ބޫޓާންގައި މިހާރު ކުރިޔަށްދާ 16 އަހަރުން ދަށުން ސާފް ޗެމްޕިއަންޝިޕް ފުޓުބޯޅަ މުބާރާތުގައި ގައުމީ ޒުވާން ޓީމު ފުރަތަމަ ކުޅުނު މެޗުން ބަލިވެ، ޕާކިސްތާން ސެމީ ފައިނަލުން ޖާގަ ހޯދައިފިއެވެ.

ޕާކިސްތާން ސެމީ ފައިނަލުން ޖާގަ ހޯދީ 3-0ން ރާއްޖެ ބަލިކޮށް، ގުރޫޕު ބީގެ އެއްވަަނަ ޓީމުގެ ގޮތުގައެވެ. މީގެ ކުރިން ޕާކިސްތާނުން ވަނީ ބޫޓާނާ ވާދަކޮށް، 2-1ން މޮޅުވެފައެވެ.

ގައުމީ ޓީމުގެ ފުރަތަމަ 11އަށް ބަލާއިރު، ދިވެހި ޕްރިމިއަރ ލީގުގައި ރަނގަޅު ކުޅުމެއް ދައްކަމުން އަންނަ ކުޅުންތެރިން ޓީމުގައި ހިމަނާފައިވެއެވެ. އޭގެތެރޭގައި ކްލަބް ވެލެންސިއާއަށް ކުޅޭ ޔޫސުފް އަޔާން އާމިރު، މުހައްމަދު އިލާން އިމްރާން، އީތަން އިބްރާހިމް ޒަކީ އަދި އަހުމަދު ކާއިން ގަޔާޝް ހިމެނެއެވެ. ޓީމުގެ ކެޕްޓަނަކީ އަޔާނެވެ.

މެޗުގެ 14 ވަނަ މިނެޓުގައި ޕާކިސްތާނުގެ ސުބްހާން ކަރީމް ވަނީ ލަނޑެއް ޖަހައި އެ ޓީމަށް ކުރިހޯދާފައެވެ. އޭގެ ފަހުން މެޗުގެ 39 ވަނަ މިނެޓުގައި ޕާކިސްތާނަށް ލީޑު ފުޅާކޮށްދިނީ އަބްދުލް ސަމަދުއެވެ. ދެވަނަ ހާފު ފެށިގެން ހަވަނަ މިނެޓުގައި ޕާކިސްތާނުގެ މަޖީދު އަލީ ފޮނުވާލި ބޯޅަ ގޯލުގެ ތެރެއަށް ވަނީ ރާއްޖޭގެ އަހުމަދު މިފްޒާލްގެ ފައިގައި ޖެހިފައެވެ.

މިއަހަރުގެ މުބާރާތުގައި ގުރޫޕު އޭގައި ހިމެނެނީ ބަންގްލަދޭޝް، އިންޑިއާ އަދި ނޭޕާލެވެ. ގުރޫޕު ބީގައި ހިމެނެނީ ރާއްޖެއާއި ޕާކިސްތާނުގެ އިތުރުން މުބާރާތް ބާއްވާ ގައުމު، ބޫޓާނެވެ. ރާއްޖެއާއި ބޫޓާން ބައްދަލުކުރާ މެޗު ކުޅުމަށް ހަމަޖެހިފައިވަނީ ބުދަ ދުވަހުއެވެ. މެޗުން މޮޅުވެގެން ސެމީއަށް ދިއުމުގެ ފުރުސަތު ގައުމީ ޓީމަށް ލިބޭނެއެވެ.