އޭވިއޭޝަން ސެކިއުރިޓީ ކޮމާންޑުގެ 58 މުވައްޒަފުންނަށް މަޤާމުގެ ކުރިއެރުން ދީފި
21 ފަރާތަކަށް ކޯޕްރަލްގެ މަޤާމް އަދި 21 ފަރާތަކަށް ސަރޖަންޓްގެ މަޤާމް ވަނީ ލިބިފަ
އޭވިއޭޝަން ސެކިއުރިޓީ ކޮމާންޑުގެ މުވައްޒަފުންނަށް މަޤާމުގެ ކުރިއެރުން ދިނުމަށް ކަސްޓަމްސް ބިލްޑިންގައި ބޭއްވި ރަސްމިއްޔާތުގެ ތެރެއިން
އޭވިއޭޝަން ސެކިއުރިޓީ ކޮމާންޑުގެ 58 މުވައްޒަފުންނަށް މަޤާމުގެ ކުރިއެރުން ދީފިއެވެ.
އެ މުވައްޒަފުންނާއި މަޤާމުގެ ކުރިއެރުން ހަވާލުކޮށްދެއްވީ، ކަސްޓަމްސް ބިލްޑިންގގައި ހޮނިހިރު ދުވަހު ބޭއްވި ޚާއްސަ ރަސްމިއްޔާތެއްގައި ޑިފެންސް މިނިސްޓަރ މާރިޔާ އަހުމަދު ދީދީއެވެ.
އެ ރަސްމިއްޔާތުގައި ވާހަކަދައްކަވަމުން ޑިރެކްޓަރ އޮފް އޭވިއޭޝަން ސެކިއުރިޓީ އަލީ އަސްގަރު ވިދާޅުވީ 2014 އިން ފެށިގެން މުވައްޒަފުންނަށް ޕްރޮމޯޝަން ނުދީ މެދުކަނޑާލާފައި ވުމަކީ މުވައްޒަފުން ވަރަށް ބޮޑަށް މާޔޫސްވީ ކަމެއް ކަމަށެވެ. ނަމަވެސް މި ސަރުކާރު ވެރިކަމަށް އައުމަށް ފަހު ގޮންޖެހުންތަކާއި އެކުގައި ވެސް ޕްރޮމޯޝަން ދޭން ނިންމުމަކީ މުވައްޒަފުން އުފާކުރާ ކަމެއް ކަމަށް އޭނާ ވިދާޅުވިއެވެ. އެގޮތުން މީގެ ކުރިން މި އަހަރު އޭވިއޭޝަން ސެކިއުރިޓީ ކޮމާންޑުގެ 79 މުވައްޒަފުންނަށް ޕްރޮމޯޝަން ދީފައިވާ ކަމަށާއި އެއީ މުވައްޒަފުންނަށް އުފާވެރިކަން ގެނުވާ ކަމެއް ކަަމަށް އޭނާ ވިދާޅުވިއެވެ.
އަދި މިހާރު އިތުރު 58 މުވައްޒަފުންނަށް ޕްރޮމޯޝަން ލިބުމަކީ މުވައްޒަފުންނަށް ލިބޭ ކުރިއެރުމެއް ކަަމަށް އޭނާ ފާހަގަކުރެއްވިއެވެ. އެ ރަސްމިއްޔާތުގައި މަޤާމުގެ ކުރިއެރުން ލިބުނު މުވައްޒަފުންގެ ފަރާތުން ވާހަކަދެއްކެވި އޭވިއޭޝަން ސެކިއުރިޓީ ކޯޕްރަލް ފާތުމަތު އަލީ ވެސް ވަނީ މަޤާމުގެ ކުރިއެރުން ލިބުމަކީ މުވައްޒަފުންގެ މަސައްކަތަށް ހިއްވަރު ލިބި، އެހެން މުވައްޒަފުންނަށް ވެސް މަސައްކަތުގައި ރަނގަޅަށް ހަރަކާތްތެރިވުމަށް ލިބޭ ބާރެއް ކަމަށް ފާހަގަކުރައްވާފައެވެ.
އޭވިއޭޝަން ސެކިއުރިޓީ ކޮމާންޑުގެ މުވައްޒަފުންނަށް ޕްރޮމޯޝަން ދީފައިވާ ގޮތަށް ބަލާއިރު 21 ފަރާތަކަށް ކޯޕްރަލްގެ މަޤާމް އަދި 21 ފަރާތަކަށް ސަރޖަންޓްގެ މަޤާމް ވަނީ ލިބިފައެވެ. އަދި ސްޓާފް ސަރޖަންޓުގެ މަޤާމް 13 ފަރާތަަށް، ސުޕްރިންޓެންޑެންޓުގެ މަޤާމް 2 ފަރާތަކަށް އަދި ޗީފްގެ މަޤާމް އެއް ފަރާތަކަށް ވަނީ ލިބިފައެވެ.
