ފެން ބޭރުވާތާ އެތައް ދުވަހެއް ވަނީ ވެފައި
ފާހާނާ ނަޖިސް ގިނަ އަދަދަކަށް ރަށުތެރެއަށް ފެތުރޭތީ ބަލިމަޑުކަމެއް ރަށަށް ފެތުރިދާނެ ކަމުގެ ބިރު އެބައޮތްކަން ފާހަގަކުރައްވައި ޒަކީ ވިދާޅުވީ ޑެންގޫ ހުމާއި، ރޯގާ ޖެހިގެން ޑޮކްޓަރަށް ދައްކާމީހުންގެ އަދަދު އިތުރުވެފައިވާ ކަމަށެވެ.
އާބާދީގައި ހާހެއްހައި މީހުން ދިރިއުޅޭ މުއްޔަށް ތަފާތު އެކި ބޭނުންތަކުގައި އެތޮޅުގެ ގިނަ ރަށްރަށުގެ މީހުން އެރަށަށް ޒިޔާރަތް ކުރެއެވެ. އެއަތޮޅުގެ ވެރިކަން ކުރާ ރަށަކީ މުއްޔަށްވާއިރު ބެންކް ޚިދުމަތް ލިބޭ ރަކަށް ހުރީ އެރަށް އެކަންޏެވެ.
