ޕޮލިހަށް މައްސަލަ ހުށަހެޅުން ވެގެންދާނީ އަމިއްލަ ކަރަށް މަހާލާ މަޅިއަކަށް: މަހްލޫފް
ވޯޓުންވެސް ކޯޓުންވެސް ވާނީ ބަލިކޮށްފައި
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މަހްލޫފް
ޕީޕީއެމުން އިންތިޚާބާ ގުޅޭގޮތުން ޕޮލިހަށް ހުށަހަޅާ މައްސަލަ މިފަހަރު ވެގެންދާނީ އަމިއްލަ ކަރަށް މަހާލާ މަޅިއަކަށްކަން އެނގެންވާނެ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ވިދާޅުވެއްޖެއެވެ.
އިންތިޚާބު ބާތިލް ކުރާނެ ތަނެއް ނެތް ކަމަށް ސުޕްރީމް ކޯޓުން ނިންމުމާއެކު އާދީއްތަ ދުވަހުގެރޭ ޕީޕީއެމުން ބޭއްވި ޕްރެސް ކޮންފަރެންސެއްގައި އެޕާޓީން ބުނީ ނިމިދިޔަ ރިޔާސީ އިންތިޚާބުގައި ހިންގާފައިވާ ޖިނާއީ މައްސަލަތައް ތަހުގީގް ކުރުމަށް ފުލުހުންނަށް ހުށަހެޅުމަށް ނިންމާފައިވާ ކަމަށެވެ.
އެގޮތުން އެޕާޓީގެ ނައިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު ޢަބްދުއް ރަހީމް ޢަބްދުﷲ ވިދާޅުވީ ސުޕްރީމް ކޯޓުން ކުރި ޙުކުމަށް އިހްތިރާމް ކުރައްވާ ކަމަށާއި އެހެންނަމަވެސް އެހުކުމުގައިވާ ގޮތަށް އިންތިޚާބުގެ ތެރޭގައި ހިންގާފައިވާ ޖިނާއީ ކަންކަން ތަހުގީގު ކޮށްދިނުމަށް އެދި ފުލުހުންނަށް ހުށަހަޅުއްވައިގެން ޙައްޤު ހޯދުމަށް މަސައްކަތް ކުރައްވާނެ ކަމަށެވެ.
އަދުރޭ މިހެން ވިދާޅުވެފައިވަނިކޮށް މަހްލޫފް ހޯމަ ދުވަހު ކުރެއްވި ޓްވީޓެއްގައި ވިދާޅުވީ ﷲ އިރާދަފުޅާއެކު ވޯޓުން ބަލިކޮށްފިން ކަމަށާއި ކޯޓުން ވެސް ބަލިކޮށްފިން ކަމަށެވެ. އަދި އިރާދަކުރެއްވިއްޔާ ފުލުހުންގެ ތެރެއިން ވެސް ބަލި ކުރައްވާނަން ކަމަށެވެ.
މީގެ އިތުރުން މަހްލޫފް ވިދާޅުވެފައިވަނީ ފުލުހަށް ހުށަހަޅާ މައްސަލައަކީ އަމިއްލަ ކަރަށް މަހާލާ މަޅިއެއްކަން މިފަހަރު އިނގެންވާނެ ކަމަށެވެ.
ނިމިދިޔަ ރިޔާސީ އިންތިޚާބުން ރައީސް ޔާމީން ބޮޑުތަނުން ބަލިވެވަޑައިގަތުމުން އެމަނިކުފާނު ވަނީ އިންތިޚާބު ބާތިލް ކުރުމަށް ސުޕްރީމް ކޯޓަށް ހުށަހަޅުއްވާފައެވެ. ސުޕްރީމް ކޯޓުން އެމައްސަލަ ބެއްލެވުމަށް ފަހު އެކޯޓުގެ 5 ފަނޑިޔާރުންގެ އިއްތިފާގުން ނިންމަވާފައިވަނީ އިންތިޚާބު ބާތިލްކުރާނެ ތަނެއް ނެތް ކަމަށް ނިންމަވާފައެވެ.
