ހާޝިމްގެ މައްސަލަ ބެލުމަށް އެލްޖީއޭގެ ޓީމެއް ދިއްދުއަށް
ހާޝިމް ސަސްޕެންޑްކޮށްފައިވަނީ ބުރާސްފަތި ދުވަހު
ދިއްދޫ ކައުންސިލްގެ ރައީސް ހާޝިމް ދީދީ
ހއ.ދިއްދޫ ކައުންސިލްގެ ރައީސް އަލީ ހާޝިމް ދީދީގެ މައްސަލަ ބެލުމަށް އެލްޖީއޭގެ ޓީމެއް އެރަށަށް ހިނގައްޖެ އެވެ.
ދިއްދޫ ކައުންސިލްގެ ރައީސް ހާޝިމް ވިދާޅުވީ، ލޯކަލް ގަވާންމެެންޓް އޮތޯރިޓީ (އެލްޖީއޭ) ގެ ލީގާލް ޑިޕާޓްމެންޓްގެ ހަތަރު ބޭފުޅުން ހޮނިހިރު ދުވަހުގެ މެންދުރު އެރަށަށް ވަޑައިގަންނަވާފަވާ ކަމަށެވެ. އެ ޓީމުން އޭނާއާ ސުވާލުކޮށްފައިވާ ކަމަށާއި ދިއްދޫގައި ހައުސިންގ މިނިސްޓްރީން ފްލެޓް ދިނުމުގައި އަމަލުކޮށްފައިވާ ގޮތްތަކާއި ކައުންސިލުން ކުރި މަސައްކަތް އެ ޓީމުން އޮޅުން ފިލުވާފައިވާ ކަމަށް އޭނާ ވިދާޅުވި އެވެ.
ހާޝިމް ވިދާޅުވީ އެލްޖީއޭގެ ޓީމުން ކުރި ހުރިހާ ސުވާލަށް ހެއްކާއެކު ޖަވާބުދާރީވެފައިވާ ކަމަށެވެ. މީގެ އިތުރުން އެޓީމުން ދިއްދޫ ކައުންސިލް އިދާރާގެ ޕާމިނެންޓް ސެކެޓްރީއާ ސުވާލުކޮށްފައިވާ ކަމަށް އޭނާ ވިދާޅުވި އެވެ.
އެލްޖީއޭގެ ޓީމުން ހާޝިމްގެ މައްސަލަ ބެލުމަށްފަހު ފުރުމަށް ހަމަޖެހިފައިވަނީ އާދިއްތަ ދުވަހު އެވެ.
ދިއްދޫ ކައުންސިލްގެ ރައީސް އަލީ ހާޝިމް އެލްޖީއޭ އިން ސަސްޕެންޑްކޮށްފައިވަނީ މިދިޔަ ބުރާސްފަތި ދުވަހު އެވެ. ހާޝިމަށް ފޮނުވާފައިވާ ސިޓީގައި ބުނެފައިވަނީ ހއ.ދިއްދޫގައި ހައުސިންގ މިނިސްޓްރީން އިމާރާތްކޮށްފައިވާ ހައުސިންގ ޔުނިޓްތައް ލިބޭ ފަރާތްތަކުގެ ލިސްޓް ތައްޔާރުކޮށް އެމިނިސްޓްރީން އިއުލާންކޮށްފައިވަނިކޮށް، އެލިސްޓާ ޚިލާފަށް ކައުންސިލުން އާ ލިސްޓެއް ނެރޭނެކަން ދޭހަވާފަދަ އިބާރާތަކުން އާއްމު ފަރާތްތަކަށް ސިޓީ ފޮނުވާފައިވާކަމުގެ ލިޔެކިއުންތައް އެލްޖީއޭއަށް ލިބިފައިވާ ކަމަށެވެ.
ރައްޔިތުންނަށް ނަމޫނާ ދައްކަދޭންޖެހޭ މަގާމެއްގައި ހުންނަވައި އެކަށީގެން ނުވާ އިބާރާތްތަކުން ދައުލަތުގެ މުއައްސަސާތަކުގެ އަގުވެއްޓޭގޮތަށާއި ރައްޔިތުންގެ މެދުގައި ފިތުނަ އުފެދޭ ގޮތަށް ވާހަކަ ދައްކަމުން ގެންދާތީ ދޮގު މައުލޫމާތު ހާމަކުރާ ކަމަށް އެކިފަރާތްތަކުންނާއި ސަރުކާރުގެ މުއައްސަސާތަކުން އެ އޮއޯރިޓީއަށް ޝަކުވާ ހުށަހަޅަމުންދާކަމަށް އެލްޖީއޭގެ ސިޓީގައި ބުނެފައިވެ އެވެ.
ކައުންސިލްގެ ރައީސްގެ ސަސްޕެންޝަންގެ މުއްދަތުގައި ކައުންސިލް ހިންގުމާ ހަވާލުވެ ހުންނާނީ ކައުންސިލްގެ ނައިބު ރައީސް ކަމަށާއި ކައުންސިލްގެ ރައީސް ސަސްޕެންޑް ކުރެވިފައިވާ މުއްދަތުގައި ކައުންސިލަށް ނުކުމެ އެއްވެސް މަސައްކަތެއްގައި އަމަލީ ގޮތުން ބައިވެރިވުމުގެ ފުރުސަތު ނުދިނުމަށް ސިޓީގައި ބުނެފައިވެ އެވެ.
