ރިޔޫނިއަން ބަލިކޮށް، ފިރިހެން ޓީޓީ ޓީމު ބައިނަލްއަގުވާމީ ފުރަތަމަ ފައިނަލަށް

އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ރިޔޫނިއަން ބަލިކޮށް، ރާއްޖޭގެ ފިރިހެން ޓޭބަލް ޓެނިސް ޓީމުން ބައިނަލްއަގުވާމީ މުބާރާތެއްގެ ފައިނަލުން ފުރަތަމަ ފަހަރަށް ޖާގަހޯދައިފިއެވެ.

އާދިއްތަ ދުވަހު ކުޅުނު ސެމީ ފައިނަލް މެޗުގައި ޤައުމީ ޓީމުން ރިޔޫނިއަންގެ މައްޗަށް ކުރިހޯދީ 3-2 ގެ ނަތީޖާއަކުންނެވެ. މެޗުގެ ފުރަތަމަ ގޭމުގައި ރާއްޖޭގެ މޫސާ މުންސިފް އަހުމަދު ވަނީ ލެ ބްރެޓަން ތޯމަސް ކައިރިން 3-1 ން ބަކިވެފައެވެ. ފުރަތަމަ ސެޓު ލް ބްރެޓަން ކާމިޔާބުކުރީ 11-9 ގެ ނަތީޖާއަކުންނެވެ. ދެވަނަ ސެޓު މުންސިފް ކާމިޔާބުކުރީ 11-7 ންނެވެ. ލެ ބްރެޓަން ވަނީ ފަހު ދެ ސެޓު 11-8 އަދި 11-6 ން ކާމިޔާބުކޮށްފައެވެ.

ދެވަނަ ގޭމުގައި ރާއްޖޭގެ މުހައްމަދު ޝައްފާން އިސްމާއިލް ވަނީ 3-2 ގެ ނަތީޖާއަކުން ކުއެންޓިންގެ މައްޗަށް ކުރިހޯދާފައެވެ. ފުރަތަމަ ސެޓު 13-11 އިން ޝައްފާން ކާމިޔާބުކުރިއިރު، ޖެހިގެން އަދި ދެ ސެޓު ކާމިޔާބުކުރީ ކުއެންޓިން އެވެ. ރިޔޫނިއަންގެ ކުޅުންތެރިޔާ ދެ ސެޓުވެސް ކާމިޔާބުކުރީ 12-10 ގެ ނަތީޖާއަކުންނެވެ. ޝައްފާން ވަނީ ކުޅުން އިތުރަށް ރަނގަޅުކޮށް، ފަހު ދެ ސެޓު 11-8 އަދި 12-10 ން ކާމިޔާބުކޮށްފައެވެ.

ތިންވަނަ ގޭމުގައި ވާދަކޮށްފައިވަނީ އަޚްޔާރު އަހުމަދު ޚާލިދު އާއި ޕޮތިން ޖީން ސެބަސްޓިއަން އެވެ. މި ގޭމު 3-1 ން ކާމިޔާބުކުރީ އަޚްޔާރު އެވެ. ފުރަތަމަ ދެ ސެޓު 11-6 އަދި 11-5ން އަޚްޔާރު ކާމިޔާބުކުރިއިރު، ތިންވަނަ ސެޓު 11-9 ން ކާމިޔާބުކުރީ ސެބަސްޓިއަން އެވެ. ފަހު ސެޓުން އަޚްޔާރު މޮޅުވެފައިވަނީ 11-9 ގެ ނަތީޖާއަކުންނެވެ.

ސެމީ ފައިނަލްގެ ހަތަރުވަނަ ގޭމުގައި ވާދަކޮށްފައިވަނީ ޝައްފާން އާއި ލެ ބްރެޓަން އެވެ. މި ދެ ކުޅުންތެރިންނަކީވެސް ކުރިން ކުޅެފައިވާ ދެ ގޭމު ކާމިޔާބުކޮށްފައިވާ ދެ ކުޅުންތެރިންނެވެ. ހަތަރުވަނަ ގޭމު ކާމިޔާބުކޮށް، ރިޔޫނިއަން އިންވަނީ ނަތީޖާ ހަމަހަމަ ކޮށްފައެވެ. ރިޔޫނިއަންގެ ކުޅުންތެރިޔާ ސެޓުތައް ކާމިޔާބުކުރީ 14-12، 11-9 އަދި 11-6 ގެ ނަތީޖާއަކުންނެވެ.

މެޗުގެ ފަހު ސެޓުގައި ރާއްޖޭގެ މުންސިފް ވަނީ ސީދާ ތިން ސެޓުން ރިޔޫނިއަންގެ ކުއެންޓިން ބަލިކޮށްފައެވެ. މުންސިފް ފުރަތަމަ ސެޓު 11-7ން ކާމިޔާބުކޮށްފައިވާއިރު، ޖެހިގެން އައި ދެ ސެޓު ކާމިޔާބުކުރީ 11-6 އިންނެވެ.

ރާއްޖޭގެ ޓީޓީ ޓީމުން ވަނީ ކުރިއާލާ ފަރިތަކުރުންތައް ފަށާފައެވެ. އެގޮތުން، ގައުމީ ޓީޓީ ޓީމުން އައިއޯއައިޖީގެ ކުރިން ވަނީ ކްރޮއޭޝިއާގައި ޓްރެއިނިންގް ކޭމްޕެއް ކުރިއަށް ގެންގޮސްފަ އެވެ.