އައްޑޫ ބިޔުރޯ

މޯލްޑިވްސް ބްލަޑް ސަރވިސްއަށް ލިބިފައިހުރި ފިލްޓަރތަކުގެ މައްސަލަ ދިމާވެ، ލޭ އަޅާ މީހުންގެ ލޭތައް އުކާލަން ޖެހޭ މައްސަލަ ބޮޑުވެ، އެކަމާއި ދެކޮޅަށް ގިނަ ބަޔަކު އެއްވެ އިހުތިޖާޖު ކޮށްފައިވަނިކޮށް ކުރިން ބޭނުންކުރި ފިލްޓަރ ލިބި މިހާރު، އައު ފިލްޓަރތައް ބޭނުންކުރަން ފަށާފައިވާ ކަމަށް ހެލްތް މިނިސްޓަރ އަބުދުﷲ ނާޡިމް އިބްރާހިމް ވިދާޅުވެއްޖެ އެވެ.

ހެލްތް މިނިސްޓްރީގެ މަސައްކަތްތަކާއި ބެހޭ ގޮތުން މަޢުލޫމާތުދިނުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީން ދެންނެވި ސުވާލަކަށް ޖަވާބުދެއްވަމުން މިނިސްޓަރ ނާޒިމް ވިދާޅުވީ ފިލްޓަރުގެ މައްސަލަ މިހާރު ހައްލުކޮށްފައިވާނެ ކަމަށާއި ކުރިން ބޭނުންކުރި ބްރޭންޑްގެ ފިލްޓަރ ލިބި މިހާރު ބޭނުންކުރެވެން ފަށާފައިވާ ކަމަށާއި ތެލަސީމިއާ ސެންޓަރު އޮރެންޖު ހިޔާއަށް ބަދަލުކުރުމުގެ މަސައްކަތަކާއި، އިހްތިޖާޖްކުރުމާއި ގުޅިގެން ކުރިއަށްގެންދިޔަ މަސައްކަތެއް ނޫން ކަމަށެވެ. އެއީ މާ ކުރިންވެސް މިނިސްޓްރީގެ ޕްލޭންގެ ތެރޭގައި ހިމެނިފައިވާ މަސައްކަތެއް ކަމަށް މިނިސްޓަރ ވިދާޅުވި އެވެ.

އެހެންކަމުން މާލަސްތަކެއް ނުވެ ތެލަސީމިއާ ޕޭޝަންޓުންނަށް މާ ތަނަވަސް ސެންޓަރެއްގެ ޙިދުމަތް ލިބިގެންދާނެ ކަމަށާއި އަދިވެސް ތެލެސީމިއާ ޕޭޝަންޓުންނަށް ދިމާވެފައިވާ އެހެނިހެން ގޮންޖެހުންތަކަށްވެސް އިސްކަންދެއްވާނެ ކަމަށް މިނިސްޓަރ ވިދާޅުވިއެވެ.

ހުޅުމާލޭ ފޭސް 1 ގައި ހުންނަ އޮރެންޖު ހިޔާއަށް ތެލެސީމިއާ ސެންޓަރު ބަދަލުކުރުމުގެ އަމަލީ މަސައްކަތް ފަށާފައި މިވަނީ ތެލެސީމިއާ ސެންޓަރު ހިންގަމުންދިޔަ ދަމަނަވެށި ވަރަށް ބޮޑަށް ބައުވެ، އެތަނުގައި ޚިދުމަތްތައް ނުދެވި ފިލްޓަރތަކުގެ މައްސަލައެއް ދިމާވެ، ލޭ އަޅާ މީހުންގެ ލޭތައް އުކާލަންޖެހޭ މައްސަލަ ބޮޑުވެ، އާއްމު ރައްޔިތުން މުޒާހަރާ ކޮށްފައިވަނިކޮށެވެ.

މި މައްސަލަ ފެންމަތިވުމާ ގުޅިގެން 23 މާރިޗް 2025 ވީ އާދިއްތަ ދުވަހުގެ މެންދުރުގެ ވަގުތެއްގައި ރައީސް ޑރ.މުހައްމަދު މުއިއްޒު ވަނީ ތެލަސީމިއާ ސެންޓަރުގެ ހާލަތު ބައްލަވާލެއްވުމަށް އެސެންޓަރަށް ޒިޔާރަތްކުރެއްވައި، މައްސަލަތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ދެއްވާފައެވެ. އަދި ދަމަނަވެށީގައި ހިންގަމުންދިޔަ ތެލަސީމިއާ ސެންޓަރުގެ ހާލަތު އަދި ދަމަނަވެށީގެ އެ އިމާރާތުގެ ހާލަތު ވެސް އެނގިވަޑައިނުގަންނަވާ ކަމަށް ވިދާޅުވެފައިވެއެވެ.

ނަމަވެސް އެމަނިކުފާނުގެ ރިޔާސީ އިންތިޚާބުގެ ކެންޕޭންގެ ތެރޭގައި މި އިމާރާތާ ގުޅޭގޮތުން ވަނީ ވާހަކަ ދައްކާފައެވެ. ރައީސް މުއިއްޒު ވިދާޅުވީ ތެލަސީމިއާ ސެންޓަރުގެ ހާލަތު ވަރަށް ދަށް ކަމަށާއި، ރަނގަޅު ޚިދުމަތެއް ނުދެވޭތީވެ، ތެލަސީމިއާ ކުދިން މަރުވާ ރޭޓް ވެސް އިތުރުވެފައިވާ ކަމަށެވެ. އަދި އެމަނިކުފާނުގެ ވެރިކަމުގައި ރަނގަޅު ޑޮކްޓަރުންނާއެކު، ފެންވަރު ރަނގަޅު ޚިދުމަތް ދެވޭ ޖާގަ ބޮޑު ތެލަސީމިއާ ސެންޓަރެއް މާލެސިޓީގައި ގާއިމް ކުރާނެ ކަމަށެވެ.

ރައީސް މުއިއްޒު ހެއްދެވި މި އިތުރުފުޅާ ގުޅިގެން ރިޔާސީ އިންތިޚާބުގައި އެމަނިކުފާނު ދެއްކެވި ވާހަކަފުޅުގެ ވީޑިއޯ ސޯޝަލް މީޑިއާގައި އާއްމުވެ، ގިނަ ބައެއްގެ ފާޑުކިޔުން ވެސް ސަރުކާރަށް ވަނީ އަމާޒުވެފައެވެ.