ހިއްސާދާރުންގެ މެދުގައި ޖެހުނު މައްސަލަ ހައްލުކޮށް، ހޮސްޕިޓަލް ހިންގުމާއި ހަވާލުވާނަން: ނޫރުލް އިސްލާމް

ކުންފުނީގެ ހިއްސާދާރުންގެ މެދުގައި އުފެދިފައިވާ ދެބަސްވުންތައް ހައްލުކުރުމަށްފަހު، ހޮސްޕިޓަލް ހިންގުމާއި ހަވާލުވުމުގެ މަސައްކަތް ކުރަމުންދާ ކަމަށް، ހދ. ކުޅުފުއްފުށީ ރީޖަނަލް ހޮސްޕިޓަލް ތަރައްގީކޮށް ހިންގުމަށް ހަވާލުކޮށްފައިވާ ނޫރުލް އިސްލާމް އިންޓަނޭޝަނަލް ކުންފުނިން ބުނެފި އެވެ.

ކުޅުދުއްފުށީ ހޮސްޕިޓަލް ޓަަރޝަރީ ހޮސްޕިޓަލް ފެންވަރަށް ތަރައްގީކޮށް ހިންގަން، ނޫރުލް އިސްލާމް އިންޓަނޭޝަނަލްއާ ހަވާލުކޮށްފައިވީ ނަމަވެސް، އެއްބަސްވުމާ އެއްގޮތަށް ކަންކަން ކުރިއަށް ނުދާތީ ހެލްތް މިނިސްޓްރީއިން ވަނީ ޑިސެމްބަރު މަހުގެ ތެރޭގައި ހޮސްޕިޓަލުގެ ހިންގުމާ ހަވާލުވެފައެވެ.

Advertisement

ނޫރުލް އިސްލާމް ކުންފުންޏަކީ، އިންޑިއާގެ ނިމްސް ކުންފުންޏާއި ދިވެހި ހިއްސާދާރަކު ހިމެނޭ ގޮތަށް އުފައްދާފައިވާ ކުންފުންޏެކެވެ.

ނޫރުލް އިސްލާމް ކުންފުނިން ނެރުނު ބަޔާނެއްގައިވާ ގޮތުގައި، އެއްބަސްވުމާއި އެއްގޮތަށް ކަނޑައެޅިފައިވާ އަމާޒުތަކަށް ވާސިލުވުމަށް ބައެއް ހުރަސްތައް ކުރިމަތިވި ނަމަވެސް، އެ ހުރަސްތައް ގިރާކޮށް ކުޅުދުއްފުށީ ހޮސްޕިޓަލް ޓަރޝަރީ ހޮސްޕިޓަލެއްގެ ގޮތުގައި ތަރައްގީކުރުމަށް ކުރަންޖެހޭ މަސައްކަތްތައް ސަރުކާރާ ގުޅިގެން ދަނީ ކުރެވެމުންނެވެ.

ބަޔާނުގައިވާ ގޮތުގައި، ހޮސްޕިޓަލް ތަރައްގީ ކުރުމަށް ކުރަންޖެހޭ މަސައްކަތްތަކުގައި "އުނދަގޫތަކެއް" ކުރިމަތިވެފައިވަނީ ހިއްސާދާރުންގެ މެދުގައި އޮންނަންޖެހޭ ގުޅުން ހީނަރުވެ، މަސައްކަތްތައް ނިންމުމަށް ލިބެންޖެހޭ އެއްބާރުލުން ދިވެހި ހިއްސާދާރުންގެ ފަރާތުން ނުލިބިގެންނެވެ.

އެގޮތުން، މަލްޓި ސްޕެޝަލްޓީ ޑޮކްޓަރުން ގެނެއުމަށް ބޭނުންވާ ވިސާ ކަންތައް ހަމަޖެއްސުމާއި، ސީޓީ ސްކޭން މެޝިނާއި އިކޯ ސައުންޑް މެޝިން ރާއްޖެއަށް ގެނައިތާ ދެމަސް ފާއިތުވިއިރު، ކަސްޓަމްސް އިން ކްލިއަރެންސް ހެދުމަށާއި އިދާރީގޮތުން ނިންމަންޖެހޭ ކަންކަން ފުރިހަމަކުރުމަށް ހުރަސްތައް ދިމާވެފައިވާ ކަމަށް އެ ކުންފުނިން ބުނެ އެވެ.

އެ ކުންފުނިން ބުނީ، ހިއްސާދާރުންގެ މެދުގައި އުފެދިފައިވާ ދެބަސްވުންތައް ސަރުކާރުގެ އެހީތެރިކަމާއެކު ހައްލުކޮށް، އެއްބަސްވުންތަކާއި ގުޅިގެން ލާޒިމުވާ ޒިންމާތަކާއި އިލްތިޒާމްތައް އެއްބަސްވުމާ އެއްގޮތަށް އަދާކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށެވެ. ހޮސްޕިޓަލުގެ ހިންގުމާއި ރަސްމީކޮށް ހަވާލުވުމުގެ ގޮތުން ވާންޖެހޭ ތައްޔާރީތައް ބާރުމިނުގައި ކުރަމުން ގެންދާ ކަމަށް ވެސް އެ ކުންފުނިން ބުނެ އެވެ.

އެ ކުންފުނިން ބުނާ ގޮތުގައި، އެމްއާރްއައި މެޝިނާއި އެހެން މެޝިނަރީސްތައް އަވަސް މުސްތަގުބަލެއްގައި ރާއްޖެ ގެނެވޭނެ އެވެ. އަދި ހޮސްޕިޓަލުގައި މަސައްކަތް ކުރުމަށް އެކި ދާއިރާތަކުން 20 ސްޕެޝަލިސްޓް ޑޮކްޓަރުން ގެނެއުމަށް ކުރަންޖެހޭ މަސައްކަތްތައް ކުރަމުންދާ ކަމަށް ވެސް ބުނެފައިވެއެވެ.

ނޫރުލް އިސްލާމުން މިފަދަ ބަޔާނެއް ނެރުނުއިރު، ހޮސްޕިޓަލް ތަރައްގީކުރުމުގައި ދިމާވި ގޮންޖެހުންތައް ބަޔާންކޮށް އެކުންފުނިން ވަނީ ރައީސް އަބްދުﷲ ޔާމީނަށް ސިޓީއެއް ވެސް ފޮނުވާފަ އެވެ. އެ ސިޓީގައިވާ ގޮތުގައި، ކުންފުނީގެ ޑައިރެކްޓަރުންގެ ގޮތުގައި ކަނޑައަޅާފައިވާ ދިވެހިންގެ އެކައުންޓުތަކަށް ފައިސާ ފޮނުވުމުން ނަހަމަ ގޮތުގައި ފައިސާ ވަނީ ބޭނުންކޮށްފަ އެވެ. އަދި ކުންފުނީގެ ހުއްދަ ހޯދުމެއް ނެތި ޑައިރެކްޓަރުން ބައެއް ކަންކަން ކޮށްފައިވާ ކަމަށް ވެސް އެކުންފުނިން ތުހުމަތު ކުރެ އެވެ.

އެހެން ނަމަވެސް، އެ ތުހުމަތުތައް ދިވެހި ހިއްސާދާރު ދޮގުކުރެ އެވެ.