ބުޅާ މަހުން ކާއެއްޗެހި ތައްޔާރުކުރި ކަމަށް ތުހުމަތު ކުރެވޭ މީހާ މިވަގުތު ހުރީ ވިސާ ވައިލޭޝަންގައި ކަމަށާއި، މައްސަލަ ތަހުގީގުކޮށް ނުނިމެނީސް އޭނާ ޑީޕޯޓު ނުކުރާނެ ކަަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

އިމިގްރޭޝަންގެ ބެލުމުގެ ދަށުގައި ހުރީ 32 އަހަރުގެ ބަންގްލަދޭޝް ރައްޔިތެއް ކަމަށްވާ އަރަފާތު ހޮސައިން އެވެ. މި މީހާ އިމިގްރޭޝަންގެ ބެލުމުގެ ދަށަށް ގެނެސްފައިވަނީ 20 އޯގަސްޓް 2024 ގައެވެ.

މިމައްސަލައާ ގުޅިގެން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ އެމީހާ މިހާރު ހުރީ އިމިގްރޭޝަންގެ ބެލުމުގެ ދަށުގައި ކަމަށާއި، ބުޅާ މަހުން ކާތަކެތި ތައްޔާރުކުރި ކަމަށް ތުހުމަތު ކުރެވޭ މައްސަލަ ތަހުގީގު ކުރަމުންދާ ކަަމަށެވެ. އަދި މިމައްސަލަ ތަހުގީގުކޮށް ނުނިމެނީސް ޑީޕޯޓުނުކުރާނެ ކަމަށް މިނިސްޓަރު އިހުސާން ވިދާޅުވިއެވެ.

މިނިސްޓަރު އިހުސާން ވިދާޅުވީ ބުޅާ މަސްއަޅައިގެން ކާބޯތަކެތި ތައްޔާރުކުރިކަން ކަށަވަރުނުވާ ކަމަށާއި، އެކަން ޔަގީންވާ ހިސާބުން އާއްމު ރައްޔިތުންނަށް އެމައުލޫމާތު ހިއްސާކުރާނެ ކަމަށެވެ.

އަރަފާތާ ގުޅޭގޮތުން ސޯޝަލް މީޑިއާގައި ދައުރުވަމުންދާ މައުލޫމާތައް ބަލާއިރު މި މީހާ އަކީ ގަވައިދާ ޚިލާފަށް މާލޭ ވަޅޯމަސް މާރުކޭޓުގައި މަސައްކަތް ކުރުމުގެ އިތުރުން ބުޅާ ކަތިލައި، އޭގެ މަހުން ކާއެއްޗެހި ތައްޔާރުކޮށް، ވިއްކާ ކަމަށް ތުހުމަތު ކުރެވޭ މީހެކެވެ.

އިމިގްރޭޝަނުން ގަވާއިދާ ހިލާފަށް މާލޭގައި ދިރިއުޅޭ ބިދޭސީން ހޯދުމަށް ކުރަމުންދާ މަސައްކަތުގެ ދަށުން ބިދޭސީން ހިންގާ ގިނަ ފެކްޓްރީތަކާއި، ފިހާރަތަކާއި، ކެފޭ/ރެސްޓޯރެންޓްތައް ދަނީ ހޯދަމުންނެވެ. އިމިގްރޭޝަނުން އާއްމު ކުރާ ވީޑިއޯތަކާއި ފޮޓޯތަކުން މިތަންތަނުގެ ނުސާފުކަމާއި، މުޑުދާރުކަން ހާމަވެ، ގިނަ ބައެއްގެ ފާޑުކިޔުން ހެލްތް މިނިސްޓްރީ އަދި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އަށް ވަނީ އަމާޒުވެފައެވެ.